រាជធានីភ្នំពេញ ៖ យុវជនម្នាក់លោតពីលើអគារជាន់ទី៤នៃមន្ទីរពេទ្យមិត្តភាពខ្មែរ-សូវៀត បណ្ដាលឲ្យស្លាប់ភ្លាមៗនៅនឹងកន្លែងកើតហេតុ ហើយត្រូវបានគេសង្ស័យថាជនរងគ្រោះតូចចិត្តមានជំងឺព្យាបាលមិនជា ទើបសំរេចចិត្តធ្វើអត្តឃាតសម្លាប់ខ្លួនបែបនេះ ។ ហេតុការណ៍ខាងលើនេះបង្កឱ្យមានការភ្ញាក់ផ្អើលកាលពីវេលាម៉ោង៤និង៣០នាទីទៀបភ្លឺថ្ងៃទី៣១ ខែ សីហា…
រាជធានីភ្នំពេញ ៖ យុវជនម្នាក់លោតពីលើអគារជាន់ទី៤នៃមន្ទីរពេទ្យមិត្តភាពខ្មែរ-សូវៀត បណ្ដាលឲ្យស្លាប់ភ្លាមៗនៅនឹងកន្លែងកើតហេតុ ហើយត្រូវបានគេសង្ស័យថាជនរងគ្រោះតូចចិត្តមានជំងឺព្យាបាលមិនជា ទើបសំរេចចិត្តធ្វើអត្តឃាតសម្លាប់ខ្លួនបែបនេះ ។
ហេតុការណ៍ខាងលើនេះបង្កឱ្យមានការភ្ញាក់ផ្អើលកាលពីវេលាម៉ោង៤និង៣០នាទីទៀបភ្លឺថ្ងៃទី៣១ ខែ សីហា ឆ្នាំ២០១៩ នៅចំណុចអគារជាន់ទី៤នៃមន្ទីរពេទ្យមិត្តភាពខ្មែរ-សូវៀត (ពេទ្យរស្ស៊ី) ស្ថិតនៅភូមិ៣ ក្រុម២០ សង្កាត់ទំនប់ទឹក ខណ្ឌបឹងកេងកង ។
ជនរងគ្រោះដែលស្លាប់ឈ្មោះ ស៊ន ខ្លិន ភេទប្រុស អាយុ២១ឆ្នាំ មុខរបរកសិករ ស្នាក់នៅភូមិគោក ឃុំម្កាក់ ស្រុកសេរីសាភ័ណ្ឌ ខេត្តបន្ទាយមានជ័យ ។
តាមប្រភពពីស្ត្រីឈ្មោះ វង រ៉េន អាយុ៦៤ឆ្នាំ មុខរបរកសិករ ត្រូវជាម្ដាយរបស់ជនរងគ្រោះ បានប្រាប់សមត្ថកិច្ចអោយដឹងថា គាត់បានជិះរថយន្តតាក់ស៊ីតាំងពីខេត្តបន្ទាយមានជ័យមកមន្ទីរពេទ្យរស្ស៊ីដើម្បីនាំកូនប្រុសមកពិនិត្យសុខភាពតាមការណាត់របស់គ្រូពេទ្យ ។ បន្ទាប់មកគ្រូពេទ្យអោយសំរាកនៅបន្ទប់ជំងឺទូទៅក្នុងបន្ទប់លេខ៣៧ គ្រែ៨៩ ជាន់ទី៤ រហូតមកដល់វេលាម៉ោង៤និង៣០នាទីទៀបភ្លឺថ្ងៃទី៣១ សីហា ស្រាប់តែបាត់កូនប្រុសមិនឃើញក្នុងបន្ទប់ លុះពេលគាត់ក្រឡេកមើលនៅខាងមុខបន្ទប់ ស្រាប់តែឃើញកូនប្រុសតោងបង្កាន់ដៃ រួចលោតពីលើអគារចុះមកក្រោម ភ្លាមៗនោះគាត់បានហៅគ្រូពេទ្យអោយជួយសង្គ្រោះកូនប្រុសដែរ តែមិនអាចជួយបានឡើយ គឺកូនប្រុសរបស់គាត់បានផុតដង្ហើមស្លាប់បាត់ទៅហើយ ។
តាមប្រភពពីស្ត្រីជាម្ដាយបានអាះអាងថា ករណីខាងលើមិនជាប់ពាក់ព័ន្ធទៅនឹងបុគ្គលណាម្នាក់នោះទេ គឺកូនប្រុសរបស់គាត់បានលោតពីលើអគារសម្លាប់ខ្លួនដោយខ្លួនឯង ហើយគ្រាន់តែអោយសមត្ថកិច្ចដឹងឮ និងធ្វើលិខិតស្នាម ដើម្បីដឹកសពតាមរថយន្តយកទៅស្រុកកំណើតវិញ ។
ក្រោយពេលកើតហេតុ នរគបាលផ្នែកបច្ចេកទេសកោសល្យវិច្ឆ័យស្នងការរាជធានីភ្នំពេញរួមសហការជាមួយកម្លាំងព្រហ្មទណ្ឌ និងនគរបាលខណ្ឌ ដោយមានលោកគ្រូពេទ្យអមសាលាដំបូងមកពិនិត្យសព និងរកឃើញនៅលើដងខ្លួនជនរងគ្រោះ មានស្នាមរបួសបាក់ថ្គាមខាងស្ដាំ ដោយសារជនរងគ្រោះលោតចុះមកបោកនឹងថ្ម ហើយដាច់សរសៃឈាមបណ្តាលឱ្យស្លាប់មួយរំពេចតែម្ដង ។ បើយោងតាមស្ត្រីជាម្ដាយបានបញ្ជាក់ថា កូនប្រុសរបស់គាត់មានជំងឺរ៉ាំរ៉ៃដុះសាច់បំពង់កធ្ងន់ធ្ងរ (សង្ស័យមហារីក) ព្យាបាលមិនជា ហើយសង្ស័យតូចចិត្ត ទើបសំរេចចិត្តបញ្ចប់ជីវិតបែបនេះ ។
បន្ទាប់ពីពិនិត្យរួច សមត្ថកិច្ចបានប្រគល់សពអោយក្រុមគ្រួសារដឹកយកទៅធ្វើបុណ្យតាមប្រពៃណីនៅឯស្រុកកំណើត ៕ (កែសម្រួលដោយ ៖ ធីតា)
ចែករំលែកព័តមាននេះ