រាជធានីភ្នំពេញ៖ បើសិនជាមិនមានការប្រែប្រួលនោះទេ ជើងហោះហើរត្រង់ថ្មីមួយរវាងភ្នំពេញ-ដាណាង នៃប្រទេសវៀតណាមនឹងចាប់ផ្តើមដំណើរការនៅចុងខែវិច្ឆិកា ឆ្នាំ ២០១៩ ដែលនាំឲ្យការហោះហើរត្រង់រវាងកម្ពុជានឹងបរទេសមានការកើនឡើងជាបន្តបន្ទាប់ ។ ព្រមជាមួយគ្នានោះផងដែរ ថ្នាក់ដឹកនាំស្ថាប័នពាក់ព័ន្ធកំពុងជម្រុញឲ្យមានការបើកការហោះហើរត្រង់ពីបណ្តាខេត្តផ្សេងៗទៀតរបស់មិត្តចិន ដើម្បីសម្រូលដល់ការសុំទិដ្ឋាការរបស់ទេសចរចិនមកកាន់កម្ពុជា។
លោក ថោង ខុន រដ្ឋមន្ត្រីក្រសួងទេសចរណ៍បានបានអបអរសាទរនិងស្វាគមន៍ចំពោះ
គម្រោងបើកការហោះហើរត្រង់ជាលើកដំបូង ពីរាជធានីភ្នំពេញនៃប្រទេសកម្ពុជាទៅមក
ខេត្តដាណាង នាថ្ងៃទី២៧ ខែវិច្ឆិកា ឆ្នាំ២០១៩ ខាងមុខនេះ។ ហើយលោកក៏បានស្នើឱ្យក្រុម
ហ៊ុន Cambodia Angkor Air ជាក្រុមហ៊ុនអាកាសចរណ៍របស់ជាតិត្រូវខិតខំពង្រឹងគុណភាព
សេវាកម្មឱ្យបានល្អ ។ ទន្ទឹមនោះ លោករដ្ឋមន្ត្រី ក៏បានណែនាំទៅក្រុមហ៊ុនត្រូវគិតគូរផងដែរលើ ការបង្កើនជើងហោះហើរត្រង់ពីកម្ពុជាទៅកាន់ គោលដៅទេសចរណ៍សំខាន់ៗរបស់ចិន
បន្ថែមទៀត ពិសេសតំបន់ណាដែលកម្ពុជាមានស្ថានអគ្គកុងស៊ុលប្រចាំការនៅទីនោះ ដូចជា ខេត្តស៊ីអាន (ឆាងអាន) ខេត្តឆុងឃីង ទីក្រុងសៀងហៃ ខេត្តក្វាងចូវ និងទីក្រុងប៉េកាំងជាដើម ពីព្រោះកន្លែងដែលមានស្ថានអគ្គកុងស៊ុល ភ្ញៀវទេស ចរងាយស្រួលក្នុងការសុំទិដ្ឋការមក
កម្ពុជា។
សម្រាប់ជើងហោះហើរត្រង់ថ្មីដែលគ្រោងនឹងដំណើរការចុងខែវិច្ឆិកានេះ លោក ថោង ខុន បានបញ្ជាក់ថា «ខេត្តដាណាងជាគោលដៅទេសចរណ៍អន្តរជាតិមួយ ដ៏ធំរបស់វៀតណាម ដូច្នេះទីនោះនឹងសំបូរភ្ញៀវទេសចរមកពីប្រទេសទីបីច្រើន ដែលអាចបន្តការហោះហើរត្រង់មកទស្សនាកម្ពុជា ហើយការតភ្ជាប់នេះក៏ជាការងាយ ស្រួលសម្រាប់ភ្ញៀវទេសចរដែលចង់មកនៅភ្នំពេញ ឬហោះហើរត្រងពីភ្នំពេញទៅ ដាណាងផងដែរ»។ លោកបានបន្ថែមថា «អ្វី ដែល សំខាន់ គឺដើម្បីទាក់ទាញភ្ញៀវទេសចរមកពីប្រទេសទីបី ឱ្យបានកាន់តែច្រើន»។
សូមបញ្ជាក់ថា បច្ចុប្បន្នក្រុមហ៊ុនអាកាសចរណ៍ជាតិ Cambodia Angkor Air ក៏មានជើងហោះហើរត្រង់ពីខេត្តសៀមរាបទៅខេត្តដាណាងរួចមកហើយ។ ក្រៅពីនោះ ក្រុមហ៊ុនបាននិងកំពុងបើកការហោះហើរត្រង់ពីរាជធានីភ្នំពេញទៅខេត្តព្រះសីហនុ ពីខេត្តព្រះសីហនុទៅទីក្រុងប៉េកាំង ពីខេត្តព្រះសីហនុទៅខេត្តសៀមរាប ពីខេត្តសៀមរាបទៅទីក្រុងហាណូយជាដើម៕ កែសម្រួលដោយ ៖សុឃាក់
ចែករំលែកព័តមាននេះ