ខេត្តកណ្តាល ៖ ទោះបីជាបែបណា នៅមិនទាន់បានដឹងច្បាស់ពីមូលហេតុ ដែលបណ្តាលមកពីរឿងអ្វីនៅឡើយ ព្រោះខាងស្រីស្លាប់ ឯខាងប្រុសកំពុងសង្គ្រោះបន្ទាន់ មិនអាចនិយាយបាន ។ ប្រសិនមានព័ត៌មានប្លែកទៀតនឹងមានផ្សាយជូននៅពេលក្រោយ ។
សូមបញ្ជាក់ថា មានការភ្ញាក់ផ្អើលមួយ បានកើតឡើងកាលពីរសៀលថ្ងៃទី៣១ សីហា ដោយមានស្ត្រីម្នាក់ត្រូវបានគេឃើញដេកស្លាប់ក្នុងបន្ទប់លេខA១០១ ផ្ទះសំណាក់ធំមួយនៅក្រុងតាខ្មៅ ដែលជំហានដំបូងសមត្ថកិច្ចបានធ្វើការសន្និដ្ឋានថា ជាអំពើអត្តឃាតកម្ម ។ ស្ត្រីរងគ្រោះឈ្មោះ មួន ស្រីនឿន អាយុ២៩ឆ្នាំ ជាកម្មការិនីរោងចក្រកាត់ដេរ ស្នាក់នៅភូមិលេខ៤ សង្កាត់ស្វាយរលំ ក្រុងតាខ្មៅ ខេត្តកណ្តាល មានស្រុកកំណើតនៅភូមិឱម៉ាល់ ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង ។
នៅកន្លែងកើតហេតុ សមត្ថកិច្ចបានរកឃើញវត្ថុតាង រួមមានសម្បកថ្នាំមួយចំនួន មានសម្បកថ្នាំ TRAUIC ប្រើអស់ចំនួន៤បន្ទះ សម្បកប្រអប់២ និងសម្បកថ្នាំLaroxyl មាន១បន្ទះ ប្រើអស់៣០គ្រាប់ ថ្នាំ MIRAL GINE អស់១៨គ្រាប់ ថ្នាំ TRAVIC អស់៣៩គ្រាប់ ។
តាមសាក្សីបានរៀបរាប់ប្រាប់សមត្ថកិច្ចថា នៅវេលាម៉ោងជាង២រសៀលថ្ងៃទី៣១ ខែសីហា ឈ្មោះ ជួន កុសល ភេទប្រុស អាយុ៣៤ឆ្នាំ ជាសន្តិសុខបានដើរមើលភ្ញៀវតាមបន្ទប់ ព្រោះដល់ម៉ោងសម្អាតបន្ទប់ ដើម្បីឲ្យភ្ញៀវបង់លុយបន្តការស្នាក់នៅជាថ្មីទៀត ។ បន្ទាប់មក សន្តិសុខរូបនោះបានទៅគោះទ្វារបន្ទប់លេខA១០១ តែភ្ញៀវមិនព្រមបើកទ្វារទេ រួចក៏បានដើរទៅយកសោមកចាក់បន្ទប់នោះចូលទៅ ក៏ឃើញភ្ញៀវប្រុសឈ្មោះ យ៉ែម នៅ អាយុ៣២ឆ្នាំ ដើរចុះដើរឡើងក្នុងបន្ទប់ ហើយសន្តិសុខក៏បានសួរនាំ តែគេមិននិយាយស្តីអ្វីទេ ដោយសារបុរសជាភ្ញៀវនេះក៏កំពុងមានស្មារតីល្ងីល្ងើដែរ ។ សាក្សីជាសន្តិសុខប្រាប់សមត្ថ កិច្ចទៀតថា បន្ទាប់មកដោយមានការសង្ស័យ គាត់ក៏បានហៅបុគ្គលិកផ្ទះសំណាក់ឲ្យជួយមើល ក៏ឃើញស្ត្រីម្នាក់ជាដៃគូឈ្មោះ មួន ស្រីនឿន ដេកបែកពពុះមាត់នៅលើពូក រួចបានរាយការណ៍ជូនសមត្ថកិច្ចឲ្យចុះទៅពិនិត្យភ្លាមៗ ។
សូមបញ្ជាក់ថា នៅបន្ទប់លេខA១០១ ខាងប្រុសចូលមកសម្រាកនៅថ្ងៃទី២៩ សីហា វេលាម៉ោង២០ និង២០នាទី ហើយសម្រាកបាន១យប់ក៏បានឃើញខាងស្រី(ជនរងគ្រោះ) បានចូលមកសម្រាកនៅថ្ងៃទី៣០ សីហា វេលាម៉ោង១០ព្រឹកជាមួយប្រុសស្នេហ៍ ។ លុះដល់ថ្ងៃទី៣១ សីហា ទើបកើតមានហេតុការណ៍ ដេកស្លាប់នៅក្នុងបន្ទប់ផ្ទះសំណាក់ខាងលើនេះ ។ ការចូលមកស្នាក់នៅក្នុងបន្ទប់ជាមួយគ្នានេះ ពួកគេពិតជាមានការណាត់គ្នាមកលេបថ្នាំ ដោយមានវិបត្តិប្រការណាមួយហើយ ។ ការសន្និដ្ឋានរបស់សមត្ថកិច្ច ជំនាញបច្ចេកទេសខេត្តកណ្តាល និងនគរបាលផ្នែកពិនិត្យវិភាគកន្លែងកើតហេតុក្រុងតាខ្មៅ ព្រមទាំងអាជ្ញាធរ និងគ្រូពេទ្យមន្ទីរពេទ្យជ័យជំនះថា ជនរងគ្រោះពិតជាបានស្លាប់ ដោយសារការប្រើប្រាស់ថ្នាំហួសកំណត់សង្ស័យក្នុងគោលបំណងធ្វើអត្តឃាតកម្ម ។
ក្រោយពិនិត្យចប់សព្វគ្រប់ សាកសពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ។ ដោយឡែក ឈ្មោះ យ៉ែម នៅ ភេទប្រុស អាយុ៣២ឆ្នាំ ដែលមានស្រុកកំណើតនៅស្រុកកំពង់ត្របែក ខេត្តព្រៃវែង កំពុងសង្គ្រោះបន្ទាន់នៅមន្ទីរពេទ្យបង្អែកជ័យជំនះ ក្រុងតាខ្មៅ ។
ករណីខាងលើនេះ អ្នកវិភាគកំពុងស្ថិតក្នុងភាពសង្ស័យធ្វើអត្តឃាត ដែលស្ត្រីជាជនរងគ្រោះបានដេកស្លាប់នៅនឹងកន្លែង ជាមួយសម្បកថ្នាំច្រើនប្រភេទ គឺដេកស្លាប់ទាំងស្លៀកខោស្នាប់ភ្លៅ ។ តាមការសន្និដ្ឋានរបស់សមត្ថកិច្ច(ស្លាប់ដោយប្រើថ្នាំលើសកម្រិត) ចំណែកបុរសកំពុងសង្គ្រោះបន្ទាន់ ដូច្នេះអាចជាករណីអត្ត ឃាតកម្ម ។ (សម្រួលដោយ៖ ស្រីណា)
ចែករំលែកព័តមាននេះ