បុរសម្នាក់នៅភាគកណ្តាលប្រទេសចិនបានដឹងខ្លួនឡើងវិញបន្ទាប់ពីចំណាយពេលសន្លប់អស់រយៈពេល ៥ ឆ្នាំដោយអរគុណដល់ភរិយារបស់គាតដែលបានលះបង់ពេលវេលាដើម្បីមើលថែរយៈពេលជាង ២០ ម៉ោងក្នុងមួយថ្ងៃ ។
លោក Li Zhihua ដែលរស់នៅក្នុងតំបន់ Xiangyang ខេត្ត Hubei បានជិះម៉ូតូ Scooter ទៅធ្វើការស្រាប់តែមានម៉ូតូមួយគ្រឿងទៀតមកបុកគាត់កាលពីខែសីហា ឆ្នាំ ២០១៣ ។ ដោយរងរបួសខួរក្បាលធ្ងន់ធ្ងរលោក Li Zhihua បានសន្លប់ហើយដែលគ្រូពេទ្យខ្លះជឿថាអាចមានសភាពបែបនេះជារៀងរហូត ។
អស់រយៈពេលជិត ២០០០ថ្ងៃលោកស្រី Zhang បានចំណាយពេលជាង ២០ម៉ោងក្នុងមួយថ្ងៃដើម្បីមើលថែប្តី ដោយជជែកលេងជាមួយគាត់ និងលេងភ្លេងដែលគាត់ចូលចិត្ត ក្រៅពីនេះបញ្ចុកអាហារ និងថែរក្សាអនាម័យ ។
លោកស្រី Zhang ដេកបានតែពីរម៉ោងប៉ុណ្ណោះក្នុងមួយថ្ងៃដោយធានាថាស្វាមីរបស់លោកស្រីមានអារម្មណ៍ថាមានវត្តមានរបស់នាងស្ទើរតែគ្រប់ពេលនៅជាមួយ ។ ជាលទ្ធផលស្ត្រីអាយុ ៥៧ឆ្នាំរូបនេះបានស្រកទម្ងន់អស់ ១០គីឡូក្រាម ហើយទោះបីជាយ៉ាងណាក៏ដោយវាមិនបានធ្វើឱ្យលោកស្រីខ្វល់ខ្វាយទាល់តែសោះ។ លោក Li បានធ្វើឱ្យភរិយារបស់លោកមានអារម្មណ៍អស្ចារ្យកាលពីឆ្នាំមុន ប៉ុន្តែថ្មីៗនេះសារព័ត៌មានចិនបានចាប់ផ្តើមរាយការណ៍អំពីរឿងរបស់គាត់ ។
យោងទៅតាមគេហទំព័រ Btime.com រឿងដំបូងដែលលោក Li បាននិយាយបន្ទាប់ពីភ្ញាក់ដឹងខ្លូនគឺ «ខ្ញុំស្រឡាញ់អ្នក» ។ ខណៈពេលដែលលោក Li ដឹងខ្លូនឡើងវិញនេះ គឺស្ថិតនៅក្នុងមន្ទីរពេទ្យនៅឡើយដើម្បីព្យាបាលការស្តារនីតិសម្បទា ។ វីដេអូពី Pear Video បង្ហាញពីលោកស្រី Zhang ជួយប្តីរបស់គាត់នៅពេលដើរដោយមានជំនួយពីរបស់សម្រាប់ទប់ខ្លួន ។
លោកស្រី Zhang និយាយថា «ខ្ញុំមិនដែលគិតអំពីការលះបង់ឡើយ ។ ដរាបណាគាត់នៅរស់ខ្ញុំនឹងបន្តបម្រើគាត់» ។ រឿងរ៉ាវរបស់ស្វាមីភរិយាមួយគូនេះបានធ្វើឱ្យមានការចាប់អារម្មណ៍យ៉ាងខ្លាំងនៅលើបណ្តាញសង្គមចិនដោយពួកគេជាច្រើនសង្ឃឹមថាលោក Li នឹងបានជាសះស្បើយ និងសរសើរពីការលះបង់របស់លោកស្រី Zhang ។
អ្នកប្រើប្រាស់ Weibo មួយចំនួនបានបញ្ចេញមតិថា៖ «ដំបូង គឺសេចក្តីស្រឡាញ់ពិត», «ស្ត្រីបែបនេះពិបាករកណាស់», «ស្ត្រីគួរឱ្យគោរព! ខ្ញុំសូមជូនពរឱ្យនាងមានសុខភាពល្អបំផុត» អ្នកខ្លះថា «នេះគឺជាស្នេហា រំជួលចិត្តខ្លាំងណាស់ ខ្ញុំសង្ឃឹមថាលោក Li នឹងជាសះស្បើយឆាប់ៗនេះ» ៕
ប្រភព៖ Nextshark , កែសម្រួលដោយ ៖ សំណាង
ចែករំលែកព័តមាននេះ