អ្នកស្រី Suzy Welch ដែលជាសហស្ថាបនិកវិទ្យាស្ថាន Jack Welch Management Institute និងជាអ្នកនិពន្ធមួយរូបបានចែករំលែកថា អ្នកស្រីតែងតែប្រាប់មនុស្សគ្រប់គ្នាឲ្យធ្វើការងារដែលពួកគេស្រលាញ់ច្រើនជាងធ្វើការដែលមានប្រាក់ខែខ្ពស់…
អ្នកស្រី Suzy Welch ដែលជាសហស្ថាបនិកវិទ្យាស្ថាន Jack Welch Management Institute និងជាអ្នកនិពន្ធមួយរូបបានចែករំលែកថា អ្នកស្រីតែងតែប្រាប់មនុស្សគ្រប់គ្នាឲ្យធ្វើការងារដែលពួកគេស្រលាញ់ច្រើនជាងធ្វើការដែលមានប្រាក់ខែខ្ពស់ ។ ប៉ុន្តែអ្នកស្រីបានប្រាប់ថា មានពេលខ្លះដែលអ្នកអាចជ្រើសរើសការងារមួយ ព្រោះតែប្រាក់ខែតែមួយកត្តាបានដូចខាងក្រោមនេះ ៖
១. ពេលអ្នកមានបញ្ហាហិរញ្ញវត្ថុ ៖ ប្រសិនបើអ្នកកំពុងស្ថិតក្នុងស្ថានការលំបាកក្នុងផ្នែកហិរញ្ញវត្ថុ និងត្រូវការថវិកាបន្ថែម សម្រាប់តម្រូវការប្រចាំថ្ងៃនោះ ការជ្រើសរើសការងារព្រោះតែប្រាក់ខែ គឺជារឿងសមហេតុសមផល ។ តើស្ថានការបែបណាដែលអាចចាត់ទុកថា ជាស្ថានការលំបាកខាងលើ ? សម្រាប់អ្នកស្រី Welch វាគឺជាស្ថានការដែលមានជាប់បំណុលធំ ដែលមានអត្រាការប្រាក់ខ្ពស់ ឬខ្វះថវិកាបង់ថ្លៃព្យាបាលជម្ងឺប្រចាំកាយផ្សេងៗជាដើម ។
២. ពេលដែលអ្នកមានផែនការច្បាស់លាស់ ៖ ប្រសិនបើអ្នកកំពុងតែព្យាយាមសម្រេចគោលដៅហិរញ្ញវត្ថុដែលតម្រូវឲ្យអ្នកចាប់ផ្តើមសន្សំថវិកាមួយចំនួនក្នុងពេលបច្ចុប្បន្ននោះការជ្រើសរើសការងារ ព្រោះតែប្រាក់ខែ គឺជាយុទ្ធសាស្ត្រល្អមួយ ។
ឧទាហរណ៍ដូចជា អ្នកកំពុងតែសន្សំថវិកា ដើម្បីបង់ថ្លៃសិក្សាថ្នាក់ខ្ពស់នៅបរទេស ឬដើម្បីចាប់ផ្តើមអាជីវកម្មមួយផ្ទាល់ខ្លួនជាដើម ។ ក្នុងករណីទាំងនេះការជ្រើសរើសការងារ ព្រោះតែប្រាក់ខែខ្ពស់អាចជាការវិនិយោគលើអនាគទរបស់អ្នក ។
៣. ពេលដែលអ្នកជាមនុស្សចូលចិត្តជួយសង្គម ៖ ប្រសិនបើអ្នកជាមនុស្សដែលចូលចិត្តចូលរួមដល់ការអភិវឌ្ឍន៍សង្គម ហើយអ្នកគិតថា អ្នកអាចចូលរួមបានច្រើន ប្រសិនបើការងារអ្នកមានប្រាក់ខែខ្ពស់នោះអ្នកស្រី Welch ក៏គាំទ្រអ្នកដែរ ។
អ្នកស្រីបានកត់សម្គាល់ថា ប្រសិនបើលុយ គឺជាកត្តាតែមួយដែលធ្វើឲ្យអ្នកស្រលាញ់ការងារអ្នកទេ អ្នកគួរតែធានាថា អ្នកមានមូលហេតុត្រឹមត្រូវក្នុងការជ្រើសរើសវា ។ បើមិនដូច្នេះទេអ្នកគួរតែចំណាយពេលរកការងារថ្មីដែលមានតម្លៃដល់ជីវិតអ្នកច្រើនជាងនេះវិញ ៕ កែសម្រួលដោយ ៖ សុឃាក់
ចែករំលែកព័តមាននេះ