ខេត្តកណ្តាល ៖ ប្រជាពលរដ្ធរស់នៅក្នុងភូមិខ្សាច់ ឃុំអរិយក្សត្រ ស្រុកល្វាឯម ខេត្តកណ្តាលចំនួន៥គ្រួសារ បានចោទប្រកាន់ទៅលើក្រុមហ៊ុនលោកឧកញ៉ា ឃុន សៀ ធ្វើរបងដែកស័ង្កសីព័ទ្ធយកដីកម្មសិទ្ធរបស់ពួកគាត់…
ខេត្តកណ្តាល ៖ ប្រជាពលរដ្ធរស់នៅក្នុងភូមិខ្សាច់ ឃុំអរិយក្សត្រ ស្រុកល្វាឯម ខេត្តកណ្តាលចំនួន៥គ្រួសារ បានចោទប្រកាន់ទៅលើក្រុមហ៊ុនលោកឧកញ៉ា ឃុន សៀ ធ្វើរបងដែកស័ង្កសីព័ទ្ធយកដីកម្មសិទ្ធរបស់ពួកគាត់ ខណៈមិនទាន់ទទួលបានដោះស្រាយនៅឡើយ។
បើតាមការលើកឡើងរបស់ប្រជាពលរដ្ឋទាំង៥គ្រួសារនោះថា ដីដែលក្រុមហ៊ុនលោកឧកញ៉ា ឃុន សៀគ្រប់ ធ្វើរបងព័ទ្ធយកនេះក្នុងមួយឡូត៍ទំហំស្មើគ្នាទាំងអស់ក្បាលដី១១ម៉ែត្រ បណ្តោយជិត៣០០ម៉ែត្រ
(ដល់ច្រាំងមាត់ទន្លេមេគង្គ) ដែលជាក្តីសង្ឃឹម សម្រាប់ក្រុមគ្រួសាររបស់ពួកគាត់ទៅលើការដាំដុះបង្ក បង្កើនផលដំណាំដូចជា ចេក ល្ហុង និងស្លឹកគ្រៃ។ល ។ មានរយៈពេលជិត២០ឆ្នាំមកហើយ និងបានជួយផ្គត់ផ្គង់អោយកូនចៅបានរៀនសូត្រផងដែរ។
ស្របពេលដីមានហាងឆេងក៏មានឈ្មួញកណ្តាល២-៣នាក់ បានមកសួរចែកទិញដីរបស់ពួកគាត់ ។ ដោយដំបូងឡើយ មិនទាន់ឈួសឆាយ គឺក្រុមហ៊ុនអោយឈ្មួញកណ្តាលមកទិញពួកគាត់ក្នុងតម្លៃ៣០០០០ (បីមុឺនដុល្លារ) តែពួកគាត់មិនលក់ ។ ក្រោយមកទៀត អោយ៥០០០០(ប្រាំមុឺនដុល្លារ) ពួកគាត់ក៏មិនព្រមលក់ព្រោះបានថោកពេក ។
បន្ទាប់មក ក្រុមហ៊ុនលោកឧកញ៉ា ឃុន សៀ គ្រុប បានប្រើប្រាស់គ្រឿងចក្រទៅឈួសឆាយបំផ្លិចបំផ្លាញផលដំណាំ រួចហើយហៅពួកគាត់ទៅចរចា អោយតម្លៃមួយឡូត៍ត្រឹមតែ២៥០០០$ (ពីរមុឺនប្រាំពាន់ដុល្លារ)វិញ ពួកគាត់មិនព្រមលក់ បែរជាភាគីក្រុមហ៊ុនលោកឧកញ៉ាឃុន សៀ គ្រុបនេះ ប្រើកម្មករធ្វើរបងដែកស័ង្កសីព័ទ្ធ យកដីពួកគាត់តែម្តង និងថែមទាំងដាក់កងកម្លាំងប្រដាប់អាវុធមានប៉ូលិស ប៉េអឹម ជាច្រើននាក់ ឈររារាំងគំរាមចាប់ចងមិនអោយប្រជាពលរដ្ឋម្ចាស់ដី ចូលទៅបាននោះឡើយ។
បន្ទាប់មក តំណាងក្រុមហ៊ុនក៏បានហៅពួកគាត់សាលាឃុំចរចាឱ្យពួកគាត់មួយឡូត៍តម្លៃ៣២០០០$ (បីមុឺនពីរពាន់ដុល្លារ) តែពួកគាត់ក៏នៅតែមិនទទួលយកទៀត ។ ពលរដ្ឋបន្តទៀតថា ដីរបស់ពួកគាត់នេះគឺសុទ្ធតែដីស្អាតស្អំកម្មសិទ្ធពិតប្រាកដ មិនគួរក្រុមហ៊ុនឧកញ៉ា ឃុន សៀ មករំលោភដូចប្លន់ទាំងថ្ងៃបែបនេះទេ ។
ព័ត៌មានពិស្តារមានផ្សាយនៅកាសែតកោះសន្តិភាព ។ ចំណែកឧកញ៉ា ឃុន សៀ កោះសន្តិភាពមិនអាចសុំការបំភ្លឺបានទេ ម្សិលមិញនេះ ។ (សម្រួលដោយ៖ ស្រីណា)
ចែករំលែកព័តមាននេះ