ខេត្តកណ្តាល ៖ គ្រោះថ្នាក់ចរាចរណ៍មួយបានកើតឡើងរវាងម៉ូតូមួយគ្រឿងបុកពីក្រោយរថយន្តមួយគ្រឿងទៀត បណ្តាលឱ្យស្លាប់ម្នាក់ និងរបួសធ្ងន់ម្នាក់ ចំណែករថយន្តបើកគេចបាត់ស្រមោល។
ហេតុការណ៍ខាងលើនេះបានកើតឡើងកាលពីវេលាម៉ោង១១និង៥នាទីយប់ថ្ងៃទី២៨ ខែសីហា ឆ្នាំ២០១៩ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រ២៧-២៨ ស្ថិតក្នុងភូមិ ទួលអំពិល ឃុំពញាឮ ស្រុកពញាឮ ខេត្តកណ្តាល ។
ភាគីខាងម៉ូតូមួយគ្រឿងជិះគ្នា២នាក់ ម៉ាកហុងដាឌ្រីម ធុនC125 ពណ៌ខ្មៅ ពាក់ផ្លាកលេខ ភ្នំពេញ ១HK-៤២០៩ បើកបរដោយឈ្មោះ អឿន បូរី ភេទប្រុស អាយុ១៧ឆ្នាំ បានស្លាប់នៅកន្លែងកើតហេតុ និងអ្នករួមដំណើរម្នាក់ឈ្មោះ ទយ ឆ្អឹង ភេទប្រុស អាយុ១៧ឆ្នាំ ។ ជនរងគ្រោះទាំង២នាក់មានទីលំនៅក្នុងភូមិកំពង់អុស ឃុំកំពង់អុស ស្រុកពញាឮ ខេត្តកណ្តាល ។
ចំណែកភាគីខាងរថយន្តមួយគ្រឿងខាងលើមិនស្គាល់ម៉ាក អ្នកបើកបរមិនស្គាល់អត្តសញ្ញាណ បានបើកគេចបាត់ស្រមោល។
តាមប្រភពពីនគរបាលចរាចរស្រុកពញ្ញាឮបានអោយដឹងថា មុនពេលកើតហេតុ មានរថយន្តមួយគ្រឿងមិនស្គាល់ម៉ាក ធ្វើដំណើរក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ ស្រាប់តែមានយុវជន២នាក់ជិះម៉ូតូមួយគ្រឿងម៉ាកហុងដាឌ្រីម បានរ៉េចង្កូតទៅបុកពីក្រោយរថយន្តមួយគ្រឿងខាងលើ បណ្តាលអោយអ្នកបើកបរម៉ូតូស្លាប់នៅកន្លែងកើតហេតុ ចំណែកអ្នករួមដំណើរបានរងរបួសធ្ងន់ ត្រូវបានដឹកបញ្ជូនទៅសង្គ្រោះនៅមន្ទីពេទ្យឯរាជធានីភ្នំពេញ៕ (កែសម្រួលដោយ ៖ ធីតា)
ចែករំលែកព័តមាននេះ