ប្រទេសស៊ីរី ៖ យោងតាមអង្គការសិទ្ធិមនុស្សស៊ីរីOSDH មានប្រភពព័ត៌មានច្រើនក្នុងប្រទេសថា ការប្រយុទ្ធគ្នានានាក្នុងតំបន់អុីដលីបជាប់ព្រំដែនតួកគី ដែលរបបក្រុងដាម៉ាស់ប៉ុនប៉ងវាយដណ្ដើមយកពីពួកជីហាដនិងពួកឧទ្ទាមឯទៀតៗ ជាមួយការជួយទ្រទ្រង់កងយន្តហោះរុស្ស៊ីបណ្ដាលឲ្យមនុស្សស្លាប់យ៉ាងតិច៥១នាក់ទាំងសងខាង។
ជួយទ្រង់ទ្រង់ដោយកងយន្តហោះរុស្ស៊ី កងទ័ពស៊ីរីរយៈពេលប៉ុន្មានថ្ងៃចុងក្រោយនេះ វាយដណ្ដើមយកបានមូលដ្ឋានជាច្រើននៅខេត្តអុីដលីប ដោយបន្តការវាយលុកនៅលើដីដែលចាប់ផ្ដើមពីថ្ងៃទី៨សីហាមក ក្រោយរយៈពេល៤ខែនៃការទម្លាក់គ្រាប់បែកស្ទើររាល់ថ្ងៃ។
ចាប់តាំងពីថ្ងៃទី២១សីហាមក កងទ័ពស៊ីរីដណ្ដើមយកបានទីក្រុងយុទ្ធសាស្ត្រKHAN CHEIKHOUN ព្រមទាំងមូលដ្ឋានជាច្រើនក្នុងខេត្តហាម៉ាជិតខាង ហើយឡោមព័ទ្ធប៉ុស្តិ៍សង្កេតការណ៍មួយរបស់កងទ័ពតួកគី។ កងទ៍ពស៊ីរីនាថ្ងៃទី២៤សីហាបានបន្ថែមកម្លាំងនៅKHAN CHEIKHOUN ហើយពេលនេះកំពុងឈានទៅវាយដណ្ដើមយកតំបន់ម៉ាអារេតអាល់ណូអូម៉ាន ចុងខាងជើងខេត្តអុីដលីប។
កាលពីថ្ងៃទី២៧សីហាពួកយុទ្ធជនឧទ្ទាមនិងពួកជីហាដ បានវាយប្រហារបណ្ដាទីតាំងកងទ័ពស៊ីរីនៅភាគខាងត្បូងខេត្តនោះ។ ការប៉ះទង្គិចគ្នាយ៉ាងសាហាវផ្ទុះឡើងនៅខាងកើតក្រុងKHAN CHEIKHOUNា ក្រោយការវាយប្រហារនានារបស់ពួកជីហាដនិងពួកឧទ្ទាម លើបណ្ដាទីតាំងកងទ័ពរដ្ឋាភិបាល។ ការប្រយុទ្ធគ្នាបណ្ដាលឲ្យទាហានស៊ីរីស្លាប់២៣នាក់ហើយពួកបះបោរមានស្លាប់២០នាក់ ក្នុងនោះមានពួកជីហាដ១៣នាក់។ ម្យ៉ាងទៀតពួកឧទ្ទាម៨នាក់បានត្រូវស្លាប់ ពេលពួកគេប៉ុនប៉ងជ្រៀតចូលទៅក្បែរទីតាំងកងទ័ពរដ្ឋាភិបាលនៅក្បែរព្រលានយន្តហោះយោធា ABOU DOUHOUR។
នាថ្ងៃទី២៦សីហាការវាយប្រហារតាមអាកាសរបស់ស៊ីរីនិងរុស្ស៊ីសម្លាប់ជនស៊ីវិល១២នាក់ក្នុងតំបន់នោះ៕ (កែសម្រួលដោយ ៖ បុប្ផា)
ចែករំលែកព័តមាននេះ