រាជធានីភ្នំពេញ៖ គម្រោងនិងទុនវិនិយោគនៅក្នុងវិស័យសំណង់ប្រចាំខែកក្កដា ឆ្នាំ២០១៩ នៅទូទាំងប្រទេសមាន៥២៥គម្រោង ដែលមានតម្លៃប៉ាន់ស្មានទុនវិនិយោគមានជាង១,១ពាន់លានដុល្លារ កើនឡើងជាង៣៩% បើប្រៀបធៀបទៅនិងខែកក្កដាដូចគ្នានៃឆ្នាំ២០១៨ និងបានបង្កើតការងារជាធម្យមប្រមាណពី ១៩ ០០០…
រាជធានីភ្នំពេញ៖ គម្រោងនិងទុនវិនិយោគនៅក្នុងវិស័យសំណង់ប្រចាំខែកក្កដា ឆ្នាំ២០១៩ នៅទូទាំងប្រទេសមាន៥២៥គម្រោង ដែលមានតម្លៃប៉ាន់ស្មានទុនវិនិយោគមានជាង១,១ពាន់លានដុល្លារ កើនឡើងជាង៣៩% បើប្រៀបធៀបទៅនិងខែកក្កដាដូចគ្នានៃឆ្នាំ២០១៨ និងបានបង្កើតការងារជាធម្យមប្រមាណពី ១៩ ០០០ នាក់ទៅ ២១ ០០០ នាក់ក្នុងមួយថ្ងៃ ។ ជាមួយគ្នានោះផងដែរ គ្រាន់តែក្នុងខែកក្កដា ឆ្នាំនេះ គឺមានគម្រោងអាគារខ្ពស់ៗចាប់ពី ៥ ជាន់ឡើងមានចំនួន ៦៩ អាគារទូទាំងប្រទេស ដែលក្នុងនោះខេត្តព្រះសីហនុ គឺមានដល់ទៅ ៤៣ អាគារ ។
ទន្ទឹមនឹងវិស័យសំណង់បន្តមានសន្ទុះហក់ឡើងមិនស្រកចុះ ក្រសួងដែនដី នគររូបនីយកម្ម និងសំណង់ ក៏បានឃើញថាកម្រៃពលកម្មពីវិស័យមួយនេះក៏មានកម្រិតល្អប្រសើរ ជាក់ស្តែងបើយោងតាមទិន្នន័យដែលក្រសួងចុះស្រង់ផ្ទាល់នៅតាមការដ្ឋាននោះ គឺក្នុងខែកក្កដាកន្លងមក តម្លៃពលកម្មសម្រាប់កម្មករគ្មានជំនាញក្នុងមួយថ្ងៃអាចទទួលបានពី ៣០ ០០០ រៀល ដល់ ៤០ ០០០ រៀល។ ការសិក្សាស្រាវជ្រាវរបស់ក្រសួងក៏បានរកឃើញថា កម្រៃពលកម្មសម្រាប់កម្មករមានជំនាញនិងមេជាងវិញ ក្នុងមួយថ្ងៃអាចទទួលបានពី ៤០ ០០០ រៀល ទៅដល់ ៦០ ០០០ រៀល ចំពោះវិស្វករ ស្ថាបត្យករនិងអ្នកជំនាញផ្សេងទៀត គ្នុងមួយខែអាចទទូលបានចំណូលពី ៤០០ ដុល្លារទៅដល់ ២៥០០ ដុល្លារ ។
លោក ស៊ុន សុភា ដែលជាកម្មករសំណង់មួយរូបនៅការដ្ឋានរបស់ក្រុមហ៊ុនចិន មួយតាមបណ្តោយផ្លូវនរោត្តមបានបញ្ជាក់ថា លោកអាចរកចំណូលបានច្រើនជាងមុន ខណៈកាលពី ២ ឬ ៣ ឆ្នាំមុន លោកអាចរកបានត្រឹមតែ ១៥ ០០០ រៀលក្នុងមួយថ្ងៃសម្រាប់កម្រៃពលកម្មជាកម្មករគ្មានជំនាញ ។
កម្មករសំណង់ដែលមកពីខេត្តព្រៃវែងរូបនេះបានបន្តថា «ពេលបើកលុយ គឺគេបើកជាសប្តាហ៍ អញ្ចឹងឃើញបានលុយច្រើនគួរសម តែកម្រៃដែលកម្មករជាជនជាតិចិនវិញ គឺបានច្រើនជាងពួកខ្ញុំ ៣ ទៅ ៤ ដងឯណោះ» ។ លោកបានបន្តថាពេលនេះការងារសំណង់ មិនថាសម្រាប់ក្រុមហ៊ុនក្នុងស្រុក ឬក៏សំណង់របស់អ្នកវិនិយោគិនបរទេសនោះទេ គឺហាក់ដូចជាមានការខ្វះខាតកម្លាំងពលកម្ម ព្រោះកម្មករមួយចំនួនដែលធ្លាប់ធ្វើការងារនៅការដ្ឋានរបស់លោកនោះ បានសម្រុកទៅធ្វើការនៅខេត្តព្រះសីហនុវិញ ព្រោះកម្រៃពលកម្មប្រចាំថ្ងៃ ត្រូវបានគេប្រាប់ថាមានតម្លៃខ្ពស់ជាងនៅក្រុងភ្នំពេញ ។
យ៉ាងណាមិញ បើយោងតាមរបាយការណ៍របស់ក្រសួងរៀបចំដែនដី នគរូបនីយ
កម្ម និងសំណង់ ដែលទើបចេញផ្សាយដើមសប្តាហ៍នេះ បានបង្ហាញថានៅរាជធានីភ្នំពេញមានកម្មករប្រមាណពី ៦ ២៧០នាក់ ទៅ ៦ ៣០០ នាក់ក្នុងមួយថ្ងៃ តែមានការថយចុះប្រមាណ ២៦,៣១% បើធៀបនឹងខែមិថុនា ឆ្នាំ ២០១៨ ដែលនៅរាជធានីភ្នំពេញគឺមានកម្មករក្នុងវិស័យសំណង់ប្រមាណពី ១២ ០០០ នាក់ ទៅដល់ ១២ ៥០០ នាក់ក្នុងមួយថ្ងៃ។
របាយការណ៍របស់ក្រសួងបានបញ្ជាក់ថា សម្រាប់ខែកក្កដា ២០១៩ កន្លងទៅ សំណង់នៅទូទាំងប្រទេស មានចំនួនសរុប ៥២៥គម្រោង មានផ្ទៃក្រឡាសំណង់សរុប ជាង២១ម៉ឺនម៉េត្រការ៉េ មានតម្លៃប៉ាន់ស្មានទុនវិនិយោគប្រមាណជាង១,១ពាន់លានដុល្លារអាមេរិក បើប្រៀបធៀបនឹងខែកក្កដា២០១៨ មានចំនួន៣៣០គម្រោង មានផ្ទៃក្រឡាសំណង់ជាង១,៩លានម៉ែត្រការ៉េដែលមានតម្លៃប៉ាន់ស្មានទុនវិនិយោគប្រមាណ ៨៤៣លានដុល្លារអាមេរិក ពោលគឺមានការកើនឡើងចំនួន ៣៩,២០%។
តាមរបាយការណ៍ សមត្ថកិច្ចក្រសួងបានផ្តល់លិខិតអនុញ្ញាតសាងសង់ មានចំនួន ៤៤គម្រោង មានផ្ទៃក្រឡាសំណង់ប្រមាណ១,៨លានម៉ែត្រការ៉េ គិតជាតម្លៃប៉ាន់ស្មានទុនវិនិយោគប្រមាណ ១.០៤៤លានដុល្លារអាមេរិក។ សម្រាប់សមត្ថិកិច្ចរដ្ឋបាលរាជធានី ខេត្ត មានចំនួន៤៨១ គម្រោងដែលមានផ្ទៃក្រឡាសំណង់សរុប ជាង៣៥ម៉ឺនម៉ែត្រការ៉េ ដែលមានតម្លៃប៉ាន់ស្មានទុនវិនិយោគប្រមាណ១២៩លានដុល្លារអាមេរិក។
ទោះបីគម្រោងនិងទុនវិនិយោគនៅខែកក្កដា ឆ្នាំ២០១៩ បង្ហាញសញ្ញាល្អនៃវិស័យទាំងមូលបែបនេះក្តី ប៉ុន្តែវិស័យមួយនេះបន្តជួបបញ្ហាជាច្រើន តួយ៉ាងបើតាមរបាយការណ៍បញ្ជាក់ថា បញ្ហាប្រឈមមានដូចជា មធ្យោបាយចុះត្រួតពិនិត្យការដ្ឋានសំណង់ក្នុងរាជធានីភ្នំពេញ ខេត្តកណ្តាល, ការសហការជាមួយអាជ្ញាធរដែនដី «នៅមានកម្រិត, ម្ចាស់សំណង់ក្រុមហ៊ុនសាងសង់មិនសហការ,ការយល់ដឹងរបស់មន្ត្រីតាមបណ្តារាជធានី ខេត្ត និងការត្រួតពិនិត្យតាមដានការដ្ឋានសំណង់នៅមានភាពចន្លោះប្រហោង, ការដ្ឋានភាកច្រើនដំណើរការមុនមានលិខិតអនុញ្ញាតសាងសង់ពីសមត្ថកិច្ចជំនាញនិងបញ្ហាវិវាទសំណង់មានការដោះស្រាយដោយប្រើរយៈពេលយូរ» ៕ កែសម្រួលដោយ ៖ សុឃាក់
ចែករំលែកព័តមាននេះ