រាជធានីភ្នំពេញ ៖ យុវជនម្នាក់បានមកដាក់ពាក្យបណ្តឹងនៅប៉ុស្តិ៍នគរបាលគីឡូម៉ែត្រលេខ៦ ដើម្បីឱ្យសមត្ថ កិច្ចជួយអន្តរាគមន៍ដោយសង្ស័យថា គូដណ្តឹងរបស់ខ្លួនត្រូវមេខ្យល់នាំយកទៅលក់នៅប្រទេសចិន ព្រមទាំងទទូចសុំឱ្យសមត្ថកិច្ចហៅបងស្រីរបស់មេខ្យល់មកសាកសួរ ។ ហេតុការណ៍នេះ បង្កឲ្យមានការភ្ញាក់ផ្អើលឡើង…
រាជធានីភ្នំពេញ ៖ យុវជនម្នាក់បានមកដាក់ពាក្យបណ្តឹងនៅប៉ុស្តិ៍នគរបាលគីឡូម៉ែត្រលេខ៦ ដើម្បីឱ្យសមត្ថ កិច្ចជួយអន្តរាគមន៍ដោយសង្ស័យថា គូដណ្តឹងរបស់ខ្លួនត្រូវមេខ្យល់នាំយកទៅលក់នៅប្រទេសចិន ព្រមទាំងទទូចសុំឱ្យសមត្ថកិច្ចហៅបងស្រីរបស់មេខ្យល់មកសាកសួរ ។ ហេតុការណ៍នេះ បង្កឲ្យមានការភ្ញាក់ផ្អើលឡើង កាលពីវេលាម៉ោងប្រមាណ១០និង៣០នាទីព្រឹកថ្ងៃទី២៤ ខែសីហា ឆ្នាំ២០១៩ នៅប៉ុស្តិ៍នគរបាលរដ្ឋបាលគីឡូម៉ែត្រលេខ៦ ខណ្ឌឫស្សីកែវ បន្ទាប់ពីនារីជាគូដណ្តឹងបានទាក់ទងតាមហ្វេសប៊ុកមកថា រូបនាងត្រូវបានគេនាំយកទៅប្រទសចិន ហើយកំពុងតែអត់ផ្ទះស្នាក់នៅ ស្ថិតនៅចំណុចព្រំប្រទល់វៀតណាម-ចិន ។
ទោះបីជាយ៉ាងណាក្តី នេះជាការព្រួយបារម្ភរបស់បុរសជាគូដណ្តឹង ព្រោះនាងបានចាកចេញពីប្រទេស
ទៅជាមួយនារីម្នាក់ ដែលគេសង្ស័យថា ជាមេខ្យល់ ដោយពុំបានប្រាប់ឪពុកម្តាយ និងគូដណ្តឹងឲ្យបានដឹងឡើយប្រៀបដូចចាញ់បោកគេ ។ បុរសដែលមកដាក់ពាក្យបណ្តឹងនេះឈ្មោះ អ៊ុក សុជាតិ អាយុ៣៣ឆ្នាំ រស់នៅក្នុងសង្កាត់គីឡូម៉ែត្រលេខ៦ ជាអតីតពលករនៅកូរ៉េ និងកំពុងរៀនភាសាជប៉ុនត្រៀមទៅធ្វើពលករនៅប្រទេសជប៉ុននាពេលខាងមុខ ។ ចំណែកគូដណ្តឹងឈ្មោះ ញ៉ សុខច័ន្ទ ហៅតក់ អាយុ២១ឆ្នាំ រស់នៅឃុំរក្សជ័យ ស្រុកបាភ្នំ ខេត្តព្រៃវែង។ រីឯស្ត្រីជាមេខ្យល់ដែលរងការចោទប្រកាន់នោះឈ្មោះ ថោង ស្រីរ័ត្ន អាយុជាង២០ឆ្នាំ ស្នាក់នៅមិនពិតប្រាកដ ។
តាមបុរសដែលជាគូដណ្តឹង បានឲ្យដឹងថា ខ្លួនបានស្គាល់នាង សុខច័ន្ទ តាមរយៈការលេងហ្វេសប៊ុក ហើយស្រឡាញ់គ្នាប្រមាណ៣ឆ្នាំមកហើយ ខណៈដែលខ្លួនជាពលករនៅប្រទេសកូរ៉េ ។ បន្ទាប់ពីស្រឡាញ់គ្នាយ៉ាងល្អូកល្អឺន ពេលមកពីកូរ៉េវិញខ្លួនក៏បានចូលដណ្តឹងនាងកាលពី១ឆ្នាំមុន ដើម្បីយកធ្វើជាគូអនាគត ។ លុះក្រោយមក ពួកគេក៏បានសម្រេចចិត្តប្រឡងចូលរៀនភាសាជប៉ុនជាប់ទាំង២នាក់ ដើម្បីទៅធ្វើពលករនៅប្រទេសជប៉ុន តែខ្លួនបានរៀនចប់មុន ហើយត្រៀមទៅធ្វើពលករនៅជប៉ុននាខែធ្នូខាងមុខ ។ ចំណែកនាង សុខច័ន្ទ ទៅជប៉ុននៅវគ្គបន្ទាប់ ។
បុរសជាគូដណ្តឹងឲ្យដឹងទៀតថា ស្រាប់តែនៅវេលាម៉ោងប្រមាណ២រំលងអធ្រាត្រឈានចូលថ្ងៃទី២៣ ខែសីហា គូដណ្តឹងរបស់ខ្លួនបានទូរស័ព្ទតាមរយៈហ្វេសប៊ុកប្រាប់ថា រូបនាងត្រូវបានឈ្មោះ ថោង ស្រីរ័ត្ន នាំយកទៅប្រទេសចិន ទៅដល់ព្រំប្រទល់វៀតណាម-ចិនតាំងពីថ្ងៃទី២០ ខែសីហា ដោយពុំមានផ្ទះសំណាក់ដេកនោះទេ ។ ការទាក់ទងគ្នារហូតដល់ម៉ោងប្រមាណជាង១រសៀល ត្រូវគូដណ្តឹងប្រាប់មកវិញថា មានថៅកែជាជនជាតិចិន យករថយន្តមកដឹកចូលទៅប្រទេសចិនហើយ រួចក៏ទាក់ទងលែងបានដោយហ្វេសប៊ុកត្រូវគេBlock ចោល ។
បុរសជាគូដណ្តឹងរៀបរាប់ទៀតថា នៅព្រឹក ថ្ងៃទី២៥ ខែសីហា ខ្លួនបានទទួលឆាតពីស្ត្រីដែលសង្ស័យជាមេខ្យល់ប្រាប់ថា បើចង់ឲ្យនាងត្រឡប់មកវិញ ឱ្យផ្ញើលុយទៅឱ្យ ហើយក្រោយមកហ្វេសប៊ុកក៏បានBlock ទៀត ។ បន្ទាប់ពីដាក់ពាក្យបណ្តឹង នគរបាលក៏បានហៅបងស្រីរបស់មេខ្យល់មកសាកសួរ តែនាងប្រាប់ថា អត់ដឹងទេ ។ ទោះបីជាយ៉ាងណា បុរសជាគូដណ្តឹងនោះនិយាយថា មុនពេលឡើងរថយន្តឆ្លងទៅប្រទេសវៀតណាម គឺមេខ្យល់មករៀបចំអីវ៉ាន់ចេញពីផ្ទះបងស្រីនាងនៅក្នុងសង្កាត់គីឡូម៉ែត្រលេខ៦ ។
តាមអ្នកធ្លាប់ស្គាល់ស្ត្រីឈ្មោះ ថោង ស្រីរ័ត្ន និយាយថា កន្លងមកនាងគឺជាអ្នកធ្លាប់រកស៊ីគួកជេស្រីក្រមុំៗ យកទៅលក់ឱ្យតាតាដែលមានលុយ ជាហេតុធ្វើឲ្យគេមានការសង្ស័យថា នាងបាននាំគូដណ្តឹងបុរសរូបនោះ យកទៅលក់នៅប្រទេសចិន ។ តាមបុរសរូបនោះឲ្យដឹងទៀតថា នៅថ្ងៃទី២៦ ខែសីហា ខ្លួននឹងទៅដាក់ពាក្យបណ្តឹងនៅស្ថានទូតចិនដើម្បីជួយអន្តរាគមន៍ឲ្យគូដណ្តឹងបានត្រឡប់មកប្រទេសវិញ ។ ទោះបីជាយ៉ាងណា ទៀតក្តីគេពុំបានដឹងឱ្យច្បាស់ថា នាងត្រូវបានគេនាំយកទៅលក់មែនឬយ៉ាងណានោះទេ ៕ (សម្រួលដោយ៖ ស្រីណា)
ចែករំលែកព័តមាននេះ