រាជធានីភ្នំពេញ ៖ រថយន្តស៊េរីទំនើបមួយគ្រឿងម៉ាកឡិចស៊ីស ខណៈកំពុងបើកបរធ្វើដំណើរតាមផ្លូវសុខៗ ស្រាប់តែឆ្លងចរន្តអគ្គិសនីបង្កជាអណ្ដាតភ្លើង បណ្តាលឱ្យឆេះរងការខូចខាតមួយកំណាត់មុខ បង្កការភ្ញាក់ផ្អើលដល់ប្រជាពលរដ្ឋចេញមកជួយពន្លត់ ហើយក្នុងករណីឆេះរថយន្តនេះដែរមិនបង្កឲ្យមនុស្សណាម្នាក់រងគ្រោះថ្នាក់នោះឡើយ។
ហេតុការណ៍ខាងលើនេះបង្កការភ្ញាក់ផ្អើលកើតឡើងកាលពីវេលាម៉ោង១១និង១០នាទីយប់ថ្ងៃទី៣១ ខែសីហា ឆ្នាំ២០១៩ នៅតាមបណ្ដោយផ្លូវ១៨២ ម្ដុំលក់ផ្កា ក្បែររបងវត្តព្រះពុទ្ធ ស្ថិតក្នុងសង្កាត់វាលវង់ ខណ្ឌ៧មករា ។
រថយន្តមួយគ្រឿងខាងលើម៉ាកឡិចស៊ីស GS-300 ពណ៌ស ពាក់ស្លាកលេខ ភ្នំពេញ ២AC-០៦៩១ បើកបរដោយនារីម្នាក់ មិនស្គាល់អត្តសញ្ញាណ ។
តាមប្រភពព័ត៌មាននៅកន្លែងកើតហេតុបានអោយដឹងថា មុនពេលកើតហេតុ គេឃើញរថយន្តស៊េរីទំនើបមួយគ្រឿងខាងលើ បើកបរដោយនារីម្នាក់ ធ្វើដំណើរក្នុងទិសដៅពីម្តុំនាងគង្ហីងទៅទិសខាងលិច តាមបណ្តោយផ្លូវលេខ១៨២ លុះមកដល់ចំណុចកើតហេតុខាងលើ ស្រាប់តែមានអណ្ដាតភ្លើងឆេះចេញពីក្នុងគំរបម៉ាស៊ីនរថយន្តផ្នែកខាងមុខយ៉ាងសន្ធោសន្ធៅ បង្កអោយមានការភ្ញាក់ផ្អើលដល់ក្រុមជាងជុសជុលរថយន្តដែលកំពុងញាំអាហារជុំគ្នាក្នុងការ៉ាស់ចេញមកជួយពន្លត់ ។
ក្រោយពេលកើតហេតុ សមត្ថកិច្ចមូលដ្ឋានបានមកដល់កន្លែងកើតហេតុដែរ តែដោយសាររថយន្តដែលឆេះនោះមិនបង្កគ្រោះថ្នាក់ដល់អ្នកផ្សេង ទើបម្ចាស់រថយន្តសុំសមត្ថកិច្ចស្ទូចយករថយន្តទៅជុសជុលដោយខ្លួនឯង៕ (កែសម្រួលដោយ ៖ ធីតា)
ចែករំលែកព័តមាននេះ