តាមប្រភពព័ត៌មាន Soccer Laduma បានឱ្យដឹងថា កីឡាករវ័យក្មេងដែលទើបនឹងចូលលេងឱ្យក្លិប IK Junkeren ដែលជាក្លិបតូចមួយនៅលីគរបស់ណ័រវេស បានធ្វើឱ្យគ្រប់គ្នាស្គាល់តាមរយៈការសម្រេចចិត្តដ៏ចម្លែកមួយ ។
Daniel Are Knutsen បានសម្រេចចិត្តប្តូរឈ្មោះរបស់ខ្លួនជាផ្លូវការទៅជា Lionel Messi ខណៈដែលខ្លួនទើបតែមានអាយុត្រឹមតែ១៦ឆ្នាំ។ គេបានទទួលស្គាល់ថា សមត្ថភាពរបស់គេមិនអាចយកទៅប្រៀបជាមួយនឹង Lionel Messi នោះទេ តែគេបានប្តេជ្ញាចិត្តខំប្រឹងប្រែងធ្វើយ៉ាងណាឱ្យមានសមត្ថភាពប្រហែលនៅថ្ងៃអនាគត។
Lionel Messi ទីពីរនេះបានប្រាប់សារព័ត៌មាន VG ថា៖ «ខ្ញុំមានគម្រោងប្តូរឈ្មោះរបស់ខ្ញុំ ហើយខ្ញុំមាន Lionel Messi ជានិមិត្តរូបដ៏ធំសម្រាប់ខ្ញុំ។ ជាមួយនឹងការប្តេជ្ញាចិត្តទៅលើការលេងបាល់ទាត់ វាពិតជាសមនឹងឱ្យខ្ញុំធ្វើបែបនេះណាស់។ ខ្ញុំចង់និយាយថា ខ្ញុំនឹងព្យាយាមលេងឱ្យបានស្រដៀងគាត់។ ខ្ញុំមានសមត្ថភាពគ្រប់គ្រងបាល់ និង មានល្បឿនស្រដៀងនឹងគាត់»។
កីឡាករអាយុ១៦ឆ្នាំរូបនេះ បានបន្តថា៖«អ្នកដែលធ្លាប់ស្គាល់ខ្ញុំពីមុននៅតែហៅឈ្មោះចាស់របស់ខ្ញុំ។ តែអ្នកដែលទើបនឹងស្គាល់ខ្ញុំ អាចនឹងហៅខ្ញុំថា Lionel ឬ Leo»។
ប្រភព ៖ soccerladuma , កែសម្រួលដោយ ៖ សំណាង
ចែករំលែកព័តមាននេះ