ខេត្តព្រះវិហារ ៖ រថយន្តពេទ្យមួយគ្រឿងប្រចាំមណ្ឌលសុខភាពស្រឯម ស្រុកជាំក្សាន្តខេត្តព្រះវិហារ បានឆ្លងចរន្តអគ្គិសនីឆាបឆេះយ៉ាងសន្ធោសន្ធៅ កាលពីវេលាម៉ោង១២និង៥៤នាទីថ្ងៃត្រង់ទី៣០ សីហា ខណៈ កំពុងដឹកអ្នកជំងឺពីចំណុចឃុំស្រឯម ឆ្ពោះទៅកាន់ខេត្តសៀមរាប តែសំណាងល្អនៅក្នុងរថយន្តពេទ្យពុំមាននរណាម្នាក់រងគ្រោះថ្នាក់ឡើយ ។
តាមការបញ្ជាក់ពីលោកវសេនីយ៍ឯក ឡាញ់ លី ស៊ីវឡេង អធិការដ្ឋាននគរបាលស្រុកគូលែនបានប្រាប់អ្នកសារព័ត៌មានថា យោងតាមការបញ្ជាក់ពីអ្នកបើកបរខាងលើថា រថយន្តពេទ្យដឹកអ្នកជំងឺដែលរងការខូចខាតដោយឆ្លងចរន្តអគ្គិសនីឆាបឆេះនេះ បានចេញដំណើរពីឃុំស្រឯម ឆ្លងកាត់ ស្រុកគូលែន ឆ្ពោះទៅកាន់ខេត្តសៀមរាប ។ លុះរហូតមកដល់ជិតចំណុចអូរដូនស្ងួន ស្ថិតក្នុងភូមិសាស្ត្រ ស្រុកគូលែន ខេត្តព្រះវិហារ ស្រាប់តែរថយន្តពេទ្យនេះ មានសភាពហុយផ្សែងចេញពីដំបូលឡានខាងមុខ ។
លោកបន្តថា ភ្លាមៗនោះអ្នក បើកបររថយន្តពេទ្យ បានសម្រេចចិត្តឱ្យយអ្នករួមដំណើរក្នុងរថយន្ត និងអ្នកជំងឺចេញរកកន្លែងសុវត្ថិភាពភ្លាម ។ ប៉ុន្មាននាទីក្រោយមក រថយន្តចាប់ផ្តើមទុស្សេចរន្តឆាបឆេះខ្លាំងតែ
ម្តង ។ លោកអធិការបញ្ជាក់ថា ក្រោយទទួលដំណឹងភ្លាម សមត្ថកិច្ចបានអន្តរាគមន៍យកឡានទឹកទៅជួយ ពន្លត់ភ្លាមៗ តែទោះជាបែបនេះក្តី ដោយសារភ្លើងឆាបឆេះលឿនពេក ធ្វើឲ្យរថយន្តពេទ្យនេះឆេះខូចខាតប្រមាណ៦០%ទៅហើយ ។
លោកអធិការបានបន្ថែមថា ចំពោះអ្នកជំងឺដែលត្រូវយកទៅសង្គ្រោះនៅខេត្តសៀមរាប ត្រូវបានអភិបាលខេត្តព្រះវិហារ បញ្ជាឲ្យរថយន្តសង្គ្រោះរបស់មណ្ឌលសុខភាពស្រុកគូលែន ជួយអន្តរាគមន៍ដឹកអ្នកជំងឺមកកាន់មន្ទីរពេទ្យបង្អែក១៦ មករា ក្រុងព្រះវិហារវិញ ។ (សម្រួលដោយ៖ ស្រីណា)
ចែករំលែកព័តមាននេះ