ខេត្តកំពង់ធំ ៖ មានករណីគ្រោះថ្នាក់ចរាចរណ៍រវាងម៉ូតូមួយគ្រឿងបុកជាមួយម៉ូតូសណ្តោងរ៉ឺម៉កមួយគ្រឿងមានដឹកកូនឈើ បណ្តាលឱ្យបុរស២នាក់ស្លាប់នៅនឹងកន្លែងកើតហេតុ ។
ហេតុការណ៍ខាងលើនេះបានកើតឡើងកាលពីវេលាម៉ោង៩យប់ថ្ងៃទី២៩ ខែសីហា ឆ្នាំ២០១៩ នៅលើកំណាត់ផ្លូវជាតិលេខ៦ ចន្លោះគីឡូម៉ែត្រលេខ៩៦-៩៧ ចំណុចវាលសរសៃស្ថិតក្នុងភូមិសូយោង ឃុំសូយោង ស្រុកតាំងគោក ខេត្តកំពង់ធំ ។
ភាគីខាងម៉ូតូមួយគ្រឿងម៉ាកហុងដាឌ្រីម ធុនC125 ពណ៌ខ្មៅ គ្មានផ្លាកលេខ មានសណ្តោងរ៉ឺម៉កដឹកកូនឈើ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ក្រោយកើតហេតុ ។ ចំណែកម៉ូតូមួយគ្រឿងទទៀតជិះគ្នា២នាក់ ម៉ាកពិស៊ិនធ័រ បើកបរដោយឈ្មោះ វង់ វី ភេទប្រុសអាយុ៣៧ឆ្នាំ រស់នៅភូមិអូរតាសុខ ឃុំពេជ្រចិន្ថា ស្រុកភ្នំព្រឹក ខេត្តបាត់ដំបង បានស្លាប់នៅកន្លែងកើតហេតុ និងអ្នករួមដំណើរម្នាក់ឈ្មោះ យន
អួក ភេទប្រុស អាយុ៥៧ឆ្នាំ នៅភូមិរមាំងងាប់ ឃុំទំពាំងឬស្សី ស្រុកសន្ទុក ខេត្តកំពង់ធំ បានស្លាប់នៅមន្ទីរពេទ្យបង្អែកបារាយណ៍-សន្ទុក។
លោកវរសេនីយ៍ទោ សន តាល់ អធិការនគរបាលស្រុកតាំងគោកប្រាប់ថា មុនកើតហេតុ ម៉ូតូសណ្តោងរ៉ឺម៉កមួយគ្រឿងមានដឹកកូនឈើហើយគ្មានភ្លើងបំភ្លឺក្រោយ បានធ្វើដំណើរក្នុង ទិសគ្នាពីជើងទៅត្បូង លុះមកដល់ចំណុចកើតហេតុខាងលើ ស្រាប់តែមានម៉ូតូមួយគ្រឿងជិះគ្នា២នាក់បើកបរក្នុងល្បឿនលឿន ធ្វើដំណើរស្របទិសគ្នា បានបុកពីក្រោយរ៉ឺម៉កម៉ូតូ បណ្តាលឲ្យស្លាប់អ្នកបើកបរម៉ូតូម្នាក់នៅនឹងកន្លែងកើតហេតុ ចំណែកអ្នករួមដំណើរម្នាក់ទៀតបានស្លាប់នៅមន្ទីរពេទ្យ រីឯអ្នកបើកបររ៉ឺម៉កម៉ូតូបានរត់គេចខ្លួនបាត់ ។
ក្រោយពេលកើតហេតុ សពជនរងគ្រោះឈ្មោះវង់ វី ត្រូវបានយកមកតម្កល់ទុកនៅវត្តខ្លុយ ភូមិខ្លុយ ឃុំសូយោង ស្រុកតាំងគោក ដើម្បីរង់ចាំសាច់ញាតិមកទទួលយកទៅធ្វើបុណ្យតាមប្រពៃណី ចំណែករ៉ឺម៉កនិងកូនឈើត្រូវបានផ្ញើទុកនៅផ្ទះប្រជាពលរដ្ឋក្បែរកន្លែងកើតហេតុ រីឯម៉ូតូពីរគ្រឿងត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកតាំងគោក ៕ (កែសម្រួលដោយ ៖ ធីតា)
ចែករំលែកព័តមាននេះ