អតីតតារាចម្រៀងដ៏ល្បីល្បាញបំផុតកាលពីទស្សវត្សរ៍ឆ្នាំ៨០ និង៩០ អ្នកស្រី សន ចរិយា បានបង្ហាញខ្លួនធ្វើជាគណកម្មការមេប្រយោគផ្តល់ពិន្ទុដល់បេក្ខជន និងបេក្ខនារីដែលចូលរួមប្រឡងចម្រៀងខ្មែរជាសកល កាលពីពេលថ្មីៗនេះនៅក្នុងរដ្ឋកាលីហ្វរញ៉ា សហរដ្ឋអាមេរិក ។ ការបង្ហាញវត្តមានរបស់អ្នកស្រីនាពេលនេះបានធ្វើឲ្យទស្សនិកជនដែលធ្លាប់ស្គាល់ និងធ្លាប់បានស្តាប់សំនៀងរបស់អ្នកស្រីមានការការភ្ញាក់ផ្អើល ខណៈពេលដែលអ្នកស្រីបាត់ដំណឹងសូន្យឈឹង និងមិនសូវចេញមុខមាត់អ្វីឡើយ ។
ទោះជាយ៉ាងណាក៏ដោយវត្តមានរបស់អ្នកស្រី សន ចរិយា នៅអាមេរិកនោះ គឺមិនមែនជារឿងភ្ញាក់ផ្អើលសម្រាប់ប្រជាជនខ្មែរដែលកំពុងតែរស់នៅលើទឹកដីមហាអំណាចមួយនេះឡើយ ពោល គឺអ្នកស្រីតែងតែបង្ហាញមុខជារឿយៗនៅពេលមានកម្មវិធីសិល្បៈខ្មែរម្តងៗ ។ អ្នកស្រី សន ចរិយា បានបង្ហាញមុខជាគណកម្មការមេយោគនៅក្នុងវគ្គផ្តាច់ព័ត្រជាមួយនឹងអតីតតារាភាពយន្តដ៏ល្បីល្បាញ គឺលោក យស បូវណ្ណៈ រួមជាមួយនឹងតារាចម្រៀងជើងចាស់មួយចំនួនទៀតផងដែរ ។
បើយោងតាមការឲ្យដឹងពីអ្នកស្រី លី ស៊ីថារី ភរិយារបស់លោក យស បូវណ្ណៈ បានអះអាងថា ការបង្ហាញវត្តមានចូលរួមពីអតីតតារាចម្រៀងអ្នកស្រី សន ចរិយា នាពេលនេះ គឺជាមិនមែនជាលើកដំបូងឡើយ ពោលអ្នកស្រីបានចូលរួមក្នុងកម្មវិធីដូចគ្នានេះប្រមាណ ៤ឆ្នាំជាប់គ្នាមកហើយ ។
អ្នកស្រីបញ្ជាក់ថា អតីតតារាចម្រៀងរូបនេះតែងតែបង្ហាញខ្លួន និងចូលរួមលើកស្ទួយវិស័យសិល្បៈខ្មែរជាបន្តបន្ទាប់ បើទោះបីជាអ្នកស្រីមានវ័យរាងចំណាស់ និងកំពុងសាងជីវភាពគ្រួសារនៅទឹកដីអាមេរិកនេះអស់ជាច្រើនក៏ដោយ ។ បើតាមអ្នកស្រី លី ស៊ីថារី អ្នកស្រី សន ចរិយា គឺជាអតីតតារាចម្រៀងមួយរូប ក្នុងចំណោមអតីតតារាជើងចាស់ជាច្រើនទៀតដែលរស់នៅអាមេរិកគឺនៅតែប្រកាន់ជំហរចូលរួមលើកស្ទួយ និងថែរក្សានូវបទចម្រៀងមរតកដើមជានិច្ចហើយជារឿយៗពួកគាត់តែងតែបកស្រាយចម្រៀងជំនាន់ដើម ដោយមិនដែលច្រៀងចម្រៀងសម័យថ្មីនេះឡើយ ។
អតីតតារាចម្រៀង និងជាតារាសម្ដែងដ៏ល្បីល្បាញ ក្នុងទសវត្សរ៍ ៨០-៩០ អ្នកនាង សន ចរិយា គឺតារាចម្រៀងម្នាក់ដែលមានសំឡេងពីរោះរណ្ដំ ជាពិសេសក្នុងបទ «ពាក្យថាស្នេហ៍» និង «វាលសោះខ្យល់» ព្រមទាំងបទចម្រៀងជាច្រើនទៀត ។ អ្នកស្រីសន ចរិយា ជាតារាចម្រៀងធ្លាប់មានឈ្មោះល្បីរួមជំនាន់ជាមួយអ្នកស្រី ឆោម ឆវិន និងអ្នកស្រី សុខ សុខុម ជាដើម ហើយអ្នកស្រីមានស្នាដៃជាច្រើនដែលបន្សល់ទុកក្នុងពិភពសិល្បៈមុនពេលចេញទៅរស់នៅប្រទេសអាមេរិក ។
អ្នកស្រី សន ចរិយា ក៏ធ្លាប់ជាអតីតភរិយារបស់អ្នកចម្រៀងល្បីឈ្មោះលោក ប៊ុន ចាន់ថន ម្ចាស់បទ «អានីដួងចិត្ត» ដែលបានលាចាកលោកកាលពីប៉ុន្មានឆ្នាំមុន មុនពេលអ្នកស្រីបានរៀបការជាមួយស្វាមីថ្មីនៅលើទឹកដីអាមេរិក និងសាងជីវភាពនៅក្នុងទឹកដីមួយនេះ រហូតមកទល់បច្ចុប្បន្ន ៕ កែសម្រួលដោយ ៖ សុឃាក់
ចែករំលែកព័តមាននេះ