មុខរបរអាចារ្យមិនមែនចេះតែកាក់កបដូចគ្នាទាំងអស់នោះទេ អាចារ្យពួកខ្លះក៏កាក់កបខ្លាំង ឯអាចារ្យខ្លះក៏មិនសូវជាទទួលផលនៅតាមពិធីការនានា ពិសេសក្នុងពិធីបុណ្យសព អាចារ្យខ្មែរនឿយហត់ខ្លាំង តែទទួលបានប្រាក់កម្រៃចាញ់អាចារ្យចិនដាច់តែម្តង ។
អ្នកស្រី សុគឿន រស់នៅភូមិអូរអណ្តូង១ បានឲ្យដឹងថា គាត់ធ្លាប់រៀបចំបុណ្យសពម្តាយរបស់គាត់ នៅពេលនោះក៏បានអញ្ជើញអាចារ្យចិនមករៀបចំផងដែរ ព្រោះគាត់ជាប់សែស្រឡាយចិនខ្លះដែរ ។ បើតាមអ្នកស្រីសុគឿនប្រាប់ថា ៖ «ការរៀបចំពិធីតាមបែបចិននោះ ខ្ញុំបានចំណាយលើការចាយវាយអស់ប្រមាណជិត៣ពាន់ដុល្លារសម្រាប់មួយចប់កម្មវិធី» ។ គាត់ថា អាចារ្យចិនបានបង្គាប់ឲ្យយើងទិញគ្រឿងប្រដាប់សម្រាប់បុណ្យតាមការគូសវាសរបស់គាត់ ហើយការទិញនោះទៀតសោតមិនត្រូវឲ្យមានការតថ្លៃអ្វីនោះឡើយ គឺគាត់ត្រូវចំណាយអស់ប្រាក់ជិត៣ពាន់ដុល្លារមួយចប់កម្មវិធី តែបើបូករួមនឹងជូនអាចារ្យធំ១៨៧ដុល្លារ និងអាចារ្យរងបីនាក់ ម្នាក់១០០ដុល្លារទៀតផង សរុបជាង៣ពាន់ដុល្លារ ។
អ្នកស្រីបានឲ្យដឹងទៀតថា ៖ «ចំពោះអាចារ្យខ្មែរវិញយើងក៏មិនចោលដែរ ព្រោះជាទំនៀមទម្លាប់ គឺតម្រូវឲ្យអាចារ្យខ្មែរជាអ្នកធ្វើពិធីមុនទាំងអស់ទើបឲ្យអាចារ្យចិនធ្វើពិធីតាមក្រោយ តែបន្តិចបន្តួចក៏រួចរាល់ ។ គាត់ថា អាចារ្យខ្មែរដែលមករៀបចំពិធីនោះ គឺមិនបានទាមទារតម្លៃខ្លួនប៉ុន្មាននោះឡើយ ពោល គឺតាមសទ្ធារបស់ម្ចាស់ទានតែប៉ុណ្ណោះ ហើយតម្លៃនោះទៀតសោតក៏មិនខ្ពស់ដូចអាចារ្យចិនដែរ អ្នកមានធនធានល្មមៗក៏អាចធ្វើបានតាមការគួរ ។
បើនិយាយពីរឿងអាចារ្យចិន និងអាចារ្យខ្មែរ ដូនជីមួយរូបសុំមិនបញ្ចេញឈ្មោះ ស្នាក់នៅវត្តមួយ ក្នុងសង្កាត់ព្រែកប្រា បានប្រាប់ឱ្យដឹងថា តាមធម្មតាអាចារ្យសព ឬហៅថា អាចារ្យយូគីនោះ គឺមិនអាចខ្វះបានឡើយនៅក្នុងពិធីបុណ្យសព ដើម្បីរៀបចំទៅតាមទំនៀមទម្លាប់ខ្មែរ ។ គាត់ថា តាមពិតទៅអាចារ្យសពមិនមែនទាល់តែអ្នកនោះស្លាប់ ហើយបានអញ្ជើញមកនោះទេ ប្រសិនបើឃើញអ្នកជំងឺបែបមិនស្រួលហើយ សាច់ញាតិក៏ទៅអញ្ជើញអាចារ្យនោះមកមុន អាចមួយថ្ងៃ ឬពីរថ្ងៃ ឬក៏លើសនេះទៅតាមថ្ងៃអង្សា ដើម្បីសូត្រធម៌ មុននឹងអ្នកនោះស្លាប់ ។
ដូច្នេះអាចារ្យទាំងនោះត្រូវមកសូត្រធម៌ និងដេកកំដរសព២ ឬ៣ថ្ងៃមុន ប៉ុន្តែបើនិយាយពីប្រាក់កម្រៃដែលទទួលបាននោះមិនច្រើនឡើយ ពោល គឺទៅតាមសទ្ធាដែលម្ចាស់បុណ្យសពឲ្យតែប៉ុណ្ណោះ ។ លោកយាយប្រាប់ថា តាមតែធ្លាប់ដឹងជាច្រើនមក គ្រួសារសពល្មមៗយ៉ាងច្រើនជូនអាចារ្យពី១០ទៅ១៥ម៉ឺនរៀល តែបើប៉ះចំគ្រួសារគេធូរធារក៏អាចលើសនេះបន្តិចបន្តួច ។
ដោយឡែកសម្រាប់អាចារ្យចិនវិញ គេមករៀបចំពិធីតែមួយភ្លែតៗ អាចទទួលបានប្រាក់កម្រៃយ៉ាងតិចក៏ក្បែររយដុល្លារ បើប្រៀបទៅនឹងអាចារ្យខ្មែរវិញខុសគ្នាដាច់ស្រឡះ ។ ជាមួយគ្នានេះលោកយាយបានអំពាវនាវសូមឲ្យមហាជនជួយអភិរក្សអាចារ្យខ្មែរ និងឲ្យតម្លៃអាចារ្យខ្មែរផង ព្រោះប្រសិនបើមានសាច់ញាតិណាម្នាក់ជិតស្លាប់ ឬស្លាប់នោះ គឺមានតែអាចារ្យខ្មែរប៉ុណ្ណោះដែលជួយដឹកនាំពិធីមុនគេ ចំណែកអាចារ្យចិនទាល់តែជិតឆ្លងពិធីបុណ្យបានគេអាចមកធ្វើកិច្ចតែបន្តិចបន្តួចក៏ត្រឡប់ទៅវិញបានទាំងលុយច្រើនសន្ធឹក ៕ (អត្ថបទដោយសាន សារិន) កែសម្រួលដោយ ៖ សុឃាក់
ចែករំលែកព័តមាននេះ