រាជធានីភ្នំពេញ ៖ ខណៈដែលការវិនិយោគជាច្រើនពីសំណាក់វិនិយោគិនអន្តរជាតិ ជាពិសេសវិនិយោគិនចិនដែលសម្រុកទៅកាន់ខេត្តព្រះសីហនុ សាងសង់សណ្ឋាគារ និងកាស៊ីណូ ជាដើមនោះ ក៏បានធ្វើឱ្យកំណើនប្រជាជននៅទីនោះក៏កាន់តែច្រើនដែរ ដូច្នេះបញ្ហាហេដ្ឋារចនាសម្ព័ន្ធ ជាពិសេសប្រព័ន្ធលូទឹកស្អុយបានបង្កជាបញ្ហាសម្រាប់ខេត្តមាត់សមុទ្រមួយនេះ។ ដើម្បីដោះស្រាយពីបញ្ហានេះ ក្រសួងសាធារណៈការនិងដឹកជញ្ជូន បានសិក្សាពីគម្រោងប្លង់មេ និងគម្រោងអភិវឌ្ឍន៍ប្រព័ន្ធទឹកកខ្វក់នៅខេត្តនេះ ដើម្បីរៀបចំការចំណាយនិងគៀងគរមូលនិធិ ដើម្បីអភិវឌ្ឍន៍។
បើតាមលោក ស៊ុន ចាន់ថុល ទេសរដ្ឋមន្ត្រីនិងជារដ្ឋមន្ត្រីក្រសួងសាធារណៈការ និងដឹកជញ្ជូនបានមានប្រសាសន៍ថា ការចំណាយសរុបទៅលើការអភិវឌ្ឍន៍ ហេដ្ឋារចនាសម្ព័ន្ធ ប្រព័ន្ធលូទឹកស្អុយ ទាំងមូលប្រមាណ១៧០លានដុល្លារអាមេរិក ដែលក្នុងនោះត្រូវអភិវឌ្ឍន៍ទៅលើប្រព័ន្ធចម្រោះទឹកចំណុះ៤ម៉ឺនម៉ែត្រគូប ចំណាយប្រាក់ប្រមាណ៥០លានដុល្លារអាមេរិក កសាងប្រព័ន្ធលូ ៤៥គីឡូម៉ែត្រត្រូវចំណាយប្រាក់៤០លានដុល្លារអាមេរិក អភិវឌ្ឍន៍លូតូចៗតភ្ជាប់ពីលំនៅឋានពលរដ្ឋ ពីសណ្ឋាគារ និងអគារពាណិជ្ជកម្មនានាទៀត ត្រូវចំណាយប្រាក់ប្រមាណ៨លានដុល្លារអាមេរិក, សាងសង់កន្លែងបូមទឹកកខ្វក់ពីលូ ចូលមកកន្លែងចម្រុះ ចំណាយប្រាក់ ១៥លានដុល្លារអាមេរិកបន្ថែមទៀត ។
លោកបានបន្តថា «សរុបតែប្រព័ន្ធលូទឹកកខ្វក់ យើងត្រូវចំណាយប្រាក់ប្រមាណជាង១៤០លានដុល្លារអាមេរិក ហើយនៅប្រព័ន្ធលូទឹកភ្លៀង សម្រាប់រំដោះទឹកភ្លៀងកុំអោយជន់លិច ជាង២០គីឡូម៉ែត្រ ត្រូវចំណាយថវិកាប្រមាណ២៥លានដុល្លារអាមេរិកបន្ថែមទៀត សរុបទាំងអស់ជាង១៧០លានដុល្លារអាមេរិក » ។ លោករដ្ឋមន្ត្រីបានបន្ថែមថា នេះគ្រាន់តែជាគម្រោងនៃការចំណាយប៉ុណ្ណោះ ហើយបញ្ហាថវិកាមកពីណានោះ ជាភារៈរបស់ក្រសួងសេដ្ឋកិច្ច និងហិរញ្ញវត្ថុជាអ្នកសម្រេចថាយកមកពីណា ។
លោក ស៊ុន ចាន់ថុល បន្តថា «ថវិកាទាំងនេះ វាអាចជាថវិកាកម្ចី ជាជំនួយ រឺជាថវិការបស់រដ្ឋាភិបាលផ្ទាល់ ហើយ ការអនុវត្តន៍ការងារនេះ យើងរំពឹងថានឹងចាប់ផ្ដើមឆាប់ៗនេះ បន្ទាប់ពីបានសិក្សានិងចុះវាយតម្លៃរួចជាស្រេចមក » ។ លោកបន្ថែមថា នៅពេលដែលការសាងសង់ប្រព័ន្ធលូទាំងនេះរួចជាស្រេច នៅថ្ងៃខាងមុខ យើងនឹងលែងមានទឹកកខ្វក់ហូរចូលសមុទ្រទៀតឡើយ ដោយមុននឹងបង្ហូរទៅសមុទ្រយើងនឹងចម្រោះវាអោយស្អាតសិន ហើយបច្ចុប្បន្ននេះ យើងអាចគ្រប់គ្រងទឹកកខ្វក់បានតែជាង៣ម៉ឺនម៉ែត្រគូបប៉ុណ្ណោះ តែបើសិនជាការប្រើប្រាស់ទឹកកាន់តែច្រើន ទឹកកខ្វក់ហូរចេញពីផ្ទះពលរដ្ឋ អគារសណ្ឋាគារផ្សេងក៏កាន់តែច្រើន ដូច្នេះហើយត្រូវការសាងសង់ប្រព័ន្ធលូ និងអាងចម្រោះជាបន្ទាន់ ។
លោក គួច ចំរើន អភិបាលខេត្តព្រះសីហនុ បានមានប្រសាសន៍ផងដែរថា ខេត្តព្រះសីហនុ ជាខេត្តមួយដែលមានសន្ទុះវិនិយោគខ្លាំងហើយកំនើនប្រជាពលរដ្ឋ លំនៅឋាន អគារខ្ពស់ៗនៅខេត្តព្រះសីហនុ ក៏មានច្រើនដែរ ត្រឹមរយៈពេលខ្លី ដូច្នេះហើយទើបតម្រូវការប្រើប្រាស់ទឹក និងកាកសំណល់ក៏ដូចជាទឹកស្អុយ ដើម ដូច្នេះហើយទើបខេត្តនេះ មានបញ្ហាច្រើនលើបញ្ហាទឹកស្អុយនិងកាកសំណល់ ។ លោកបន្តថា « មិនតែប៉ុណ្ណោះ ដោយសារតែពលរដ្ឋមួយចំនួនបានសងផ្ទះនៅលើអូរ ប្រឡាយបង្ហូរទឹក ទើបនៅពេលភ្លៀងខ្លាំង ធ្វើឱ្យស្ទះនិងជន់លិចម្ដងម្កាល » ។ លោកបន្តថា ក្នុងរយៈពេល៥ឆ្នាំខាងមុខទៀតខេត្តនេះ នឹងលែងមានបាតុភាពលិចលង់ដូចកាលពីប៉ុន្មានថ្ងៃមុននេះទៀតហើយ ដោយពួកយើងបានគិតគូរទុកជាមុន ជាក់ស្ដែងដូចគម្រោងអភិវឌ្ឍន៍ប្រព័ន្ធលូនេះជាដើម គឺត្រូវបានធ្វើឡើង តាមការព្យាករណ៍រយៈពេល១០ឆ្នាំខាងមុខ ។
គួរបញ្ជាក់ថា យោងតាមសេចក្តីព្រាងផែនការមេ បរិមាណទឹកកខ្វក់ ក្នុងក្រុងព្រះសីហនុ ត្រូវបានប៉ាន់ប្រមាណថានឹងមានចំនួន ប្រមាណ២៥.៧០០ម៉ែត្រគូប ក្នុងឆ្នាំ ២០១៨និងបរិមាណ៤៧.០០០ម៉ែត្រគូបក្នុងមួយថ្ងៃ នៅឆ្នាំ ២០២៣ និងប្រមាណ៦៤.០០០ម៉ែត្រគូបក្នុងមួយថ្ងៃ នៅឆ្នាំ ២០៣០ ៕ កែសម្រួលដោយ ៖ សុឃាក់
ចែករំលែកព័តមាននេះ