រាជធានីភ្នំពេញ ៖ វិស័យមូលបត្រជាវិស័យថ្មីមួយសម្រាប់ប្រទេសកម្ពុជា និងមិនសូវមានការចាប់អារម្មណ៍ច្រើនពីវិនិយោគិនក្នុងស្រុកប៉ុន្មាននោះទេ ជាក់ស្ដែងរហូតមកដល់ពេលនេះ ក្នុងវិស័យនេះទាំងមូលមានតែក្រុមហ៊ុនចំនួន៦ប៉ុណ្ណោះដែលទទួលបានសិទ្ធធ្វើអាជីវកម្មជាផ្លូវការ ។
តើការវិនិយោគលើវិស័យមូលបត្រផ្ដល់អត្ថប្រយោជន៍អ្វីខ្លះដល់សេដ្ឋកិច្ចកម្ពុជា ? លោក ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា បានមានប្រសាសន៍នៅក្នុងសន្និសីទក្រោយប្រគល់អាជ្ញាប័ណ្ណ គ្រប់គ្រងមូលនិធិ ជូនក្រុមហ៊ុនមួយ កាលពីថ្ងៃទី២៨ ខែសីហា ម្សិលមិញនេះថា វិស័យមូលបត្រចូលរួមចំណែកច្រើននៅក្នុងវិស័យសេដ្ឋកិច្ច ដោយវិស័យមានគោលដៅតែមួយគឺ គៀងគរមូលនិធិដែលនៅសល់ ឬនិយាយអោយចំគឺប្រមូលលុយដែលនៅសល់ ដែលមិនដំណើរការមកដាក់នៅទីផ្សារអោយមានដំណើរការឡើងវិញ ។
លោកបានបន្តថា « មានមនុស្សជាច្រើនមានលុយហើយមិនដឹងយកទៅណាយកទៅនៅក្នុងផ្ទះ តែអ្នកខ្លះដែលមានទំនុកចិត្តលើប្រព័ន្ធធនាគារក៏យកលុយទៅទុកនៅក្នុងធនាគារ ឬមីក្រូហិរញ្ញវត្ថុ ដើម្បីបានការប្រាក់ តែចំពោះសាច់ប្រាក់ដែលទុកនៅក្រៅប្រព័ន្ធធនាគារក្នុងប្រទេសកម្ពុជាមានច្រើនណាស់ ដូច្នេះហើយទើបយើងបង្កើតគណៈកម្មការមូលបត្រនិងចេញអាជ្ញាប័ណ្ណជូនអ្នករកស៊ី ដើម្បីប្រមូលប្រាក់ដែលនៅសល់នោះមកដាក់ក្នុងទីផ្សារអោយមានដំណើរការជំរុញកំណើនសេដ្ឋកិច្ចជាតិឱ្យកាន់តែខ្លាំងឡើងថែមទៀត » ។
អគ្គនាយកនៃគណៈកម្មការមូលបត្រកម្ពុជា បានពន្យល់ថា នៅក្នុងវិស័យមូលបត្រ យើងមានបីផ្នែកសំខាន់ គឺទីផ្សារភាគហ៊ុន, មូលនិធិបំណុល និងមួយទៀតគឺ មូលនិធិរួម ។ ផ្នែកទាំងនេះ គឺមានការជាប់ទាកទងគ្នាវិលជុំ ជាក់ស្ដែង សម្រាប់ទីផ្សារភាគហ៊ុន គឺគេលក់ភាគហ៊ុនដើម្បីយកលុយមកវិនិយោគ ហើយលក់បានអាចមកទិញមូលធិនិបំណុល ដើម្បីទទួលបានការចំណេញបន្ទាប់ ។ ដោយឡែកសម្រាប់មូលធិនិរួមក៏ដូចគ្នាដែរ គឺមានតួនាទីក្នុងការគៀងគររកមូលនិធិនានា មកទិញភាគហ៊ុន ឬមកទិញមូលនិធិបំណុលដែលមានតម្លៃខ្ពស់ ដើម្បីទទួលការចំណេញនៅពេលបន្ទាប់ដូចគ្នា ។ ការធ្វើបែបនេះ គឺជំរុញចរន្តសាច់ប្រាក់ឱ្យមានដំណើរការ និងសកម្ម ហើយបើវាមានដំណើរការកាន់តែខ្លាំង នោះសេដ្ឋកិច្ចយើងក៏កាន់តែរីកចម្រើនខ្លាំងដែរ ។
លោកបានបន្តថា រហូតមកដល់ពេលនេះគណៈកម្មការមូលបត្រកម្ពុជា បានផ្ដល់ការអនុញ្ញាតជូនក្រុមហ៊ុនបត្តិករក្នុងវិស័យមូលបត្រចំនួន៦ហើយ តែមានក្រុមហ៊ុនជាច្រើនបានស្នើរសុំអាជ្ញាប័ណ្ណធ្វើអាជីវកម្ម ក្នុងវិស័យមូលបត្រ ដោយសារតែវាជាវិស័យថ្មី និងផ្ដល់នូវអត្ថប្រយោជន៍ច្រើនដល់សេដ្ឋកិច្ចកម្ពុជា ។ លោកមានប្រសាសន៍ថា « យើងមិនអាចផ្ដល់អាជ្ញាប័ណ្ណជូនក្រុមហ៊ុនដែលស្នើសុំម្ដងទាំងអស់បានទេ គឺត្រូវការពិនិត្យនូវលក្ខខណ្ឌម្ដងមួយៗ ទើបសម្រេចផ្ដល់ឬមិនផ្ដល់ បើក្រុមហ៊ុនណាដាក់សំណើរ មិនមានលក្ខខណ្ឌគ្រប់គ្រាន់ត្រូវប្រាប់គាត់ និងឱ្យអនុវត្តន៍ឱ្យបានគ្រប់លក្ខខណ្ឌទើបផ្ដល់ជូនជាក្រោយ » ។
លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ផងដែរថា ដើម្បីធានាស្ថិរភាពសមិទ្ធផល ក៏ដូចជាការរីកចម្រើននៃសេដ្ឋកិច្ចនៅកម្ពុជា ជាពិសេសដើម្បីជំរុញឱ្យការអភិវឌ្ឍន៍សេដ្ឋកិច្ចជាតិឈានដល់កម្រិតសក្ដានុពល ប្រព័ន្ធហិរញ្ញវត្ថុកម្ពុជា ត្រូវមានភាពរឹងមាំ និងប្រសិទ្ធភាពដែលក្នុងនោះអត្ថិភាពនៃទីផ្សារគម្រោងវិនិយោគរួម ពិតជាមានភាពចាំបាច់ ដែលដើរតួនាទីយ៉ាងសំខាន់ក្នុងការផ្ដល់នូវយន្តហការថ្មីក្នុងការគៀងគរសាច់ប្រាក់ ដែលនៅទំនេរពីសាធារណជនដើម្បីវិនិយោគនៅក្នុងប្រទេស ។ លោកជំទាវបានបន្ថែមថា ការបង្កើត និងដាក់ដំណើរការទីផ្សារគម្រោងវិនិយោគរួមនៅកម្ពុជា មិនមែនជារឿងចៃដន្យនោះទេ ពោលគឺបានឆ្លងកាត់នូវការរៀបចំនិងការគិតគូរយ៉ាងល្អិតល្អន់ ប្រកបដោយវិចារណកម្មច្បាស់លាស់ និងដែលមានកំណត់នៅក្នុងយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០១១-២០២០ ដែលត្រូវបានធ្វើបច្ចុប្បន្នកម្មទៅជា យុទ្ធសាស្ត្រអភិវឌ្ឋន៍វិស័យហិរញ្ញវត្ថុឆ្នាំ ២០១៦-២០២៥សម្រាប់កំណើនការងារ សមធម៌ និងប្រសិទ្ធភាព ដែលជាយុទ្ធសាស្ត្រសម្រាប់អភិវឌ្ឍន៍វិស័យយហិរញ្ញវត្ថុ និងសេដ្ឋកិច្ចរបស់រាជរដ្ឋាភិបាលកម្ពុជា ។
សូមរម្លឹកថាប្រទេសកម្ពុជាបានប្រកាសបើកជាផ្លូវការនូវក្រុមហ៊ុនមូលប័ត្រកម្ពុជា ដែលថ្នាក់រដ្ឋាភិបាល និងអ្នកសេដ្ឋកិច្ចឯករាជ្យរំពឹងពីការរីកចម្រើនផ្នែកសេដ្ឋកិច្ចសម្រាប់អនាគតនៃប្រទេសកម្ពុជាផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ