រាជធានីភ្នំពេញ ៖ កម្ពុជាត្រូវបានសហព័ន្ធ ប្រណាំងកង់អន្តរជាតិ(UCI) ជ្រើសរើសជាកន្លែង
រៀបចំព្រឹត្តិការណ៍ប្រណាំងកង់ពិភពលោកលើកទី១នៅតំបន់ឆ្នេរសមុទ្រ សម្រាប់ឆ្នាំ២០២០ ដែល នឹងចាប់ផ្តើមពីថ្ងៃទី៤ ដល់ថ្ងៃទី៦ ខែមករា ឆ្នាំ២០២០ ខាងមុខនេះ ដោយឆ្លងកាត់ខេត្តចំនួន៤ រួមមាន ខេត្តកំពត ខេត្តកែប ខេត្តព្រះសីហនុ និងខេត្តកោះកុង ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានថ្លែងឲ្យដឹង ដូច្នេះ នៅក្រោយកិច្ចប្រជុំគណៈកម្មការអន្តរក្រ សួង ដើម្បីរៀបចំព្រឹត្តិការណ៍ប្រណាំងកង់ពិភព
លោកនៅតំបន់ឆ្នេរកម្ពុជា នៅទីស្ដីការក្រសួង ទេសចរណ៍ នាព្រឹកថ្ងៃទី២៧ ខែសីហា ក្រោមអធិបតីភាពលោក ថោង ខុន រដ្ឋមន្ត្រីក្រសួង ទេសចរណ៍។
លោក វ៉ាត់ ចំរើន បានឱ្យដឹងថា ព្រឹត្តិការណ៍ពិភពលោកនេះ រៀបចំឡើងក្រោមកិច្ចសហការ រវាងក្រសួងទេសចរណ៍ គណៈកម្មាធិការជាតិអូឡាំពិកកម្ពុជា(NOCC) សហព័ន្ធកីឡាទោចក្រ យានកម្ពុជា ក្លិបឆ្នេរស្អាតបំផុតលើពិភពលោក និងសហព័ន្ធប្រណាំងកង់អន្តរជាតិ(UCI) ។
លោកបានបន្ថែមថា ព្រឹត្តិការណ៍ប្រណាំងកង់លំដាប់ពិភពលោកដែលមានរយៈពេល៣ថ្ងៃនោះ នឹងត្រូវឆ្លងកាត់ខេត្តកោះកុង ខេត្តកំពត ខេត្តកែប និងខេត្តព្រះសីហនុ និងបានបែងចែកជា៣ដំណាក់កាល រួមមាន ៖
*ដំណាក់កាលទី១ ៖ នាថ្ងៃទី៤ ខែមករា ឆ្នាំ២០២០ ចាប់ផ្ដើមចេញដំណើរដំបូងពីតំបន់ វិស្សមកាលទេសចរណ៍តារាសាគរ ឆ្លងកាត់រង្វង់មូលព្រឹទ្ធាចារ្យ សាយ ភូថង ស្ថិតក្នុងស្រុកបទុមសាគរ ខេត្តកោះកុង ឆ្ពោះទៅក្រុងខេមរភូមិន្ទ (ទីរួមខេត្តកោះកុង) ដែលមានចម្ងាយសរុបប្រមាណ១៣៥គីឡូម៉ែត្រ ។
*ដំណាក់កាលទី២ ៖ នាថ្ងៃទី៥ ខែមករា ឆ្នាំ២០២០ ចេញដំណើរពីរង្វង់មូលព្រឹទ្ធាចារ្យ សាយ ភូថង ឆ្លងកាត់ផ្លូវបំបែកស្រែអំបិលឆ្ពោះទៅរង្វង់មូលវាលរេញ ស្ថិតក្នុងស្រុកព្រៃនប់ ខេត្តព្រះសីហនុ និងបន្តទៅកាន់រមណីយដ្ឋានឋានសួគ៌បូកគោ ខេត្តកំពត ដែលមានចម្ងាយ សរុបប្រមាណ១៧០គីឡូម៉ែត្រ ។
*ដំណាក់កាលទី៣ ៖ ថ្ងៃទី៦ ខែមករា ឆ្នាំ២០២០ ចេញដំណើរពីមុខសាលាខេត្តកែប ឆ្លងកាត់រង្វង់មូលសេះស ឆ្ពោះទៅកាន់រង្វង់មូលទុរេន នៃខេត្តកំពត រួចបន្តទៅកាន់រង្វង់មូល វាលរេញ ឆ្ពោះទៅរង្វង់មូលតោពីរ នៃខេត្តព្រះសីហនុ ។ ពេលទៅដល់ជិះវង់ជុំវិញរង្វង់មូលតោពីរចំនួន៣ជុំ ហើយបន្តឆ្ពោះទៅរមណីយដ្ឋានឆ្នេរសុខា រមណីយដ្ឋានឆ្នេរឯករាជ្យ ព្រះរាជដំណាក់ រួចចុះតាមផ្លូវឆ្នេរឯករាជ្យ តម្រង់ទៅរង្វង់មូលតោពីរវិញ ហើយបញ្ចប់នៅទីនោះតែម្ដង ដែលមានចម្ងាយសរុបប្រមាណ១៥៥គីឡូម៉ែត្រ ។
លោក វ៉ាត់ ចំរើន បានថ្លែងឲ្យដឹងថា មកដល់ថ្ងៃនេះ មានក្រុមកីឡាករចំនួន២០ប្រទេសហើយដែលបានចុះឈ្មោះចូលរួមប្រណាំងកង់ក្នុងព្រឹត្តិការណ៍ពិភពលោកនេះ ក្នុងនោះនៅកម្ពុជា មាន១ក្រុម មកពីម៉ាឡេស៊ី២ក្រុម ឥណ្ឌូណេស៊ី១ក្រុម សិង្ហបុរី១ក្រុម ហ្វ៊ីលីពីន១ក្រុម ថៃ១ក្រុម កូរ៉េខាងត្បូង១ក្រុម ជប៉ុន១ក្រុម ចិន១ក្រុម អូស្ត្រាលី១ក្រុម អីុតាលី២ក្រុម កាហ្សាក់ស្ថាន១ក្រុម បារាំង២ក្រុម សហរដ្ឋអាមេរិក១ក្រុម អេស្ប៉ាញ១ក្រុម និងអង់គ្លេស១ក្រុម ។
លោក វ៉ាត់ ចំរើន អះអាងថា រាល់ព្រឹត្តិការណ៍ធំៗទាំងអស់នៅកម្ពុជា ចាប់ពីពេលនេះតទៅគឺសុទ្ធសឹងជាព្រឹត្តិការណ៍ដែលគាំទ្រដល់ព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ ព្រោះថារាល់ព្រឹត្តិការណ៍កីឡាធំៗទាំងនោះនឹងទាក់ទាញស្រទាប់យុវវ័យឲ្យចូលរួមសកម្មភាពកីឡា និងគាំទ្រវិស័យកីឡានៅកម្ពុជា ។ ទន្ទឹមនោះ ក៏ផ្តល់ជាបទពិសោធន៍ដល់គណៈកម្មការអន្តរក្រសួងក្នុងការរៀបចំព្រឹត្តិការណ៍កីឡាផ្សេងៗ ឆ្ពោះទៅកីឡាស៊ីហ្គេមឆ្នាំ២០២៣ថែមទៀត ។
លោក ថោង ខុន រដ្ឋមន្ត្រីក្រសួងទេសចរណ៍បានឲ្យដឹងថា ការបង្កើតឲ្យមានព្រឹត្តិការណ៍ប្រណាំងកង់ពិភពលោកលើកទី១នេះ គឺផ្តើមចេញពីជំនួបពិភាក្សារវាងសម្តេចតេជោ ហ៊ុន សែន នាយករដ្ឋមន្ត្រីកម្ពុជា ជាមួយអគ្គនា យកក្លិបឆ្នេរស្អាតជាងគេលើពិភពលោកក្នុងអំឡុងបុណ្យសមុទ្រលើកទី៧ នៅខេត្តកោះកុង ។
លោករដ្ឋមន្ត្រីបញ្ជាក់ថា ព្រឹត្តិការណ៍នេះនឹងជួយផ្សព្វផ្សាយអំពីសក្តានុពលឆ្នេរសមុទ្រដ៏ ស្រស់
ស្អាតរបស់កម្ពុជាទៅកាន់បណ្តាប្រទេសទូទាំងពិភពលោក ដើម្បីទាក់ទាញភ្ញៀវទេសចរអន្តរ
ជាតិ ។ ដូច្នេះលោករំពឹងថា ព្រឹត្តិការណ៍ប្រណាំងកង់ពិភពលោកលើកទី១នេះ នឹងទទួលបានជោគជ័យ ហើយសក្តានុពលឆ្នេរសមុទ្រកម្ពុជានឹងត្រូវបង្ហាញទូទាំងពិភពលោក ៕ (កែសម្រួលដោយ ៖ បុប្ផា)
ចែករំលែកព័តមាននេះ