ប៉ាឡេស្ទីន ៖ ជ្រោយហ្គាហ្សាដែលត្រួតត្រាដោយចលនាអ៊ិស្លាមនិយមហាម៉ាស់ ស្ថិតក្រោមការប្រកាសអាសន្នកាលពីថ្ងៃទី២៨សីហា ក្រោយការវាយប្រហារអត្តឃាត២ ដែលសម្លាប់ប៉ូលិសប៉ាឡេស្ទីន៣នាក់។ នោះជាការវាយប្រហារអត្តឃាតលើកដំបូងនៅហ្គាហ្សា ហ៊ុមព័ន្ធដោយអុីស្រាអែលពុំធ្លាប់មាន ចាប់តាំងពីជាង២ឆ្នាំមកហើយ។
យោងតាមក្រសួងមហាផ្ទៃហ្គាហ្សាថា ប៉ូលិស២នាក់ស្លាប់និងម្នាក់ទៀតរងរបួស ក្នុងសង្កាត់តាល់អាល់ហាវ៉ាក្នុងទីក្រុងហ្គាហ្សា។បន្ទាប់មកក្នុងការវាយប្រហារអត្តឃាតទី២ ប៉ូលិសប៉ាឡេស្ទីនម្នាក់ទៀតបានត្រូវស្លាប់ និងមនុស្ស២នាក់រងរបួស នៅលើផ្លូវថ្នល់មួយតាមបណ្ដោយមាត់សមុទ្រក្នុងទីក្រុងដដែលនោះ។
អ្នកនាំពាក្យក្រសួងនេះលោកKYAD AL BOZMអះអាងនាយប់ថ្ងៃទី២៨សីហាថា ភ្នាក់ងារសើុបការណ៍មូលដ្ឋាន កំណត់មុខសញ្ញា២នាក់ដែលបានធ្វើឲ្យផ្ទុះនៅត្រង់កន្លែងត្រួតពិនិត្យ២របស់ប៉ូលិសនៅហ្គាហ្សា។ លោកបន្តថាការស៊ើបអង្កេតនៅបន្តដើម្បីកំណត់ថា តើនរណានៅពីក្រោយការវាយប្រហារទាំងនោះ។
សាក្សីទាំងឡាយនិយាយថា ជាការវាយប្រហារអត្តឃាត២ធ្វើឡើងដោយពួកជនអត្តឃាតជិះម៉ូតូ។ ចំណែកប្រភពជិតដិតនឹងការស៊ើបអង្តេតបញ្ជាក់ថា ពួកជនសង្ស័យជាពួកសាឡាហ្វីស្ត ពាក្យដែលក្រុមហាម៉ាស់និយាយពីបណ្ដាក្រុមរ៉ាឌីកាល់តូចៗ ដែលប្រឆាំងនឹងអាជ្ញាធររបស់ខ្លួន ហើយក្រុមទាំងនេះមានទំនោរទៅរកក្រុមរដ្ឋអ៊ិស្លាម៕ (កែសម្រួលដោយ ៖ បុប្ផា)
ចែករំលែកព័តមាននេះ