រាជធានីភ្នំពេញ ៖ ស្ត្រីម្នាក់បីកូនប្រុសតូចអាយុទើបតែ១ខួប ដើរឆ្លងកាត់ស្ពានព្រះមុន្នីវង្ស ទាំងទឹកមុខយំសោកសង្រេគ ។ លុះដើរបានដល់ពាក់កណ្តាលស្ពាន ក៏ប៉ុនប៉ងលោតទឹកសម្លាប់ខ្លួន តែសំណាងល្អត្រូវនគរបាលជិះម៉ូតូល្បាតឆ្លងកាត់ទីនោះប្រទះឃើញ ក៏ឈប់ម៉ូតូចុះទៅឃាត់ទាន់ពេល និងបង្កការភ្ញាក់ផ្អើលកាលពីវេលាម៉ោង១០ និង៣០នាទីព្រឹកថ្ងៃទី២៩ សីហា នេះ ស្ថិតនៅលើស្ពានព្រះមុន្នីវង្សចាស់ ក្នុងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ។
សេចក្តីរាយការណ៍ឱ្យដឹងថា ស្ត្រីខាងលើមានឈ្មេាះ ជា សុផាវង្ស អាយុ២៨ឆ្នាំ មានទីលំនៅសង្កាត់ព្រែកប្រា ខណ្ឌច្បារអំពៅ ។ តាមប្រភពព័ត៌មានពីមន្ត្រីនគរបាលម្នាក់ដែលជាអ្នកជួយសង្គ្រេាះថា នៅមុនកើតហេតុ គាត់បានជិះម៉ូតូល្បាតឆ្លងកាត់ស្ពានព្រះមុន្នីវង្សចាស់ ស្របពេលជាមួយគ្នានេាះដែរ ក៏ប្រទះឃើញស្ត្រីខាងលើដើរបណ្តើរយំសោកបណ្តើរ ដោយមានបីកូនប្រុសតូចជាប់នៅហ្នឹងដៃផងដែរ ។
លោកបន្តថា ឃើញដូចនោះហើយ គាត់មានការសង្ស័យ ក៏ជិះម៉ូតូយឺតតាមមើលពីក្រោយរហូត លុះដើរដល់ពាក់កណ្តាលស្ពាន ស្ត្រីរងនេាះបានឈប់ ហើយដាក់ដៃម្ខាងទៅលើបង្កាន់ដៃស្ពាន និងសម្លឹងមើលទៅផ្ទៃទន្លេ ទំនងជាប៉ុនប៉ុងលោតទឹកសម្លាប់ខ្លួន ទើបមន្ត្រីនគរបាលខាងលើ សម្រេចឈប់ម៉ូតូ រួចស្ទុះទៅចាប់ឃាត់ស្ត្រីរូបនេាះភ្លាមៗតែម្តង បង្កការភ្ញាក់ផ្អើលនៅចំណុចលើស្ពានមួយដង្ហើមចង្រិត ។
បន្ទាប់ពីជួយស្ត្រីខាងលើទាន់ពេលរូបមក កម្លាំងនគរបាលបានដឹកនាង និងកូនតាមម៉ូតូនាំទៅកាន់ប៉ុស្តិ៍រដ្ឋបាលនគរបាលច្បារអំពៅទី២ ដើម្បីសាកសួរនាំបន្ថែម ។ តាមការឆ្លើយប្រាប់សមត្ថកិច្ច គឺនាងពិតជាចង់បញ្ចប់ជីវិតដោយលោតទឹកសម្លាប់ខ្លួនជាមួយកូនប្រុសប្រាកដមែន ដោយសារនាងមានវិបត្តិក្នុងគ្រួសារ គឺឈ្លេាះគ្នាជាមួយបុរសជាប្តី ។ តាមការបញ្ជាក់របស់ស្ត្រីរងគ្រេាះ អោយដឹងថា បុរសជាប្តីមានឈ្មេាះ លឹម ចាន់វាសនា អាយុ៣២ឆ្នាំ ជាជាងមាសនៅផ្សារច្បារអំពៅ ។
ជំុវិញករណីនេះ គេក៏សង្គេតឃើញវត្តមានបុរសជាប្តីបានទៅដល់ប៉ុស្តិ៍រដ្ឋបាលនគរបាលច្បារអំពៅទី២ផងដែរ ប៉ុន្តែការទៅដល់របស់គេ គឺមិនមែនទៅនិយាយសម្របសម្រួលអ្វី ដែលជាផលវិជ្ជមានជាមួយស្ត្រីជាប្រពន្ធ និងកូនឡើយ គ្រាន់តែទៅដល់និយាយចំពេាះមុខមហាជន និងនគរបាលថា គេមិនអាចនៅរួមរស់ជាមួយស្ត្រីជាប្រពន្ធតទៅមុខទៀតឡើយ ពោលគឺចង់បញ្ចប់គ្នា ។
យ៉ាងណាមិញ ស្របពេលជាមួយគ្នានេាះ បងប្អូនសាច់ញាតិស្ត្រីរងគ្រេាះ ពិសេសស្ត្រីជាម្តាយក្មេក បានមកនិយាយលួងលោមនាង រួចនាំនាងជិះម៉ូតូកង់បីត្រឡប់ទៅលំនៅឋានវិញ ។ (សម្រួលដោយ៖ ស្រីណា)
ចែករំលែកព័តមាននេះ