ខេត្តកណ្ដាល ៖ សេចក្តីរាយការណ៍បឋមបានឲ្យដឹងថា មានការភ្ញាក់ផ្អើល កាលពីរសៀលថ្ងៃទី៣១ ខែសីហា ដោយមានស្ត្រីម្នាក់ត្រូវបានគេឃើញដេកស្លាប់ក្នុងបន្ទប់លេខ A១០១ ផ្ទះសំណាក់មួយកន្លែង នៅសង្កាត់តាខ្មៅ ក្រុងតាខ្មៅ ខេត្តកណ្តាល ដែលជំហ៊ានដំបូងសមត្ថកិច្ចបានធ្វើការសន្និដ្ឋានថា ជាអំពើអត្តឃាតកម្ម ។
សេចក្តីរាយការណ៍បានបន្តថា ស្ត្រីរងគ្រោះឈ្មោះ មួន ស្រីនឿន អាយុ២៩ឆ្នាំ មុខរបរជាកម្មកររោងចក្រកាត់ដេរ ស្នាក់នៅភូមិលេខ៤ សង្កាត់ស្វាយរលំ ក្រុងតាខ្មៅ ខេត្តកណ្តាល មានស្រុកកំណើត នៅភូមិឱម៉ាល ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង ។ នៅកន្លែងកើតហេតុសមត្តកិច្ចបានរកឃើញវត្ថុតាងរួមមាន ៖ សំបកថ្នាំមួយចំនួន ប្រើអស់ចំនួន៤បន្ទះ សំបកប្រអប់២ និងសំបកថ្នាំ Laroxyl មាន១បន្ទះ ប្រើអស់៣០គ្រាប់ ថ្នាំ MIRAL GINE អស់១៨គ្រាប់ ថ្នាំ TRAVIC អស់៣៩ គ្រាប់ ។
តាមសាក្សីបានរៀបរាប់ប្រាប់សមត្ថកិច្ចថា នៅវេលាម៉ោងជាង២រសៀល ថ្ងៃទី៣១ ខែសីហា ឈ្មោះ ជួន កុសល ភេទប្រុស អាយុ៣៤ឆ្នាំ មុខរបរសន្តិសុខ បានដើរមើលភ្ញៀវតាមបន្ទប់ ព្រោះដល់ម៉ោងសំអាតបន្ទប់ ដើម្បីឲ្យភ្ញៀវបង់លុយបន្តការស្នាក់នៅថ្មីទៀត ។ បន្ទាប់មកសន្តិសុខរូបនោះបានទៅគោះទ្វារបន្ទប់លេខA ១០១ តែភ្ញៀវមិនបើកទ្វារទេ រួចក៏បានដើរទៅយកសោចាក់បន្ទប់នោះ ទើបឃើញភ្ញៀវប្រុសឈ្មោះ យ៉ែម នៅ អាយុ៣២ឆ្នាំ ដើរចុះដើរឡើងក្នុងបន្ទប់ ហើយសន្តិសុខក៏បានសួរនាំ តែគេមិននិយាយស្តីអ្វីទេ ។
សាក្សីជាសន្តិសុខប្រាប់សមត្ថកិច្ចទៀតថា បន្ទាប់មកដោយមានការសង្ស័យគេក៏បានហៅបុគ្គលិកផ្ទះសំណាក់ឲ្យជួយមើលក៏ឃើញជនរងគ្រោះឈ្មោះ មួន ស្រីនឿន ដេកបែកពពុះមាត់នៅលើពូក រួចបានរាយការណ៍ជូនសមត្ថកិច្ចឲ្យចុះទៅពិនិត្យភ្លាម ។
សូមបញ្ជាក់ថា នៅបន្ទប់លេខ A១០១ ខាងប្រុសចូលមកសម្រាកនៅថ្ងៃទី២៩ ខែសីហា ឆ្នាំ២០១៩ វេលាម៉ោង២០និង២០នាទី ហើយសម្រាកបាន១យប់ខាងស្រី(ជនរងគ្រោះ) បានចូលមកសម្រាកនៅថ្ងៃទី៣០ ខែសីហា វេលាម៉ោង១០ព្រឹក លុះដល់ថ្ងៃទី៣១ ខែសីហា ទើបកើតមានហេតុការណ៍ ស្ត្រីម្នាក់ដេកស្លាប់នៅក្នុងបន្ទប់ផ្ទះសំណាក់នោះ ។
ការសន្និដ្ឋានរបស់សមត្ថកិច្ចជំនាញបច្ចេកទេសខេត្តកណ្តាល និងនគរបាលផ្នែកពិនិត្យវិភាគកន្លែងកើតហេតុក្រុងតាខ្មៅ ព្រមទាំងអាជ្ញាធរ និងលោកគ្រូពេទ្យអនុមន្ទីរពេទ្យជ័យជំនះ ថា ជនរងគ្រោះពិតជាបានស្លាប់ ដោយសារការប្រើប្រាស់ថ្នាំហួសកំណត់ ក្នុងគោលបំណងធ្វើអត្តឃាតកម្ម ។
ក្រោយពិនិត្យចប់សព្វគ្រប់សាកសពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ។ ដោយឡែក ឈ្មោះ យ៉ែម នៅ ភេទប្រុស អាយុ៣២ឆ្នាំ ដែលមានស្រុកកំណើត នៅស្រុកកំពង់ត្របែក ខេត្តព្រៃវែង កំពុងសង្គ្រោះបន្ទាន់នៅមន្ទីរ ពេទ្យបង្អែកជ័យជំនះ ក្រុងតាខ្មៅ ។ ករណីខាងលើនេះអ្នកវិភាគកំពុងស្ថិតក្នុងភាពសង្ស័យ ដែលស្ត្រីជាជនរងគ្រោះបានដេកស្លាប់នៅនិងកន្លែង ជាមួយសំបកថ្នាំច្រើនប្រភេទ តាមការសន្និដ្ឋានរបស់សមត្តកិច្ច (ស្លាប់ដោយប្រើថ្នាំលើសកម្រិត) ចំណែកបុរសកំពុងសង្គ្រោះបន្ទាន់ ដូច្នេះករណីអត្តឃាតកម្មនេះនៅមិនទាន់បានដឹងច្បាស់ពីមូលហេតុបណ្តាលមកពីរឿងអ្វីឡើយ ។ ព័ត៌មាននេះនឹងមានផ្សាយជូនបន្តទៀត ។ កែសម្រួលដោយ ៖សុឃាក់
ចែករំលែកព័តមាននេះ