ភ្នំពេញ ៖ ក្រឡេកមើលមនុស្សជិតខ្លួនយើងនឹងបានលឺថា មានមនុស្សប្រើគ្រឿងញៀន ។ បញ្ហាគ្រឿងញៀន គឺជាបញ្ហាដ៏ធំបំផុតមួយដែលញាំញីសង្គមខ្មែរ និងយុវជនយុវតីកម្ពុជា ។ នៅក្នុងមជ្ឈមណ្ឌលបន្សាបគ្រឿងញៀនឈ្មោះថា ដារ៉ាក់ នៅស្រុកកណ្តាលស្ទឹង គេឃើញអ្នកគ្រឿងញៀនជាច្រើននាក់កំពុងតែត្រូវព្យាបាលបន្សាបគ្រឿងញៀន និងបង្ហាត់បង្រៀនជំនាញមួយចំនួន ដើម្បីអាចអោយពួកគេចិញ្ចឹមជីវិតបាន នៅពេលដែលចេញពីមជ្ឈមណ្ឌលនោះ ។
ក្នុងរយៈពេល១៥ឆ្នាំនៃការដំណើរការមណ្ឌលដារ៉ាក់ រយៈពេល១៥ឆ្នាំ បានជួយជនរងគ្រោះដោយគ្រឿងញៀនជាង៦ពាន់នាក់ និងបានបន្សាបទៅលើយុវវ័យដែលកំពុងតែដើរទៅលើផ្លូវខុសឈ្លក់វង្វេងក្លាយជាទាសករគ្រឿងញៀន ដែលបណ្តាលឲ្យបាត់បង់ស្មារតីរបស់ខ្លួនលែងស្គាល់ឪពុកម្តាយបងប្អូន ។
លោកមាស សុវណ្ណ ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជាហៅកាត់កាត់ថា «DARAC»ដែលមានទីតាំងនៅភូមិដំរីស្លាប់ ឃុំទ្រា ស្រុកកណ្តាលស្ទឹង ខេត្តកណ្តាល បានឲ្យដឹងថា រយៈពេល១៥ឆ្នាំមកហើយ ដែលសមាគមបានបង្កើតឡើង ហើយបានជួយជនរងគ្រោះ៦១០៨នាក់ ក្នុងនោះមានស្ត្រី៥៦០នាក់ ចេញសរុប៣៨៤៨នាក់ ស្រី៥៩នាក់ ។ នៅឆ្នាំ២០១៨ បន្តបូក និងឆ្នាំ២០១៩ ត្រីមាសទី១ សេវាព្យាបាល១៤៧នាក់ ស្រី១១នាក់ សមាហរណកម្មចេញ២៧នាក់ ស្រី២នាក់ នៅសល់ជាក់ស្តែង១២០នាក់ ស្រី៩នាក់ ត្រីមាសទី២ សេវាព្យាបាលចូល៤១នាក់ ស្រី៥នាក់ សមាហរណកម្មចេញ៣៣នាក់ ស្រី៤នាក់ នៅសល់ជាក់ស្តែង៨នាក់ ស្រី១នាក់ សរុបឆមាសទី១ សេវាព្យាបាលចូល១៨៨នាក់ ស្រី១៦នាក់ សមាហរណកម្មចេញ៦០នាក់ ស្រី៦នាក់ សល់ជាក់ស្តែង១២៨នាក់ ស្រី១០នាក់ ដែលត្រូវមណ្ឌលដារ៉ាក់ជួយព្យាបាលបន្សាបស្តានិតិសម្បទារ ។
លោកប្រធានបានរំលឹកថា ៖ មុន និងយើងឈានមកដល់ដំណាក់ការនេះ មានការលំបាក ខ្លាំងណាស់នូវ ការបង្កើតសមាគមសង្គ្រោះជនរងគ្រោះដោយគ្រឿងញៀនកម្ពុជា ហៅកាត់ ថា«DARAC»ទាំងថវិកា និងសម្ភារៈសាងសង់មណ្ឌលផងដែរ ។ មូលហេតុបណ្តាលឲ្យលោកបង្កើតសមាគមនេះឡើង ដោយសារ លោកសង្កេតឃើញថា យុវជនមួយចំនួនកំពុងតែដើរផ្លូវខុសហើយធ្លាក់ខ្លួនជាទាសកររបស់គ្រឿងញៀន ។ ការអប់រំមនុស្សញៀនថ្នាំញៀន ដែលអ្នកខ្លះរហូតទៅដល់ខូចសតិមិនមែនជាការងាយស្រួលនោះទេ ។ គេទាមទារជំនាញឲ្យច្បាស់លាស់ ហើយក៏ពុំចេះតែឃុំខ្លួននៅក្នុងបន្ទប់នោះទេ ។ លោកនិយាយថា ដើម្បីជួយអ្នកញៀនថ្នាំនោះគេត្រូវធ្វើកិច្ចជាច្រើនរួម បញ្ចូលគ្នាដូចជា ការព្យាបាលតាមវេជ្ជសាស្ត្រ ការផ្តល់ការប្រឹក្សាយោបល់ ការផ្តល់ការកម្សាន្ត និងការហាត់ប្រាណការបង្រៀនអំពីការធ្វើចិត្តអោយស្ងប់ ការអប់រំ សីលធម៌ និងការបង្រៀននូវជំនាញឯកទេសដូចជា កុំព្យូទ័រ និងភាសាអង់គ្លេស, សិប្បកម្មកែឆ្នៃឈើ គ្រប់ប្រភេទ,សិល្បៈតន្ត្រីសម័យ ,ជួសជុលគ្រឿងអេឡិចត្រូនិចនិងរថយន្ត,កសិកម្មដាំបន្លែ ចិញ្ចឹមសត្វចម្រុះ, កាត់ដេរ(ខោអាវ)បុរសនារី,អ៊ុតសក់,សំណង់,ផ្សាដែ ក ។ នៅពេលពួកគេចេញទៅ គឺគេអាចប្រកបមុខរបបនេះចិញ្ចឹមជីវិតបានដោយងាយស្រួល ។
លោកមាស សុវណ្ណបានបញ្ជាក់ថា ៖ កម្មវិធីព្យាបាលស្តានិតិសម្បទារបស់សមាគមយើងរួមមាន ១ ផ្នែកវេជ្ជសាស្ត្រ~ពេទ្យពិនិត្យព្យាបាល បឋម ~ស្តាសុខភាពផ្លូវកាយ បូករួមទាំងការហាត់ប្រាណ លេងកីឡា និងពលកម្ម ព្រមទាំងមានអនាម័យខ្លួនប្រាណ អនាម័យបរិស្ថានជុំវិញខ្លួន ។ ២ ផ្នែកអប់រំ ~រៀនភាសា អង្លេស កុំព្យូទរ័ ។ ~អប់រំសីលធម៌រស់នៅ គុណមាតាបិតា បំណិនជីវិត ច្បាប់ ។ ~អប់រំ តាមរយៈការផ្តល់ប្រឹក្សាមួយទល់នឹងមួយប្រឹក្សាជាក្រុម មិត្តអប់រំមិត្ត ប្រឹក្សាយោបល់ជាមួយនឹងអាណាព្យាបាល អំពីចិត្តសាស្ត្រក្នុង ការគ្រប់គ្រង និងដោះស្រាយបញ្ហាជាមួយអ្នកជំងឺ (ញៀន) ។
យុវជនបា កាន អតីតអ្នកញៀនថ្នាំម្នាក់បាននិយាយថា ៖ រូបគេត្រូវបានឪពុកម្តាយបញ្ជូនមក មណ្ឌលដារ៉ាក់ជាងមួយឆ្នាំមកហើយ បន្ទាប់ពីខ្លួនគេក្លាយជាអ្នកញៀនថ្នាំយ៉ាងសកម្មរហូតលែងស្គាល់អ្នកមានគុណទៀតផង ។ រូបគេបានមកទទួលការព្យាបាល និងការអប់រំនៅទីនេះ បានធ្វើឲ្យខ្លួនប្រាណរួចចាកពីទាសកររបស់គ្រឿងញៀន ហើយក្លាយជាមនុស្សល្អ ។ អ្នកស្រីសុខ នី មានទីលំនៅឃុំកណ្តឹង ស្រុកបាទី ខេត្តតាកែវ ដែលមកសួរសុខទុក្ខប្អូនដែលប្រើប្រាស់គ្រឿងញៀន ហើយត្រូវក្រុមគ្រួសារបញ្ជូនមកមណ្ឌលដារ៉ាក់បានរៀបរាប់ឲ្យដឹងថា ៖ ប្អូនប្រុសរបស់គាត់បានលួចប្រើប្រាស់គ្រឿងញៀនអស់រយៈពេលជាង២ឆ្នាំ និងបានក្លាយខ្លួនជាទាសករគ្រឿងញៀនលែងស្គាល់ឪពុកម្តាយបងប្អូនរហូតដល់ពេលខ្លះបានលួចយករបស់របក្នុងផ្ទះយកទៅលក់ទៀតផង ។
គាត់និយាយទៀតថា ក្រោយពីក្រុមគ្រួសារទ្រាំលែងបានក៏ចាប់បញ្ជូនមកសមាគមសង្គ្រោះ ជនរងគ្រោះដោយ គ្រឿងញៀនកម្ពុជាហៅកាត់ថា«ដារ៉ាក់»ដែលមានទីតាំងស្ថិតនៅក្នុងភូមិដំរីស្លាប់ ឃុំទ្រា ស្រុកកណ្តាលស្ទឹង ខេត្តកណ្តាល បន្សាបនិងស្តារនិតិសម្បទារដល់ប្អូនរបស់គាត់ ។ អស់រយៈជិតមួយឆ្នាំមកហើយ ប្អូនប្រុសរបស់គាត់រស់នៅក្រោយការព្យាបាលពីមណ្ឌលដារ៉ាក់ហាក់មានស្មារតីចេះដឹងខុសត្រូវច្រើន ធ្វើឲ្យក្រុមមគ្រួសារមានការសប្បាយរីករាយជាខ្លាំង។ គាត់សង្ឃឹមថា ប្អូនប្រុសរបស់គាត់ និងលះបង់គ្រឿងញៀនជារៀងរហូត ៕ កែសម្រួលដោយ ៖ សុឃាក់
ចែករំលែកព័តមាននេះ