រាជធានីភ្នំពេញ ៖ ក្រសួងការងារនិងបណ្ដុះបណ្ដាលវិជ្ជាជីវៈ កាលពីថ្ងៃទី២៨ ខែសីហា បានប្រកាសហាមឃាត់ជនបរទេសដែលកំពុងមានវត្តមាននៅក្នុងប្រទេសកម្ពុជា មិនឱ្យប្រកបមុខរបរនិងធ្វើការងារលើវិស័យសេដ្ឋកិច្ចក្រៅប្រព័ន្ធចំនួន១០ ។ ប៉ុន្តែសមាគមសេដ្ឋកិច្ចក្រៅប្រព័ន្ធមើលឃើញថា ការហាមឃាត់ជន
បរទេសមិនឱ្យប្រកបមុខរបរចំនួន១០នោះ គឺនៅមិនគ្រប់គ្រាន់នៅឡើយទេ ។
ប្រភេទមុខរបរទាំង១០ ដែលក្រសួងការងារហាមឃាត់សម្រាប់ជនបរទេសនោះរួមមាន ៖
១-ការងារជាអ្នកបើកបរយានជំនិះគ្រប់ប្រភេទ
២-អ្នកលក់ដូរដោយមធ្យោបាយថ្មើរជើង ឬតាមរយៈយានជំនិះគ្រប់ប្រភេទតាមទីសាធារណៈ
៣-អ្នកកាត់សក់ អ៊ុតសក់ និងថែរក្សាសម្ផស្ស
៤-អ្នកម៉ាស្សា និងចាប់សរសៃ
៥-អ្នកផ្ដល់សេវាកម្មកាត់ដេរ និងសម្អាតស្បែកជើង
៦-អ្នកប៉ះកង់ ជាងជួសជុលយានយន្ត
៧-អ្នកផលិតវត្ថុអនុស្សាវរីយ៍ខ្មែរ អ្នកផលិតឧបករណ៍ភ្លេងខ្មែរ
៨-បាត្រលោក ព្រះពុទ្ធរូប
៩-ជាងកាត់ដេរសម្លៀកបំពាក់ និង១០-ជាងទង ជាងច្នៃត្បូងពេជ្រជាដើម ។
សេចក្ដីសម្រេចដែលចុះហត្ថលេខាដោយរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានធ្វើការហាមឃាត់ជនបរទេសទាំងឡាយ មិនឲ្យធ្វើសកម្មភាពចំពោះប្រភេទមុខរបរស្វ័យនិយោជន៍ចំនួន១០នៅក្នុងប្រទេសកម្ពុជា ។ មុខរបរស្វ័យនិយោជន៍គឺ សំដៅទៅលើការងារ ឬមុខរបរទាំងឡាយណាដែលផ្ដល់ផលក្នុងការបង្កើនចំណូលផ្ទាល់ខ្លួន មិនពាក់ព័ន្ធនឹងប្រាក់ឈ្នួលឬប្រាក់បៀវត្សរ៍ដែលផ្ដល់ដោយនិយោជក ឬរដ្ឋ តាមរយៈកិច្ចសន្យាការងារ ។
សូមបញ្ជាក់ថា ការចេញបម្រាមដល់ជនបទេសមិនឲ្យប្រកបមុខរបរទាំង១០មុខនេះ គឺធ្វើឡើងបន្ទាប់ពីមានការកត់សម្គាល់ថា មានជនបរទេសកាន់តែច្រើនឡើងៗ ជាពិសេសជនជាតិចិន បានបង្ហាញវត្តមាននៅក្នុងប្រទេសកម្ពុជា ហើយបង្កើតមុខរបរផ្ទាល់ខ្លួនជាច្រើន ដោយមិនរើសមុខ ។ ទាំងនេះគឺជាការបារម្ភមួយរបស់ពលរដ្ឋខ្មែរដែលប្រកបមុខរបរសេដ្ឋកិច្ចក្រៅប្រព័ន្ធ ពីការក្រសោបយកដោយជនបរទេសនូវមុខរបរនិងការងារពីពលរដ្ឋខ្មែរ ៕
ចែករំលែកព័តមាននេះ