ខេត្តសៀមរាប៖ នាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ ទទួលបានវត្ថុបុរាណចំនួន៥ប្រភេទពីអង្គភាពនគរឹបាលការពារបេតិកភណ្ឌ ប្រចាំតំបន់អង្គរយកទៅរក្សាទុកបណ្តោះអាសន្ននៅការិយាល័យនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ ដើម្បីចុះបញ្ជីទៅតាមបច្ចេកទេស និងរៀបចំសំណើសម្រាប់យកទៅរក្សាទុកនៅសារមន្ទីរនរោត្តម សីហនុអង្គរ ។
យោងតាមផេកហ្វេសប៊ុកក្រសួងវប្បធម៌ និងវិចិត្រសិល្បៈផ្សាយឲ្យដឹងថា វត្ថុបុរាណទាំង៥ប្រភេទដែលទទួលបាន កាលពីពេល ថ្មីៗកន្លងមករួមមាន ៖ ១)បំណែកដងខ្លួនព្រះពុទ្ធរូប ធ្វើពីថ្មភក់ មានកម្ពស់៦២សង្ទីម៉ែត្រ ទទឹង៣៨ សង្ទីម៉ែត្រ និងកម្រាស់១៨ ។ ២)បំណែកកញ្ចាំង ធ្វើពីថ្មភក់ មានកម្ពស់៤៣ សង្ទីម៉ែត្រ ទទឹង៣៤ សង្ទីម៉ែត្រ និងកម្រាស់៣០ សង្ទីម៉ែត្រ ។ ៣)បំណែកភ្នែនទេវរូប ធ្វើពីថ្មភក់ មានកម្ពស់១១ សង្ទីម៉ែត្រ ទទឹង១១សង្ទីម៉ែត្រ និងកម្រាស់៩សង្ទីម៉ែត្រ ។
៤)កុលាលភាជន៍(ថូ) ធ្វើពីដីដុត កម្ពស់២៥ សង្ទីម៉ែត្រ និងទទឹង២០សង្ទីម៉ែត្រ ។ ៥) កុលាលភាជន៍(ខួច) ធ្វើពីដីដុត កម្ពស់៧,៥ សង្ទីម៉ែត្រ និងទទឹង៨ សង្ទីម៉ែត្រ ។
វត្ថុបុរាណទាំង៥ប្រភេទត្រូវបានអង្គភាពនគរបាលការពារបេតិកភណ្ឌ ប្រចាំតំបន់អង្គរទទួលបានតាមរយៈប្រជាជនដែលប្រទះឃើញដោយចៃដន្យក្នុងតំបន់ខ្លួនរស់នៅ ហើយរាយការណ៍ដល់អាជ្ញាធរមូលដ្ឋាន ដែលមានសមត្ថកិច្ចដើម្បីយកមករក្សាទុក ។ បន្ទាប់ពីទទួលបានអង្គភាពនគរបាលការពារបេតិកភណ្ឌប្រចាំតំបន់អង្គរ បានប្រគល់ឱ្យអាជ្ញាធរជាតិអប្សរាដែលជាស្ថាប័នមាន សមត្ថកិច្ចក្នុងការគ្រប់គ្រង និងថែរក្សា ។
រមណីយដ្ឋានអង្គរសម្បូរបុរាណដ្ឋានមានសំណល់បុរាណវិទ្យាទាំងលើដី និងក្រោមដី ដូច្នេះអាជ្ញាធរជាតិអប្សរា បានអំពាវនាវដល់សាធារណជនចូលរួមថែរក្សា ចៀសវាងការជីកកកាយ ឬឈូសឆាយទីតាំងបុរាណដ្ឋាន និងរាយការណ៍ដល់អាជ្ញាធរមានសមត្ថកិច្ច ឬអាជ្ញាធរជាតិអប្សរាក្នុងរកណីបានជួបប្រទះនូវបុរាណវត្ថុទាំងនោះ ។
អាជ្ញាធរជាតិអប្សរា បានថ្លែងអំណរគុណដល់ស្ថាប័នពាក់ព័ន្ធដែលយកចិត្តទុកដាក់ការពារនូវសម្បត្តិបេតិកភណ្ឌដែលជារបស់យើងទាំងអស់គ្នា ពិសេសប្រជាពលរដ្ឋដែលបានចូលរួមថែរក្សាតាមរយៈការប្រគល់ ឬផ្តល់ព័ត៌មានដល់សមត្ថកិច្ច ។ សកម្មភាពនេះបញ្ជាក់ឱ្យឃើញពីការយល់ដឹងពីតម្លៃនៃមរតកដូនតា និងចង់ថែរក្សាឱ្យគង់វង្សសម្រាប់កូនចៅជំនាន់ក្រោយ ៕ កែសម្រួលដោយ ៖សុឃាក់
ចែករំលែកព័តមាននេះ