ព្រៃវែង៖ នៅក្នុងកិច្ចខិតខំប្រឹងប្រែងកាត់បន្ថយភាពក្រីក្រ ថ្នាក់ដឹកនាំប្រទេសតែងតែលើកទឹកចិត្តប្រជាពលរដ្ឋក្នុងការប្រកបរបរបន្ទាប់បន្សំ ដូចជាការចិញ្ចឹមជ្រូក មាន់ ទា ឬក៏បើកកសិដ្ឋានផ្សេងៗដើម្បីរកចំណូលបន្ថែមពីរបរធ្វើកសិកម្មដំណាំស្រូវ។
តួយ៉ាងនៅខេត្តព្រៃវែងក្រៅពីដំណាំស្រូវ ផលិតកម្មសត្វ ពិសេសការធ្វើផលិតកម្មចិញ្ចឹមទាយកស៊ុត គឺមានសក្តានុពលយ៉ាងខ្លាំង ជាក់ស្តែងទូទាំងខេត្តមានកសិដ្ឋានចិញ្ចឹមទាយលស៊ុត ១៣៧កន្លែង សរុបមេទាជាង ២លានក្បាល។ ផលិតផលស៊ុតមួយផ្នែកធំដែលផ្គត់ផ្គង់ទៅឲ្យទីផ្សាររាជធានីភ្នំពេញនាពេលបច្ចុប្បន្នគឺជាផលិតផលស៊ុតចេញពីខេត្តព្រៃវែង។ នេះបើយោងតាមក្រសួងកសិកម្ម រុក្ខាប្រមាញ់ និងនេសាទ នាឱកាសដែលលោករដ្ឋមន្ត្រី វេង សាខុន បានធ្វើដំណើរចុះទៅតាមខេត្តពិនិត្យមើលការធ្វើអាជីវកម្ម ការដាំដំណាំ និងការចិញ្ចឹមសត្វរបស់ប្រជាពលរដ្ឋនៅខេត្តព្រៃវេង នាថ្ងៃទីសៅរ៍ ទី ២៤ ខែសីហា កន្លងទៅនេះ ។
លោក ចុង ជន ម្ចាស់សិប្បកម្មភ្ញាស់ស៊ុតទា នៅភូមិស្នាយភ្លើង ឃុំព្រៃព្នៅ បានឲ្យដឹងថាគាត់ប្រកាន់យករបរភ្ញាស់ស៊ុតទានេះជាង ១០ឆ្នាំមកហើយ ដោយមានការរីកចម្រើនជាបន្តបន្ទាប់រហូតមកទល់បច្ចុប្បន្នអាចភ្ញាស់ស៊ុតបាន ៥ម៉ឺនកូនក្នុងរយ:ពេល ៣ថ្ងៃ និងក្នុង១ខែបញ្ចេញកូនលក់ឲ្យកសិករជា ៥០កូន កូនទាញី ១៥០០-១៨០០រៀល/ក្បាល ហើយក្នុង ១ឆ្នាំ អាចរកចំណូលបានពី១៨ពាន់ ទៅ ២ម៉ឺនដុល្លារ ។ លោករដ្ឋមន្ត្រី បានបង្ហាញនូវការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងលើមុខរបរដ៏សំខាន់ដែលអាចជួយបង្កើតចំណូលឲ្យដល់គ្រួសារ និងជាពិសេសចំណូលដ៏ខ្ពស់ដែលលោក ចុង ជន ទទួលបាន ពិតជាបានសម្រេចតាមចក្ខុវិស័យរបស់រាជរដ្ឋាភិបាលនាឆ្នាំ២០៥០ ដែលចង់ឲ្យប្រជាជលយើងម្នាក់ៗមានចំណូល ១ម៉ឺន ទៅ ១,៥ ម៉ឺនដុល្លារ។
ទាក់ទងការងារបច្ចេកទេស លោក វេង សាខុន បានណែនាំឲ្យអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយមន្ទីរចុះជួយផ្សព្វផ្សាយ និងបណ្តុះបណ្តាលបច្ចេកទេសចិញ្ចឹម ពិសេសការការពារជំងឺ និងការធ្វើជីវសុវត្ថិភាពនៅកន្លែងចិញ្ចឹម ដេប៉ូចែកចាយចំណី និងកន្លែងភ្ញាស់កូន ដើម្បីកាត់បន្ថយហានីភ័យដែលអាចកើតមានឡើង ៕ កែសម្រួលដោយ ៖សុឃាក់
ចែករំលែកព័តមាននេះ