រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាឲ្យបិទអាជីវកម្មល្បែងភ្នាល់តាមម៉ាស៊ីនប្រព័ន្ធអេឡិចត្រូនិចអនឡាញទាំងក្នុងប្រទេស និងក្រៅប្រទេសទាំងអស់ត្រឹមឆ្នាំ២០១៩នេះ ។ យោងតាមសេចក្តីប្រកាសលទ្ធផលនៃកិច្ចប្រជុំគណៈរដ្ឋមន្ត្រី កាលពីថ្ងៃទី៣០…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានបញ្ជាឲ្យបិទអាជីវកម្មល្បែងភ្នាល់តាមម៉ាស៊ីនប្រព័ន្ធអេឡិចត្រូនិចអនឡាញទាំងក្នុងប្រទេស និងក្រៅប្រទេសទាំងអស់ត្រឹមឆ្នាំ២០១៩នេះ ។ យោងតាមសេចក្តីប្រកាសលទ្ធផលនៃកិច្ចប្រជុំគណៈរដ្ឋមន្ត្រី កាលពីថ្ងៃទី៣០ សីហា ។
ដោយសម្តេចតេជោ ហ៊ុន សែននាយករដ្ឋមន្ត្រីបានបញ្ជាក់យ៉ាងដូច្នេះថា រាល់អាជីវកម្មល្បែងភ្នាល់តាមម៉ាស៊ីនអេឡិចត្រូនិកតាមរយៈអ៊ិនធើណេតអនឡាញក្នុង និងក្រៅប្រទេស និងគ្រប់រូបភាពនៅក្នុងព្រះរាជាណាចក្រកម្ពុជា គឺជាអំពើខុសច្បាប់ និងត្រូវបញ្ឈប់សកម្មភាពអាជីវកម្មទាំងនេះឱ្យអស់នៅដំណាច់ឆ្នាំ២០១៩នេះ ។
សម្ដេចតេជោក៏បានបញ្ជាក់ផងដែរថា ប្រទេសកម្ពុជាត្រូវអភិវឌ្ឍសេដ្ឋកិច្ចដោយឈរលើមូល ដ្ឋាននៃសេវាទេសចរណ៍វប្បធម៌ និងធម្មជាតិ ជាជាងការពឹងផ្អែកលើចំណូលពីអាជីវកម្មល្បែងភ្នាល់អនឡាញ ។ ជាមួយគ្នានោះដែរ សម្តេចក៏បញ្ជាក់ទៅកាន់អង្គប្រជុំថា មិនឱ្យកងកម្លាំងប្រដាប់អាវុធទាំងអស់របស់កម្ពុជាដែលរួមមានកងយោធពលខេមរភូមិន្ទ នគរបាល និងកងរាជអាវុធហត្ថមានងារជា «ឧកញ៉ា» តទៅទៀតនោះឡើយ ។ សម្ដេចតេជោបានបញ្ជាឱ្យកងកម្លាំងប្រដាប់អាវុធណាដែលមានងារជា «ឧកញ៉ា» ត្រូវសម្រេចចិត្តជាបន្ទាន់ជ្រើសរើសយកតែមួយរវាងងារជា «ឧកញ៉ា» ឬតួនាទីក្នុងក្របខណ្ឌជាកងកម្លាំងប្រដាប់អាវុធ ។
សម្តេចក៏លើកឡើងថា រាជរដ្ឋាភិបាលនឹងបន្តពង្រឹងការធ្វើទំនើបកម្មប្រព័ន្ធបច្ចេកវិទ្យាព័ត៌មានវិទ្យាក្នុងការផ្ដល់សេវាសាធារណៈ ដើម្បីជាផ្នែកមួយក្នុងការចូលរួមប្រយុទ្ធប្រឆាំងអំពើពុករលួយនៅកម្ពុជាផងដែរ ។
សូមជម្រាបថា ការបញ្ជារបស់ប្រមុខរាជរដ្ឋាភិបាលបន្ទាប់សមត្ថកិច្ចបានបង្ក្រាបបទល្មើសតាមប្រព័ន្ធបច្ចេកវិទ្យាជាបន្តបន្ទាប់ ក្នុងនោះគេសង្កេតឃើញថា ជនជាតិចិនភាគីច្រើនត្រូវបានសមត្ថកិច្ចតាមបាន ហើយត្រូវបញ្ជូនទៅស្រុកកំណើតវិញ ។ ទាក់ទងនិងល្បែងភ្នាល់នេះដែរ គេក៏សង្កេតឃើញថា នៅតាមហាងកាហ្វេទាំងនៅជនបទ និងទីក្រុងមានអ្នកភ្នាល់ល្បែងជល់មាន់យ៉ាងច្រើន ដោយក្រោមរូបភាពផឹកកាហ្វេ ៕ កែសម្រួលដោយ ៖ សុឃាក់
ចែករំលែកព័តមាននេះ