បាងកក ៖ ក្នុងពេលដែលចំនួនកាកសំណល់ប្លាស្ទិកមានកាន់តែច្រើននៅលើពិភពលោក រួមទាំងប្រទេសកម្ពុជាផងនោះ ការដោះស្រាយបញ្ហាសម្រាមនិងកាកសំណង់ប្លាស្ទិកមិនមែនពឹងតែលើប្រទេសមួយ អង្គការមួយ ឬក្រុមហ៊ុនមួយនោះទេ តែវាទាមទារអោយមានការចូលរួមពីគ្រប់ភាគីពាក់ព័ន្ធទាំងអស់ ។ …
បាងកក ៖ ក្នុងពេលដែលចំនួនកាកសំណល់ប្លាស្ទិកមានកាន់តែច្រើននៅលើពិភពលោក រួមទាំងប្រទេសកម្ពុជាផងនោះ ការដោះស្រាយបញ្ហាសម្រាមនិងកាកសំណង់ប្លាស្ទិកមិនមែនពឹងតែលើប្រទេសមួយ អង្គការមួយ ឬក្រុមហ៊ុនមួយនោះទេ តែវាទាមទារអោយមានការចូលរួមពីគ្រប់ភាគីពាក់ព័ន្ធទាំងអស់ ។
ដោយកត់សម្គាល់ឃើញថា សំណល់នេះមានការកើនឡើងមិនស្រកស្រុតពីមួយថ្ងៃទៅមួយថ្ងៃនោះ សម្ព័ន្ធដើម្បីលុបបាត់កាកសំណល់ផ្លាស្ទិក (Alliance To End Plastic Waste ) ដែលមានសមាជិកជិត ៣០ មកពីបណ្តាក្រុមហ៊ុនដែលផលិត ប្រើប្រាស់ លក់ដំណើរការប្រមូលនិងកែច្នៃប្លាស្ទិក អះអាងថាខ្លួននឹងផ្ដល់ប្រាក់ប្រមាណ១ពាន់លានដុល្លារអាមេរិក ដើម្បីជួយកាត់បន្ថយកាកសំណល់ពីផ្លាស្ទិក។
លោក Jim Seward តំណាងសម្ព័ន្ធ AEPW បានមានប្រសាសន៍នៅក្នុងវេទិកាមួយនាទីក្រុងបាងកកប្រទេសថៃ កាលពីថ្ងៃទី ២៧ ខែសីហា ឆ្នាំ២០១៩ កន្លងទៅនេះថា បញ្ហាសំណល់ប្លាស្ទិក គឺជាបញ្ហាពិភពលោក ហើយទទូចដល់ក្រុមហ៊ុនទាំងអស់ ទាំងតូចក្ដី ធំក្ដី និងមកពីគ្រប់តំបន់ និងគ្រប់វិស័យ សូមចូលរួមជាមួយពួកយើងក្នុងការធ្វើការងារនេះ ដើម្បីពិភពលោក ។ លោកបានបន្តថា « ពេលនេះ គឺជាពេលវេលាដែលយើងត្រូវធ្វើសកម្មភាពហើយ ។ ភាពជោគជ័យ គឺទាមទារនូវកិច្ចសហប្រតិបត្តិការ និងកិច្ចប្រឹងប្រែងដែលមានការសម្របសម្រួលមួយ មកពីគ្រប់វិស័យទាំងអស់ ដើម្បីសម្រេចបានលទ្ធផលនិងជោគជ័យដែលមាននិរន្តរភាព» ។
យោងតាមសេចក្តីប្រកាសរបស់ AEPW ថា សម្ព័ន្ធដើម្បីលុបបំបាត់សំណល់ផ្លាស្ទិក តំណាងឲ្យក្រុមហ៊ុនចំនួន ៤០ ដែលមានមូលដ្ឋាននៅអាមេរិកខាងជើង និងខាងត្បូង, អឺរ៉ុប, អាហ្វ្រិក, មជ្ឈិមបូព៌ា, និងអាស៊ី ។ ក្រុមហ៊ុនជាច្រើនក្នុងចំណោមក្រុមហ៊ុនទាំងនេះ មានប្រតិបត្តិការធំៗនៅក្នុងតំបន់អាស៊ីអាគ្នេយ៍ ។ សម្ព័ន្ធនេះ គិតមកទល់នឹងបច្ចុប្បន្ន បានសន្យាផ្ដល់មូលនិធិជិត ១ពាន់លានដុល្លារអាមេរិក រួមជាមួយនឹងគោលដៅវិនិយោគទឹកប្រាក់ ១,៥ពាន់លានដុល្លារ ក្នុងរយៈពេល ៥ឆ្នាំបន្ទាប់ ដើម្បីបង្កើតនូវដំណោះស្រាយនានា ដែលនឹងកាត់បន្ថយនិងគ្រប់គ្រងសំណល់ផ្លាស្ទិក និងជំរុញនូវដំណោះស្រាយនៅក្រោយពេលប្រើប្រាស់ ។
លោក Brendan Edgerton មន្ត្រីតំណាងក្រុមប្រឹក្សាធុរកិច្ចពិភពលោកដើម្បីការអភិវឌ្ឍដោយចីរភាព ហៅកាត់ថា WBCSD មានប្រសាសន៍ថា ទោះបីជាប្លាស្ទិកផ្ដល់ផលប្រយោជន៍ជាច្រើនដល់ប្រជាជននៅទូទាំងពិភពលោក រាប់ទាំងការជួយធ្វើឲ្យប្រសើរឡើងនូវជីវភាពរស់នៅ សុខភាព-សុវត្ថិភាព និងនិរន្តរភាពក្ដី ក៏ប៉ុន្តែសំណល់ផ្លាស្ទិកដែលគ្រប់គ្រងមិនបានត្រឹមត្រូវ បានក្លាយជាភាពប្រឈមរបស់ពិភពលោក ។ លោកបានបញ្ជាក់ថា « យើងកំពុងធ្វើការដើម្បីធ្វើឲ្យក្ដីសុបិនដែលចង់បានពិភពលោកមួយដែលគ្មានសំណល់ផ្លាស្ទិក ក្លាយជាការពិត» ។
ចំណែកលោក Cholanat Yanaranop អនុប្រធានប្រតិបត្តិក្រុមហ៊ុន SCG បាននិយាយថា ៦០% នៃសំណល់ផ្លាស្ទិកនៅក្នុងសមុទ្រ អាចកំណត់ប្រភពចេញមកពីប្រទេសចំនួន ៥ នៅក្នុងអាស៊ីអាគ្នេយ៍ ហើយយើងយល់ស្របថា នេះគឺជាបញ្ហាប្រភពដ៏ធ្ងន់ធ្ងររបស់ពិភពលោក ដែលទាមទារឲ្យមានការធ្វើសកម្មភាពបន្ទាន់ និងការដឹកនាំរឹងមាំសម្រាប់សកម្មភាពនេះ ។ លោកបានបន្ថែមថា «យើងបានទទួលជោគជ័យនូវគំនិតផ្ដួចផ្ដើមសាកល្បងជាច្រើន ព្រមទាំងគម្រោងគ្រប់គ្រងសំណល់ និងដំណោះស្រាយ ដែលផ្អែកលើ យុទ្ធសាស្ត្រសេដ្ឋកិច្ចវិលជុំ រួមជាមួយនឹងគម្រោងសហប្រតិបត្តិការក្នុងស្រុក » ។
សូមបញ្ជាក់ថា នៅក្នុងសន្និសីទលើកទី១០ នៃសេដ្ឋកិច្ចវិលជុំកាលពីថ្ងៃទី ២៦ ខែសីហាកន្លងទៅនេះដែរ លោកប្រាយុទ្ធចាន់អូចា នាយករដ្ឋមន្ត្រីថៃបានមានប្រសាសន៍ផងដែរថា បញ្ហានេះ ជាបញ្ហារបស់បណ្ដាប្រទេសទាំងអស់នៅក្នុងពិភពលោក ហើយក្នុងនាមជាសមាជិកមួយរបស់អាស៊ាន លោកប្រាយុទ្ធថានឹងយកករណីនេះ ទៅពិភាក្សាបន្ថែមទៀតជាមួយនឹងបណ្ដាប្រទេសអាស៊ាន ដើម្បីចូលរួមដោះស្រាយទាំងអស់គ្នា ៕
ចែករំលែកព័តមាននេះ