ខេត្តកំពង់ចាម ៖ ទឹកទន្លេមេគង្គបានហក់ឡើងក្នុងរយៈពេលប៉ុន្មានថ្ងៃនេះទោះបីមិនទាន់ដល់កំរិតឲ្យមានការប្រុងប្រយ័ត្ន (១៥,២០ម៉ែត្រ) យ៉ាងណាក្តីក៏បានធ្វើឲ្យច្រាំងទន្លេ ត្រង់ចំនុចភូមិក្រូចសើច ឃុំហាន់ជ័យ ស្រុកកំពង់សៀម ដែលបង្កឲ្យលំនៅឋានរបស់ប្រជាពលរដ្ឋជិត១០ខ្នង ប្រឈមនឹងបាក់ស្រុតធ្លាក់ចូលទន្លេ ប្រសិនបើមិនមានវិធានការជួយឲ្យបានលឿននោះ ។
លោកសៀង សាវ៉ាត វ័យ៥៧ឆ្នាំ នៅភូមិឃុំខាងលើប្រាប់ឲ្យនៅរសៀលថ្ងៃទី០១ កញ្ញានេះថាផ្ទះឈើរបស់របស់គាត់ប្រក់សង្កសី ក្នុងរយៈពេល២ទៅបី៣ថ្ងៃនេះទឹកទន្លេបានហក់ឡើងមកខ្លាំង ហើយច្រាំងបានបាក់នៅសល់តែ១ម៉ែត្រទៀត និងដល់ផ្ទះបង្កឲ្យមានក្តីកង្វល់ខ្លាំង ព្រោះតែជីវភាពខ្វះខាត ហើយត្រូវបានលោកអភិបាលស្រុកកំពង់សៀមដឹកនាំកម្លាំងសមត្ថកិច្ចទាំង៣ប្រភេទចុះមកជួយសែងរំកិលផ្ទះគាត់ឲ្យឆ្ងាយពីច្រាំងទន្លេ ។
ម្ចាស់ផ្ទះឈ្មោះសាវ៉ាត បានរំលឹកថា គាត់បានធ្វើផ្ទះឈើនៅលើដីនេះជាច្រើនឆ្នាំមកហើយកាលពីមុនច្រាំងនៅក្រោយផ្ទះចម្ងាយប្រមាណ៥០ទៅ៦០ម៉ែត្រពីមួយឆ្នាំទៅមួយឆ្នាំគ្រោះធម្មជាតិបានធ្វើឲ្យច្រាំងបាក់បន្តបន្ទាប់មកដល់២ឆ្នាំចុងក្រោយបាក់ច្រើន ។ ផ្ទះឈើដែលត្រូវរុះរំកិលមកកន្លែងថ្មី គឺស្នាក់នៅជាបណ្តោះអាសន្នសិនលុះមកដល់ឆ្នាំ២០២០ និងរុះយកទៅនៅកន្លែងថ្មីឆ្ងាយពីកន្លែងចាស់ប្រហែល២០០ម៉ែត្រ ដែលមានសុវត្ថិភាពច្រាំងមិនបាក់ដល់ ។
ជាមួយនោះគាត់ក៏សូមថ្លែងអំណរគុណយ៉ាងជ្រាលជ្រៅដល់សមត្ថកិច្ច និងលោកអភិបាលស្រុក ដែលបានខិតខំដឹកនាំកម្លាំងចុះមកជួយរុះរើរំកិលផ្ទះគាត់មកកន្លែងថ្មីឆ្ងាយពីច្រាំងទន្លេនោះ ។
ស្ត្រីឈ្មោះ គុច សុខយ៉ាន វ័យ៣៥ឆ្នាំ នៅភូមិក្រូចសើចបានប្រាប់ថា ផ្ទះក្បឿងរបស់គាត់ត្រូវបានឪពុកក្មេកឲ្យមានទំហំធំនៅជិតមាត់ទន្លេមេគង្គ ដោយដំបូងច្រាំងទន្លេនៅក្រោយផ្ទះចម្ងាយជិត១០០ម៉ែត្រស្របពេលនៅបានជាង១០ឆ្នាំក៏ច្រាំងបានបាក់មកជិតដល់ផ្ទះរបស់គាត់នៅក្នុងឆ្នាំ២០១៩នេះ ។ គាត់មិនទាន់រុះរើភ្លាមៗនោះទេ ដោយសារតែរវល់ច្រើនពេក ហើយពោតក្រហមនៅពេញលើផ្ទះ ដូច្នេះ៥ថ្ងៃទៀតទើបរុះផ្ទះបាន ហើយផ្ទះ និងត្រូវបង្វិលធ្វើយ៉ាងណាឲ្យនៅឆ្ងាយពីច្រាំងកុំឲ្យបាក់ដល់ ។
លោកប៊ិន ឡាដា អភិបាលស្រុកកំពង់សៀមដែលដឹកនាំកម្លាំងចុះជួយប្រជាជនប្រាប់ឲ្យដឹងថា
ដោយមានការណែនាំពីលោកអភិបាលខេត្តឲ្យយកចិត្តទុកដាក់ក្នុងការចុះជួយពលរដ្ឋមានផ្ទះនៅតាមដងទន្លេមេគង្គដែលប្រឈមនឹងការបាក់ច្រាំងទន្លេ នៅក្នុងភូមិក្រូចសើច ឃុំហាន់ជ័យ លំនៅឋានមានចំនួន៨ផ្ទះ ក្នុងនោះមាន២ផ្ទះ ត្រូវបានជួយរុះរើ និងរំកិលរួចរាល់ហើយ នៅថ្ងៃទី០២ កញ្ញា និងបន្តដឹកនាំកម្លាំងចុះជួយបន្ថែមទៀត ធ្វើយ៉ាងណាឲ្យពួកគាត់មានសុវត្ថិភាព ៕ កែសម្រួលដោយ ៖ សុឃាក់
ចែករំលែកព័តមាននេះ