រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបញ្ជាក់ថា អាជ្ញាធរនឹងចាត់វិធានការចំពោះការប្រមូលផ្តុំរបស់កម្លាំងសកម្មជនអតីតគណបក្សប្រឆាំង ដើម្បីរង់ចាំទទួលលោក សម រង្ស៊ី អតីតប្រធានគណបក្សសង្គ្រោះជាតិ ព្រោះជា អំពើខុសច្បាប់ ។
ការបញ្ជាក់របស់សម្តេចក្រឡាហោម ស ខេង បន្ទាប់ពីសកម្មជនគាំទ្រលោក សម រង្ស៊ី បានត្រៀមប្រមូលផ្តុំគ្នាតាមការអំពាវនាវរបស់លោកសម រង្ស៊ី កាលពេលកន្លងមកនេះដែលថា លោកនឹងវិញចូលស្រុកវិញនៅថ្ងៃទី៩ ខែវិច្ឆិកា ខាងមុខនេះ ។
ក្នុងកិច្ចសម្ភាសន៍ជាមួយអ្នកសារព័ត៌មាន នាព្រឹកថ្ងៃទី២៩ ខែសីហា សម្តេចក្រឡាហោម ស ខេង មានប្រសាសន៍ថា កម្ពុជាជាប្រទេសកាន់លទ្ធិប្រជាធិបតេយ្យ កាលណាសកម្មភាពនយោបាយធ្វើឡើងក្រោមស្លាកគណបក្សនយោបាយដែលស្របច្បាប់គឺជាការត្រឹមត្រូវនិងលើកទឹកចិត្ត ដើម្បីត្រៀមសម្រាប់ការបោះឆ្នោតនៅពេលខាងមុខ ។
សម្តេចក្រឡាហោម ស ខេង បញ្ជាក់ថា ៖ «ការប្រជុំទាំងឡាយណាដែលគណបក្សនយោបាយដែលត្រូវបានរំលាយដោយតុលាការកំពូល គឺជាការប្រជុំមិនត្រឹមត្រូវតាមច្បាប់មិនស្របតាមគោលការណ៍ប្រជាធិបតេយ្យឡើយ ។ បន្ថែមលើនេះ ការប្រជុំគ្នាដើម្បីគាំទ្រចលនាខុសច្បាប់គឺជាការខុសច្បាប់» ។
សម្តេចក្រឡាហោមថ្លែងថា ៖ «ការប្រមូលផ្តុំមហាជន ប្រជាជន ដើម្បីទៅប្រឆាំងផ្តួលរំលំរាជរដ្ឋាភិបាលដែលកើតចេញពីការបោះឆ្នោតក៏ខុសច្បាប់ដែរ ។ រាជរដ្ឋាភិបាលបានកំណត់ហើយគឹត្រូវធានាសុខសន្តិភាព ស្ថិរភាព ហើយធានាលទ្ធិប្រជាធិបតេយ្យនៅកម្ពុជារស់បន្តទៅទៀត» ។ ជាមួយគ្នានេះ សម្តេចក្រឡាហោម ស ខេង ក៏បានអំពាវនាវដល់ប្រជាពលរដ្ឋ សូមកុំធ្វើសកម្មភាពក្នុងបំណងផ្តួលរំលំរាជរដ្ឋាភិបាល និងកម្លាំងអាជ្ញាធរនោះគឺមិនត្រឹមត្រូវទេ ព្រោះវាមិនមែនជាសិទ្ធិស្របតាមច្បាប់ជាធរមានទេ ។
សម្តេចក្រឡាហោមគូសបញ្ជាក់ថា ៖ «គាត់មានបំណង តែបើយើងមិនដោះស្រាយទុកឲ្យប្រទេសក្រឡាប់ចាក់ គឺយើងនិងប្រជាជននឹងមានបញ្ហាគឺអន្តរាយធំ ។ អុីចឹងហើយ អ្នកដែលលើកឡើងថារាជរដ្ឋាភិបាលធ្វើឲ្យមានបញ្ហានេះបញ្ហានោះ តែបើយើងទុកឲ្យធ្វើនោះវានឹងក្រឡាប់ចាត់ ។ យើងកំណត់សន្តិភាព ស្ថិរភាព អ្នកដែលធ្វើខុសច្បាប់ គឺយើងនឹងអនុវត្តហើយ» ។
ការលើកឡើងរបស់សម្តេចក្រឡាហោម សខេង គឺបន្ទាប់ពីអាជ្ញាធរបានបិទរូបថតសកម្មជនរបស់អតីតគណបក្សសង្គ្រោះជាតិដើម្បីតាមចាប់ខ្លួនផងដែរ ។ សូមជម្រាបថា អ្នកនាំពាក្យគណបក្សប្រជាជនកម្ពុជា លោក សុខ ឥសាន ធ្លាប់បញ្ជាក់ថា អាជ្ញាធរបានត្រៀមរួចហើយក្នុងការចាប់ខ្លួនលោក សម រង្ស៊ី ទោះបីជាលោកមកតាមច្រកណាក៏ដោយ ៕
ចែករំលែកព័តមាននេះ