ខេត្តក្រចេះ ៖ ក្រោយការចាប់អាជីពលើរបរដាំបន្លែ ពលរដ្ឋរស់នៅឃុំដារ ស្រុកចិត្របុរី អះអាងថា ជីវភាពប្រចាំថ្ងៃរបស់ពួកគាត់មានការកែប្រែជាងមុន ពីមួយខែទៅមួយខែ ដោយចំណូលបានមកពីការលក់ទិន្នផលនៃការដាំដុះរបស់ពួកគាត់ ។ បន្លែជាច្រើនមុខមានដូចជា ត្រាប់ ត្រសក់ និងស្ពៃ ត្រូវបានពលរដ្ឋចំនួន៣គ្រួសាររស់នៅភូមិដារ ឃុំដារ ស្រុកចិត្របុរី បានលើថ្នាល់ពូនរងដាក់ដាំតាមលក្ខណៈស្តង់ដារបច្ចេកទេសលើផ្ទៃដីទំហំជិត១ហិកតា នៅខាងក្រោយភូមិ ។
ការចាប់យករបរដាំដុះបន្លែជារបរអាជីពនេះត្រូវបានពលរដ្ឋទាំងនោះលើកឡើងថា ពួកគាត់បានអនុវត្តមានរយៈពេលជិត៣ឆ្នាំមកហើយ ក្រោយពីមានការគាំទ្រពីអង្គជាដៃគូក៏ដូចជាទទួលបានការសម្របសម្រួលនូវសម្ភារៈបច្ចេកទេសពីមន្ទីរជំនាញ និងអាជ្ញាធរបានធ្វើឲ្យពួកគាត់ចាប់យករបរដាំបន្លែនេះជារបរអាជីព និងអនុវត្តការដាំដុះទៅតាមលក្ខណៈស្តង់ដារ និងបច្ចេកទេសត្រឹមត្រូវ ។
ពលរដ្ឋទាំងនោះរំលឹកថា កន្លងមកពួកគាត់បានចូលព្រៃ ដើម្បីរកអុសកាប់ឈើកាប់ឃ្លី គឺពឹងផ្អែកទៅលើអនុផលព្រៃឈើសម្រាប់ជីវភាពប្រចាំថ្ងៃ ។ តែក្រោយការចាប់យករបរដាំបន្លែជារបរស្នូលប្រចាំគ្រួសាររួចមកធ្វើឲ្យពួកគាត់បង្វែរពីរបរដែលមិនស្របច្បាប់មកធ្វើរបរស្រប ច្បាប់ និងទទួលបានចំណូលច្រើនជាងមុន ។
លោក ខេង ចាន់ថន ជាកសិករមួយគ្រួសារក្នុងចំណោមកសិករ៣គ្រួសាររស់នៅក្នុងឃុំដារ ស្រុកិត្របុរី ដែលបានចាប់យករបរដាំបន្លែជារបរអាជីពបានរៀបរាប់ថា ការដាំដុះមានបន្លែខ្លះត្រូវចាំណាយពេលយូរ និងទន់ច្រើនមុន និងទទួលផល ។ ហើយការដាំដុះក៏ត្រូវទាមទារឲ្យមានការថែទាំងដូចជា ការជ្រោយជើងការពូនរង ពិសេសការពារសត្វល្អិតដោយទាមទារនូវការអត់ធ្មត់ ព្រោះថា ដាំណាំពួកគាត់ដាំដុះជាលក្ខណៈធម្មជាតិ ។
កសិករវ័យជិត៤០ឆ្នាំរូបនេះអះអាងថា ជាមធ្យមពួកគាត់អាចរកចំណូលបានក្នុងមួយខែពីមួយលានរៀលទៅ២លានរៀលពីការបេះទិន្នផលលក់ឲ្យឈ្មួញកណ្តាលដែលទៅប្រមូលទិញជាប់ជាប្រចាំ ។ ក៏ដោយសារតែបន្លែរបស់ពួកគាត់ជាប្រភេទបន្លែធម្មជាតិដូច្នេះមិនពិបាករកទីផ្សារនោះទេ ។
កសិកររូបនេះបានមហិច្ចតាថា គ្រោង និងពង្រីកការដាំដុះបន្ថែមទៀត លើផ្ទះដីជាច្រើន ហិកតាផ្សេងទៀតនៅឆ្នាំក្រោយនេះនៅពេលដែលពួកគាត់មានលទ្ធភាពសន្សំដើមទន់បានច្រើនពីមួយឆ្នាំទៅមួយឆ្នាំរួចមកនោះ ៕ កែសម្រួលដោយ ៖ សុឃាក់
ចែករំលែកព័តមាននេះ