រាជធានីភ្នំពេញ ៖ អភិបាលខេត្តព្រះសីហនុអាចនឹងប្រើប្រព័ន្ធដ្រូន ដើម្បីប្រមូលទិន្នន័យពីប្រព័ន្ធឡូប្រឡាយនានាក្នុងខេត្ត ដើម្បីដោះស្រាយការជន់ទឹកភ្លៀង បណ្តាឲ្យមានលិចផ្ទះប្រជាពលរដ្ឋ ។ ការប្រើប្រព័ន្ធនេះ ខណៈដែរលោក គួច…
រាជធានីភ្នំពេញ ៖ អភិបាលខេត្តព្រះសីហនុអាចនឹងប្រើប្រព័ន្ធដ្រូន ដើម្បីប្រមូលទិន្នន័យពីប្រព័ន្ធឡូប្រឡាយនានាក្នុងខេត្ត ដើម្បីដោះស្រាយការជន់ទឹកភ្លៀង បណ្តាឲ្យមានលិចផ្ទះប្រជាពលរដ្ឋ ។ ការប្រើប្រព័ន្ធនេះ ខណៈដែរលោក គួច ចំរើន អភិបាលខេត្តព្រះសីហនុបានជួបពិភាក្សាជាមួយក្រុមហ៊ុនបង្ហោះដ្រូន ដើម្បីសិក្សា និងប្រមូលទិន្នន័យពីប្រព័ន្ធអូប្រឡាយក្នុងក្រុងព្រះសីហនុ ។
យោងតាមបណ្តាញសង្គមរបស់រដ្ឋបាលខេត្តព្រះសីហនុបានឲ្យដឹងថា ក្នុងគោលបំណងរំដោះជំនន់ទឹកភ្លៀង ក្រុងអោយកាន់តែមានភាពល្អប្រសើរឡើង កាលពីទី២៧ ខែសីហានេះ លោក គួច ចំរើន បានជួបពិភាក្សាការងារ និងស្តាប់បទបង្ហាញរបស់ក្រុម ហ៊ុនបង្ហោះដ្រូន ដើម្បីសិក្សា និងប្រមូលទិន្នន័យប្រព័ន្ធអូប្រឡាយក្នុងក្រុងព្រះសីហនុ ។
ក្នុងជំនួបលោក សោម មិថុនារ័ត្ន ប្រធានក្រុមហ៊ុន KCC Cambodia Co Ltd បានលើកឡើងថា ដោយ សារតែស្ថានភាពជំនន់ទឹកភ្លៀងបង្កឱ្យមានការជន់លិចផ្ទះ ប្រជាពលរដ្ឋនាពេលកន្លងមក ក្រុមហ៊ុនផ្តោតជាសំខាន់មានដូចជា បញ្ហាទឹកភ្លៀង សណ្ឋានដី កម្ពស់ទឹកសមុទ្រដែលមានវិសាលភាពប្រឈមនឹងជំនន់ទឹកភ្លៀង ដូច្នេះយើងត្រូវមានទិន្នន័ យពីសណ្ឋានដី គម្រោងកាត់បន្ថយគ្រោះមហន្តរាយដោយជំនន់ទឹកភ្លៀង ។ លោកបានបន្តថា អ្វីដែលយើងត្រូវធ្វើពេលនេះ គឺ ៖ប្រមូលព័ត៌មានទិន្នន័យសុក្រឹត សិក្សាសណ្ឋានដី ប្រមូលព័ត៌មានពីប្រព័ន្ធអូរប្រឡាយទឹកភ្លៀង ទឹកកខ្វក់ និងទឹកស្អាត សិក្សាផ្អែកលើវិទ្យាសាស្ត្រ និងមជ្ឈមណ្ឌលវិភាគ បណ្តុះបណ្តាល និងអាប់ដែតទិន្នន័យ ម្យ៉ាងទៀតការបង្ហោះដ្រូននេះប្រើពេលប្រហែល១២សប្តាហ៍ ដើម្បីប្រមូលទិន្នន័យជាក់លាក់លើផ្ទៃដី៥.០៨០ហិកតា ក្នុងក្រុងព្រះសីហនុ ។
ជាមួយគ្នានេះដែរលោក គួច ចំរើន អភិបាលខេត្តព្រះសីហនុបានស្វាគមន៍ចំពោះក្រុមហ៊ុន KCC Cambodia Co Ltd មានគោលបំណងចូលរួមជាមួយរដ្ឋបាលខេត្តសិក្សាលើប្រពន្ធអូរប្រឡាយដាក់លូររំដោះទឹកភ្លៀង និងទឹកកខ្វក់នៅក្រុងព្រះសីហនុ ដើម្បីកែលម្អសោភ័ណភាពបរិស្ថានកាន់តែល្អប្រសើរឡើងបន្ថែមទៀត ពិតណាស់បញ្ហាប្រឈមដោយជំនន់ទឹកភ្លៀងនាពេលបច្ចុប្បន្ន ជាបន្ទុករបស់រដ្ឋបាលខេត្តក៏ដូចជា ក្រសួងមួយចំនួនកំពុងយកចិត្តទុកដាក់ក្នុងការដោះស្រាយសភាពការណ៍នៃគ្រោះមហន្តរាយដោយជំនន់ទឹកភ្លៀងសម្រាប់ខេត្តព្រះសីហនុ ៕ កែសម្រួលដោយ ៖ សុឃាក់
ចែករំលែកព័តមាននេះ