ប្រសិនបើអ្នកមិនធ្វើការផ្សព្វផ្សាយអាជីវកម្មរបស់អ្នកលើប្រព័ន្ធសង្គមទេនោះ អ្នកមិនអាចដើរទាន់អាជីវករដែលជាដៃគូប្រកួតប្រជែងអ្នកឡើយ ។ បច្ចុប្បន្ននេះប្រព័ន្ធសង្គមដើរតួយ៉ាងសំខាន់ ហើយអ្នកជំនាញបានចែករំលែកពីយុទ្ធសាស្ត្រ និងគន្លឹះក្នុងការប្រើប្រាស់ប្រព័ន្ធសង្គមដើម្បីអាជីវកម្មរបស់អ្នកដែលមានដូចខាងក្រោមនេះ ៖
១. យល់ដឹងពីប្រព័ន្ធសង្គម ៖ អ្នកស្រី Bethenny Frankel ដែលជាស្ថាបនិកក្រុមហ៊ុន Skinnygirl និងជាអ្នកវិនិយោគក្នុងកម្មវិធី Shark Tank បាននិយាយថា អ្នកគួរតែពិចារណាថា តើប្រព័ន្ធសង្គមនីមួយៗអាចធ្វើអ្វីខ្លះជូនអ្នកដែលគាំទ្រអ្នក ។ ឧទាហរណ៍ដូចជា Instagram គឺជាឧបករណ៍ដែលមានប្រសិទ្ធិភាពក្នុងផ្នែកប្រាស្រ័យទាក់ទងទៅកាន់អតិថិជនតាមរយៈរូបភាពជាដើម ។
២. បង្ហោះអ្វីដែលអ្នកគាំទ្រអ្នកចង់បាន ៖ លោក Dan Lok ដែលជាសហគ្រិនឆ្នើម និងជាអ្នកនិពន្ធសៀវភៅ Unlock It! ព្រមទាំងជាស្ថាបនិករបស់ Closers.com បានឲ្យដឹងថា អ្នកត្រូវតែដឹងច្បាស់ថានរណាជាអតិថិជនធំបំផុតហើយពួកគេចូលចិត្តប្រើប្រព័ន្ធសង្គមមួយណា រួចផ្តោតស្មារតីលើប្រព័ន្ធសង្គមនោះ ។ លោកបានបន្តទៀតថា អ្នកគួរតែបង្ហោះ ឬចែករំលែកអ្វីដែលអ្នកគាំទ្រអ្នកចង់បាន មិនមែនជាអ្វីដែលអ្នកចូលចិត្តទេ ។ អ្នកក៏អាចរក្សាការឆ្លើយឆ្លងជាមួយអ្នកមើលបានដែរតាមរយៈការសួរសំណួរ ការឆ្លើយសំណួរពួកគេ និងការចុច Like លើ Comment របស់ពួកគេជាដើម ។
៣. យល់បន្ថែមពីអ្នកគាំទ្រអ្នក៖ លោក Chris Dufey ដែលជាស្ថាបនិក និងនាយកប្រតិបត្តិបរស់ក្រុមហ៊ុន Coaches Cartel និងអ្នកនិពន្ធសៀវភៅ Your First 100 Clients បានចែករំលែកមកថា អ្នកមិនគួរគិតតែពីទទួលបានចំនួនអ្នក Follow ច្រើនទេព្រោះមិនមែនពួកគេទាំងអស់គ្នាជាអតិថិជនអ្នកឡើយ ។ ដូច្នេះអ្នកគួរតែផ្តោតស្មារតីលើការទាក់ទាញអតិថិជនដែលល្អសម្រាប់អាជីវកម្មអ្នកវិញ ។
៤. ផ្តល់ភាពបើកទូលាយ៖ ប្រព័ន្ធសង្គមដូចជា Instagram និង Twitter បានអនុញ្ញាតឲ្យមនុស្សមានការបើកទូលាយទៅកាន់អ្នកគាំទ្រដោយបង្ហាញពីរឿងក្រោយឆាកនៃពិភពលោករបស់អាជីវកម្មនីមួយៗ ។ លោក Dennis Najjar ដែលជាសហស្ថាបនិក AccountingDepartment.com បានប្រាប់ថា លោកគិតថាការចែករំលែកពីមនុស្សក្នុងក្រុមហ៊ុន និងអត្តចរិករបស់ពួកយើងបានជួយឲ្យយើងជោគជ័យ ។
ដោយហេតុដូច្នេះ លោកបានផ្តល់យោបល់ឲ្យមានការចែករំលែកស្ថានការសំខាន់ៗដែលកើតមានឡើងក្នុងក្រុមហ៊ុន ឬគំនិតថ្មីៗដែលត្រូវបានលើកឡើង ៕ កែសម្រួលដោយ ៖ សុឃាក់
ចែករំលែកព័តមាននេះ