ខេត្តមណ្ឌលគិរី ៖ អាជ្ញាធរខេត្តមណ្ឌលគិរី ដឹកនាំដោយលោក ស្វាយ សំអ៊ាង រួមនិងស្នងការនគរបាលខេត្ត មេបញ្ជាការសឹករងខេត្ត បានចុះពិនិត្យផ្លូវប្រវត្តិសាស្ត្រក្រវ៉ាត់ព្រំដែនកម្ពុជា-វៀតណាម ស្ថិតក្នុងស្រុកកែវសីមា…
ខេត្តមណ្ឌលគិរី ៖ អាជ្ញាធរខេត្តមណ្ឌលគិរី ដឹកនាំដោយលោក ស្វាយ សំអ៊ាង រួមនិងស្នងការនគរបាលខេត្ត មេបញ្ជាការសឹករងខេត្ត បានចុះពិនិត្យផ្លូវប្រវត្តិសាស្ត្រក្រវ៉ាត់ព្រំដែនកម្ពុជា-វៀតណាម ស្ថិតក្នុងស្រុកកែវសីមា ប្រវែងជាង៣០០គីឡូម៉ែត្រ នាថ្ងៃទី០២ កញ្ញា នេះ ដែលកំពុងត្រូវបានកម្លាំងវិស្វកម្មអគ្គបញ្ជាការសម្រុកសាងសង់ទាំងយប់ទាំងថ្ងៃ ។
លោក ស្វាយ សំអ៊ាង មានប្រសាសន៍ថា ផ្លូវប្រវត្តិសាស្ត្រក្រវ៉ាត់ព្រំដែនកម្ពុជា-វៀតណាម ដែលកំពុងសាងសង់នេះ គិតក្នុងខេត្តមណ្ឌលគិរីមានប្រវែងសរុប៣១៤គីឡូម៉ែត្រ ហើយបច្ចុប្បន្នកងកម្លាំងវិស្វកម្មធ្វើបានប្រមាណជាង១០០គីឡូម៉ែត្រ ប៉ុន្តែផ្លូវចាក់ក្រួសដែលអាចធ្វើដំណើរបានប៉ុណ្ណោះអាសន្នមានត្រឹម៧០គីឡូ ម៉ែត្រ ។ ចំពោះអត្ថប្រយោជន៍នៃការសាងសង់ផ្លូវក្រវ៉ាត់ព្រំដែននេះ លោកបានពន្យល់ថា វាមានសារសំខាន់ សម្រាប់ការពារខ្សែក្រវ៉ាត់ព្រំដែនរវាងកម្ពុជា-វៀតណាម ដែលសូម្បីភាគីវៀតណាម ក៏គេមានគោលការសាងសង់ហេដ្ឋារចនាសម្ព័ន្ឋតាមព្រំដែនដូចយើងដែរ ។
ដោយឡែក សម្រាប់គោលការរបស់រាជរដ្ឋាភិបាល ជាពិសេសសម្តេចតេជោ បានជម្រុញការអភិវឌ្ឍន៍
ផ្លូវបន្ទាត់ព្រំដែននេះ រវាងប្រទេសជិតខាង ដូចជាខាងប្រទេសថៃ ប្រទេសឡាវ និងប្រទេសវៀតណាម ។ដូច្នេះ នេះជាគោលនយោបាយមួយ ដើម្បីការពារបូរណភាពទឹកដីព្រំដែន រវាងប្រទេសជិតខាង ឲ្យក្លាយទៅជាព្រំដែនដែលមានសន្តិភាព ស្ថិរភាព និងការអភិវឌ្ឍន៍ ។ អភិបាលខេត្ត ក៏បានរំឮកអំពីប្រវត្តិសាស្ត្រដែលកន្លងមក គ្មានផ្លូវតាមខ្សែបន្ទាត់ព្រំដែន ក្នុងទឹកដីខេត្តមណ្ឌលគិរី រាល់ពេលដែលកម្លាំងយាមល្បាតតាមព្រំដែនតែងជួបឧបសគ្គជាច្រើន រហូតពេលខ្លីត្រូវខ្ចីផ្លូវខាងភាគីវៀតណាម ដើម្បីធ្វើដំំណើរទៅតាមទីតាំងឈរជើងនីមួយៗ ។
ប៉ុន្តែឥឡូវនេះ ក្រោយពីរាជរដ្ឋាភិបាលសម្រេចធ្វើផ្លូវតាមខ្សែបន្ទាត់ព្រំដែន ជាឱកាសមួយសម្រាប់កងកម្លាំងការពារព្រំដែន ការពារទឹកដី ងាយស្រួលដល់កម្លាំងឈរជើងល្បាតការពារសន្តិសុខទៅតាមព្រំដែន គឺមានសារៈសំខាន់ណាស់ ។
មិនត្រឹមតែប៉ុណ្ណោះ លោកអភិបាលខេត្តមណ្ឌលគិរីបានបញ្ជាក់ថា នេះជាប្រវត្តិនៅក្នុងដំណាក់កាល ដែលដឹកនាំដោយ សម្តេចតេជោ បានធ្វើឲ្យព្រំដែនយើង អាចបោះបង្គោលព្រំដែនរហូតដល់សម្រេចបាន៨០%និយាយជារួម ដោយឡែកសម្រាប់ខេត្តមណ្ឌលគិរីក៏បោះបង្គោលបានជិត៨០%ដែរហើយ។ នៅសល់តែចំណុចមួយចំនួន ដែលគណៈកម្មធិការកិច្ចការព្រំដែននៃភាគីប្រទេសទាំងពីរកំពុងតែបន្តធ្វើការសហការជាបន្ថែមទៀត ។ (សម្រួលដោយ៖ ស្រីណា)
ចែករំលែកព័តមាននេះ