រាជធានីភ្នំពេញ ៖ អ្នកបើកម៉ូតូកង់បីឥណ្ឌាម្នាក់បានប្តឹងសមត្ថកិច្ចឱ្យចាប់ឃាត់ខ្លួនបុរសជាជនសង្ស័យម្នាក់ បន្ទាប់ពីជនសង្ស័យម្នាក់នោះបានអះអាងថាខ្លួនជាជនជាតិថៃ និងទើបមកដល់ស្រុកខ្មែរ ហើយថាបានចាញ់បោកស្ត្រីម្នាក់អស់លុយចំនួន៣០០ដុល្លារ និងទូរស័ព្ទមួយគ្រឿង ដែលមានតម្លៃ១២០០ដុល្លារយកទៅបាត់អស់ពីខ្លួន។
បន្ទាប់មកជនសង្ស័យក៏បានហៅបុរសជាអ្នកបើកម៉ូតូកង់បីឥណ្ឌាម្នាក់អោយឌុបខ្លួនពីផ្ទះសំណាក់យីហោ «ចន្ទ័ ណាវី» ស្ថិតក្នុងខណ្ឌសែនសុខ ទៅបើកលុយចំនួន៨៦០០ដុល្លារ ពីធនាគារកាឌីយ៉ា នៅម្តុំផ្លូវវេងស្រេង តែគេមិនទាន់ផ្ញើអោយ ក៏អោយដឹកបន្តទៅណាហ្គាវិញ ដោយបានធ្វើជាខ្ចីលុយពីអ្នកបើកម៉ូតូកង់បីឥណ្ឌាចំនួន២០ម៉ឺនរៀល និងទូរស័ព្ទដៃមួយគ្រឿងយកទៅលេងល្បែងចាញ់អស់គ្មានសល់ លុះដល់វេលាម៉ោង៨និង៣០នាទីព្រឹកថ្ងៃទី១ ខែកញ្ញា ឆ្នាំ២០១៩ ទើបអ្នកបើកបរម៉ូតូកង់បីឥណ្ឌាមកប្តឹងនគរបាលប៉ុស្តិ៍ទន្លេបាសាក់អោយចាប់វាយខ្នោះជនសង្ស័យដល់ផ្ទះសំណាក់តែម្តង។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសជាជនសង្ស័យឈ្មោះ ប៊ុន ឡុង អាយុ៣៨ឆ្នាំ មុខរបរមិនពិតប្រាកដ មានទីលំនៅនៅប្រទេសថៃ និងមានស្រុកកំណើតនៅភូមិជ្រោយម្ទេស ឃុំតាម៉ឺន ស្រុកថ្មពួក ខេត្តបាត់ដំបង។ ចំណែកបុរសរងគ្រោះឈ្មោះ ម៉ែន វ៉ិត អាយុ២៨ឆ្នាំ មុខរបរអ្នកបើកបរម៉ូតូកង់បីឥណ្ឌា ស្នាក់នៅផ្ទះជួលក្នុងសង្កាត់ចោមចៅ ខណ្ឌពោធិ សែនជ័យ និងមានស្រុកកំណើតនៅភូមិក្រសាំង ឃុំចំប៉ី ស្រុកអង្គរជ័យ ខេត្តកំពត។
តាមប្រភពព័ត៌មានពីនគរបាលបានប្រាប់ឱ្យដឹងបន្តថា មុនពេលកើតហេតុ កាលពីយប់ថ្ងៃទី៣១ ខែសីហា ឆ្នាំ២០១៩ ជនសង្ស័យបានហៅម៉ូតូកង់បីឥណ្ឌារបស់ជនរងគ្រោះជិះចេញពីផ្ទះសំណាក់យីហោ «ចន្ទ័ ណាវី» ដែលមានទីតាំងនៅក្នុងខណ្ឌសែនសុខ ដោយអោយដឹកជូនខ្លួនទៅបើកលុយចំនួន៨៦០០ដុល្លារពីធនាគារកាណាឌីយ៉ាមួយកន្លែងមានទីតាំងនៅតាមបណ្តោយផ្លូវវេងស្រេង។
តាមប្រភពព័ត៌មានពីនគរបាលបានប្រាប់ឱ្យដឹងបន្តថា នៅពេលដែលជនសង្ស័យឡើងជិះលើម៉ូតូកង់បីឥណ្ឌារបស់ជនរងគ្រោះរួចហើយ ជនសង្ស័យធ្វើជានិយាយរដឺនៗប្រាប់ទៅបុរសរងគ្រោះថា ខ្លួនជាជនជាតិថៃ ទើបមកដល់ស្រុកខ្មែរ ហើយត្រូវស្ត្រីជនជាតិខ្មែរម្នាក់លួចយកលុយអស់ចំនួន៣០០ដុល្លារ និង ទូរស័ព្ទមួយគ្រឿងទៀតតម្លៃ១២០០ដុល្លារអស់ពីខ្លួន និងសុំខ្ចីទូរស័ព្ទដៃរបស់បុរសរងគ្រោះនិយាយជាភាសាថៃទៅអ្នកផ្សេងផងដែរ។
តាមប្រភពព័ត៌មានពីនគរបាលបានប្រាប់ឱ្យដឹងបន្តថា ពេលនោះជនសង្ស័យក៏បានប្រាប់ជនរងគ្រោះឱ្យជូនខ្លួនទៅបើកលុយនៅណាហ្គាវិញ ដោយសារតែលុយទាល់តែម៉ោង១២យប់ទើបគេផ្ញើមកអោយ និងបើកនៅទីនោះតែម្តង ។ លុះមកដល់ណាហ្គា ទាំង២នាក់ក៏បានឡើងទៅខាងលើ ដោយជនសង្ស័យបានខ្ចីលុយជនរងគ្រោះចំនួន២០ម៉ឺនរៀលបន្ថែមទៀតទុកសំរាប់បង់ថ្លៃសេវាធនាគារ ។ ក្រោយពីខ្ចីទូរស័ព្ទមួយគ្រឿងសំរាប់ទាក់ទងក្នុងការផ្ញើលុយ និងខ្ចីលុយចំនួន២០ម៉ឺនរៀលបានហើយ ជនសង្ស័យក៏បានប្រាប់ឱ្យបុរសរងគ្រោះចុះទៅមើលម៉ូតូកង់បីឥណ្ឌាដែលចតទុកចោលនៅខាងក្រោម ហើយនៅពេលត្រឡប់ទៅវិញ ចាំគេប្រាប់អោយដឹកទៅផ្ទះសំណាក់វិញ ។
តាមប្រភពព័ត៌មានពីនគរបាលបានប្រាប់ឱ្យដឹងបន្តទៀតថា លុះព្រឹកឡើងដោយមានការសង្ស័យថាចាញ់បោកគេអស់ទាំងទូរស័ព្ទមួយគ្រឿង និងលុយចំនួន២០ម៉ឺនរៀល និងដឹកទៅមកអស់មួយយប់ទល់ភ្លឺទៀតនោះ ទើបជនរងគ្រោះមកប្តឹងនគរបាលប៉ុស្តិ៍ទន្លេបាសាក់អោយចាប់ឃាត់ខ្លួនជនសង្ស័យយកមកធ្វើការសាកសួរតែម្តង ។
ក្រោយពេលឃាត់ខ្លួនដើម្បីសាកសួរ ជនសង្ស័យបានឆ្លើយសារភាពថា ទូរស័ព្ទមួយគ្រឿងនោះគឺខ្លួនយកទៅបញ្ចាំបានលុយចំនួន១០០ដុល្លារ ចំណែកលុយចំនួន២០ម៉ឺនរៀលទៀតក៏យកទៅលេងល្បែងចាញ់អស់ហើយដែរ ។ បន្ទាប់មក សមត្ថកិច្ចបានបញ្ជូនជនសង្ស័យទៅកាន់អធិការដ្ឋាននគរបាលខណ្ឌចំការមន ដើម្បីចាត់ការទៅតាមផ្លូវច្បាប់ជាបន្តទៅទៀត ៕ (កែសម្រួលដោយ ៖ ធីតា)
ចែករំលែកព័តមាននេះ