អេសស៊ីជី ចែករំលែកក្តីសុបិន ជាកម្មវិធីដែលជួយដល់កម្ពុជា ក្នុងការអភិវឌ្ឍន៍ធនធានមនុស្ស និងបង្កើនឱកាស ដើម្បីទទួលបានការអប់រំ ដោយផ្តល់អាហារូបករណ៍ដល់ថ្នាក់់វិទ្យាល័យ និងថ្នាក់មហាវិទ្យាល័យ។ មានសិស្សជាច្រើនរូបដែលទទួលបានជោគជ័យក្នុងការសិក្សា បន្ទាប់ពីទទួលបានអាហារូបករណ៍ពីក្មវិធីនេះ។
ឆន សុខអាយ ជានិស្សិតអាហារូបករណ៍ អេសស៊ីជី ទទួលបានឱកាសច្រើនក្នុងវិស័យអប់រំ បន្ទាប់ពីទទួលបានអាហារូបករណ៍ ហើយប្អូនស្រីបានចែករំលែកបទពិសោធន៍ផ្ទាល់ខ្លួនថា តើអាហារូបករណ៍នេះបានធ្វើឱ្យជីវិតប្អូនស្រីមានភាពល្អប្រសើរដូចម្តេចខ្លះ?
«នាងខ្ញុំឈ្មោះ ឆន សុខអាយ ជានិស្សិតឆ្នាំទី៣ ជំនាញវេជ្ជបណ្ឌិតនៅសាកលវិទ្យាល័យន័រតុន។ ខ្ញុំពិតជាសប្បាយចិត្តខ្លាំងណាស់ដែលអាចក្លាយជានិស្សិតបញ្ញវន្តមួយរូបក្នុងថ្ងៃនេះ ពីព្រោះកាលពីប្រាំឆ្នាំមុនខ្ញុំមិនគិតថា ខ្ញុំអាចមានឱកាសអាចបន្តការសិក្សាមកដល់ថ្ងៃនេះទេ។ ដោយស្ថិតក្នុងស្ថានភាពលំបាកខ្ញុំមានឱកាសតិចបំផុត ដើម្បីទទួលបានការអប់រំឱ្យបានទូលំទូលាយ នេះក៏ដោយសារតែខ្ញុំមកពីគ្រួសារក្រីក្រ ប៉ុន្តែខ្ញុំជឿជាក់លើក្តីសុបិនរបស់ខ្ញុំ ហើយទោះបីជាយ៉ាងណាក៏ខ្ញុំត្រូវសម្រេចក្តីសុបិនរបស់ខ្ញុំឱ្យបាន។
តាមរយៈកម្មវិធី អេសស៊ីជី ចែករំលែកក្តីសុបិននេះ ក្តីសុបិនរបស់ខ្ញុំបានក្លាយជាកាពិត។ ខ្ញុំបានជាប់អាហារូបករណ៍នេះតាំងពីខ្ញុំរៀននៅវិទ្យាល័យ ដែលជួយឱ្យខ្ញុំអាចផ្តោតអារម្មណ៍លើការសិក្សាបានកាន់តែខ្លាំង។ វាជាស្ពានជួយចម្លងខ្ញុំទៅកាន់ភាពជោគជ័យ។ អាហារូបករណ៍នេះ បានជួយឱ្យខ្ញុំអាចបន្តការសិក្សាជំនាញ វេជ្ជបណ្ឌិត នៅសាកលវិទ្យាល័យន័រតុន។ ខ្ញុំសង្ឃឹមថា ថ្ងៃណាមួយខ្ញុំអាចជួយខ្លួនឯង ក្រុមគ្រួសារ និងសង្គមរបស់ខ្ញុំឱ្យមានជីវិតកាន់តែប្រសើរ។ កម្មវិធី អេសស៊ីជី ចែករំលែកក្តីសុបិន បាននិងកំពុងធ្វើឱ្យក្តីសុបិនរបស់ខ្ញុំក្លាយជាការពិត និងឈានទៅរកភាពជោគជ័យដែលលើសពីក្តីសុបិនទៅទៀត»។
មិនត្រឹមតែអាហារូបករណ៍សម្រាប់ជំនាញវេជ្ជបណ្ឌិតប៉ុណ្ណោះទេ ប៉ុន្តែ អេស៊ីជី ដែលជាក្រុមហ៊ុនឈានមុខគេក្នុងតំបន់ ដឹងថា ធនធានមនុស្ស គឺជាគន្លឹះនៃការអភិវឌ្ឍន៍ប្រកបដោយនិរន្តរភាព បានផ្តល់អាហារូបករណ៍ដល់សិស្ស និងនិស្សិតសម្រាប់ជំនាញផ្សេងៗជាច្រើនទៀតដូចជា ជំនាញសង្គម ភាសា ទំនាក់ទំនងអន្តរជាតិ វិស្វកម្ម និងជំនាញផ្សេងៗទៀត។ ហើយនេះជានិស្សិតអាហារូបករណ៍ អេសស៊ីជី ម្នាក់ទៀតដែលកំពុងសិក្សាជំនាញវិស្វកម្មសំណង់ស៊ីវិល។
«ខ្ញុំបាទឈ្មោះ ខាន់ សំណាង ជានិស្សិតឆ្នាំទី ៣ ជំនាញវិស្វកម្មសំណង់ស៊ីវិល នៅសាកលវិទ្យាល័យន័រតុន។ ខ្ញុំពិតជាមានមោទនភាពចំពោះខ្លួនឯងណាស់ដែលអាចឈានមកដល់ចំណុចនេះ ទោះបីជាខ្ញុំមកពីគ្រួសារក្រីក្រដែលមិនសូវមានឱកាសក្នុងការសិក្សាក៏ដោយ។ មុននឹងជាប់អាហារូបករណ៍ អេសស៊ីជី ចែករំលែកក្តីសុបិននេះ ខ្ញុំមិនមានអ្វីទាំងអស់ ប៉ុន្តែខ្ញុំមានកម្លាំងចិត្តសម្រាប់ខ្លួនខ្ញុំ ហើយខ្ញុំមានគំនិត សុទិដ្ឋិនិយមថា ការខិតខំប្រឹងប្រែងរបស់ខ្ញុំអាចយកឈ្នះនូវភាពលំបាកក្នុងជីវិតរបស់ខ្ញុំ។ មុននឹងខ្ញុំដាក់ពាក្យស្នើសុំអាហារូបករណ៍នេះ វីដេអូរបស់អាហារូបករណ៍ អេសស៊ីជី ចែករំលែកក្តីសុបិន បានធ្វើឱ្យខ្ញុំកាន់តែមានកម្លាំងចិត្ត។
បុគ្គលិក អេសស៊ីជី បានទៅសួរសុខទុក្ខដល់សាលា និងផ្ទះរបស់ខ្ញុំ មុននឹងផ្តល់អាហារូបករណ៍ខ្ញុំ ដែលវាបញ្ជាក់ឱ្យឃើញពីការស្រលាញ់ និងការយកចិត្តទុកដាក់ដល់ពួកយើង។ វាបានជំរុញឱ្យខ្ញុំមិនបោះបង់ក្តីសុបិន និងតែងតែរកវិធីជម្នះរាល់ឧបសគ្គ ដើម្បីឈានទៅកាន់ភាពជោគជ័យ។ ព្រោះតែ អេសស៊ីជី តែងតែជួយជ្រុំជ្រែងដល់ខ្ញុំ ដែលជាស្ពានជួយចម្លងខ្ញុំទៅកាន់គោលដៅ»។
នៅខែ តុលា នេះ ជាឆ្នាំទី ៣ សម្រាប់កម្មវិធី អេសស៊ីជី ចែករំលែក្តីសុបិន។ ចាប់តាំងពីការបង្កើតកម្មវិធីនេះមក អេសស៊ីជី បានផ្តល់អាហារូបករណ៍លើសពី ១០០០ នាក់ សម្រាប់ថ្នាក់វិទ្យាល័យ និងមហាវិទ្យាល័យ ហើយយើងក៏នៅតែបន្តធ្វើវា ក៏ដូចជាបន្តជួយសហគមន៍ក្នុងតំបន់កាន់តែច្រើនបន្ថែមទៀត ក្នុងគោលបំណង ដើម្បីជួយដល់យុវជនកម្ពុជា ឱ្យមានឱកាសក្នុងការទទួលការអប់រំទូលំទូលាយ និងទទួលបានអនាគតដ៏ល្អប្រសើរ។ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ