រាជធានីភ្នំពេញ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភានៅរសៀលថ្ងៃទី២៥ ខែសីហានេះបានដឹកនាំគណៈប្រតិភូជាន់ខ្ពស់សភានៃក្រកម្ពុជាទៅចូលរួមមហាសន្និបាតអន្តរសភាអាស៊ានដែលហៅកាត់ថា AIPA លើកទី៤០ នៅទីក្រុងបាងកក ព្រះរាជាណាចក្រថៃ ពីថ្ងៃទី២៥ ដល់ថ្ងៃទី៣០ ខែសីហានេះ ។
យោងតាមហ្វេសប៊ុកសភាបានឲ្យដឹងថា សម្ដេច ហេង សំរិន នៅថ្ងៃទី២៥ ខែសីហា បានឲ្យដឹងថា អន្តរសភាអាស៊ានដែលហៅកាត់ថា (AIPA) ជាអង្គការអន្តរសភាជាតំណាងស្ថាប័ននីតិប្បញ្ញត្តិនៃបណ្តាលប្រទេសសមាជិកសមាគមប្រជាជាតិអាស៊ីអាគ្នេយ៍ (ASEAN) ដែលមានសមាជិក១០ប្រទេស គឺប្រទេសប្រ៊ុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា សឹង្ហបុរី ថៃ វៀតណាម និងហ្វីលីពីន ។
AIPA ជាការប្រមូលផ្តុំសំឡេងប្រជាពលរដ្ឋក្នុងសហគមន៍អាស៊ាន ជាដៃគូអាស៊ាន ក្នុងការជំរុញឱ្យបានសម្រេចបាននូវគោលដៅសហគមន៍អាតែមួយ ។ សម្ដេចបន្តថា មហាសន្និបាត AIPA នៅឆ្នាំនេះ នឹងជជែកពិភាក្សាគ្នាក្រោមមូលបទ «ការលើកកម្ពស់ភាពជាដៃគូសភា ដើម្បីសហគមន៍ប្រកបដោយចីរភាព» ។ កំឡុងពេលបំពេញការងារសម្តេច និងគណៈប្រតិភូនឹងចូលប្រជុំពិភាក្សា និងជជែកលើបញ្ហាសំខាន់ ដើម្បីបម្រើផលប្រយោជន៍ជូនជាតិមាតុភូមិ និងប្រជាជន ទៅតាមគណៈកម្មការសំខាន់ដូចជា កិច្ចប្រជុំគណៈកម្មាធិការប្រតិបត្តិគណៈកម្មាធិការសមាជិកសភាស្ត្រី គណៈកម្មការនយោបាយ គណៈកម្មការសេដ្ឋកិច្ច គណៈកម្មការសង្គមកិច្ច គណៈកម្មការរៀបចំ និងកិច្ចប្រជុំពាក់ព័ន្ធរវាង AIPA ជាមួយបណ្តាប្រទេសសង្កេតការណ៍ និងអង្គការដៃគូអន្តរជាតិជាដើម ។
វត្តមានរបស់គណៈប្រតិភូជាន់ខ្ពស់សភាកម្ពុជានៅលើឆាកអន្តរជាតិ គឺជាការបំពេញបេសកកម្មការទូតសភាកម្ពុជា នៅក្នុងការចូលរួមកសាងសុខសន្តិភាព ស្ថិរភាព និងការអភិវឌ្ឍប្រកបដោយចីរភាព នៅក្នុងតំបន់ និងពិភពលោក ៕ កែសម្រួលដោយ ៖សុឃាក់
ចែករំលែកព័តមាននេះ