ខេត្តព្រៃវែង ៖ កាលពីព្រឹកថ្ងៃទី២៤ សីហានេះ លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានដឹកនាំក្រុមការងារចុះទៅពិនិត្យមើលវឌ្ឍនៈភាពនៃការបង្កបង្កើនផលលើដំណាំដាំដុះរបស់ប្រជាកសិករ នៅក្នុងស្រុកចំនួន៣នៃខេត្តព្រៃវែង គឺស្រុកពារាំង ស្រុកស្វាយអន្ទរ និងស្រុកកញ្ជ្រៀច ។
ក្នុងដំណើរចុះត្រួតពិនិត្យនេះ លោករដ្ឋមន្ត្រីបានអញ្ជើញពិនិត្យមើលការដាំដុះបន្លែត្រសក់ចំណារ កសិដ្ឋានចិញ្ចឹមមាន់យកស៊ុត ការចិញ្ចឹមទា និងភ្ញាស់កូនទា នៅក្នុងស្រុកពារាំង ពិនិត្យដំណាំស្រូវពូជផ្ការំដួល ចំការអំពៅស្ករ និងរោងម៉ាស៊ីនកិនស្រូវ នៅស្រុកស្វាយយអន្ទរ និងបានបន្ដចុះពិនិត្យសហគមន៍ផលិតបន្លែសុវត្ថិភាពនៅស្រុកកញ្ជ្រៀចផងដែរ ។
ក្នុងពេលជួបជាមួយលោករដ្ឋមន្ត្រី ម្ចាស់កសិដ្ឋានចិញ្ចឹមមាន់យកពងនៅស្រុកពារាំង បានថ្លែងអោយដឹងថា កសិដ្ឋានរបស់គាត់មានមេមាន់ជាង៦ពាន់មេ ហើយក្នុង១ថ្ងៃអាចផ្តល់ពងបានជាង៥ពាន់ពង ចំណែកតម្លៃនៅលើទីផ្សារ ពង១គ្រាប់អាចលក់បានតម្លៃ៣៥០រៀល បើបូកសរុបទៅក្នុង១ថ្ងៃ គាត់អាចទទួលបានប្រាក់ចំណូលពីការលក់ពងមាន់ប្រមាណជា២លានរៀលដែរ ។
ចំណែកកសិករដាំអំពៅស្ករ នៅស្រុកស្វាយអន្ទរវិញបានអោយដឹងថា ក្នុង១ឆ្នាំពួកគាត់អាចដាំអំពៅបាន២ដង ប៉ុន្តែកសិករខ្លះ ក្រោយពីប្រមូលផលអំពៅរួចពួកគាត់នាំគ្នាងាកទៅដាំស្រូវ ឬដាំដំណាំផ្សេងៗដូចជា ជីនាងវង ភ្លៅកង្កែប ម្អម ត្រកួនជាដើម ដើម្បីកែលម្អគុណភាពដីឡើងវិញ ។ កសិករទាំងនោះបានបញ្ជាក់ថា មុខរបរដាំអំពៅស្ករអាចផ្តល់ប្រាក់ចំណូលបានប្រមាណជា៣ពាន់ទៅ៣៥០០ដុល្លារ ក្នុង១ឆ្នាំលើផ្ទៃដី១ហិកតា ហើយបើបូករួមទាំងប្រាក់ចំណូលពីការដាំដំណាំរួមផ្សំផ្សេងៗទៀត ក្នុង១ឆ្នាំគាត់អាចរកចំណូលបានជាង១ម៉ឺនដុល្លារ ។
ដោយឡែកកសិករនៅក្នុងសហគមន៍ផលិតបន្លែធម្មជាតិ នៅឃុំគោកគង់លិច ស្រុកកញ្ជ្រៀចបានអោយដឹងថា តាមរយៈការដាំបន្លែដោយប្រើបច្ចេកទេសទំនើបដូចជា ការប្រើប្រពន្ធ័ដំណក់ទឹកការប្រើប្រាស់ផ្លាស្ទិចគ្របរង ដើម្បីរក្សាសំណើមដី និងកំចាត់ស្មៅការប្រើសំណាញ់សំរាប់បន្លែវាតោង ការប្រើពូជមានប្រភពច្បាស់លាស់ ការប្រើជី និងថ្នាំគីមីសមស្របតាមបច្ចេកទេសជាដើមបានជួយអោយដំណាំបន្លែរបស់ពួកគាត់ផ្តល់ទិន្នផលបានខ្ពស់រហូតដល់គ្រួសារកសិករខ្លះឈប់ធ្វើស្រែ ហើយចាប់យកការងារដាំបន្លែធ្វើជាមុខរបរស្នូលតែម្តង ។ ប៉ុន្តែទន្ទឹម និងនេះកសិករទាំងនោះក៏បានសំណូមពរសុំអោយរាជរដ្ឋាភិបាលជួយគិតគូរពីការផ្គត់ផ្គង់អគ្គិសនីបូមទឹក ដោយបញ្ចុះតម្លៃភ្លើង និងសម្ភារៈកសិកម្មមួយចំនួនផងដែរ ។
នៅក្នុងពេលចុះពិនិត្យមើលការងារបង្កបង្កើនផលដំណាំកសិកម្មរបស់ប្រជាកសិករនេះ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែនាំអោយកសិករធ្វើការដាំដំណាំបន្តបណ្តាក់គ្នា ជៀសវាងការផលិតនូវផលិតផលតែមួយធ្វើអោយបរិមាណកើនលើសតម្រូវការទីផ្សារជាមូលហេតុធ្វើអោយអ្នកបញ្ជាទិញទម្លាក់តម្លៃបាន ។
ជាមួយគ្នានោះត្រូវចេះបង្កើនគុណភាពដីតាមរយៈការសន្សំ និងប្រើប្រាស់ជីសរីរាង្គអោយបានច្រើន ដើម្បីធានាដល់គុណភាពបន្លែ និងជាពិសេស គឺធានាដល់សុខភាព ទាំងអ្នកផលិត និងអ្នកបរិភោគ ហើយក៏រួមចំណែកជួយកាត់បន្ថយលើថ្លៃដើមទុនផលិតផងដែរ ។ ដោយឡែកមន្ទីរកសិកម្មខេត្តត្រូវខិតខំជួយរៀបចំឃ្លាំងលក់ចែកចាយមួយសម្រាប់សហគមន៍ ដើម្បីបង្កលក្ខណៈងាយស្រួលដល់អតិថិជនក្នុងតំបន់មករកទិញយកទៅបរិភោគ ៕ កែសម្រួលដោយ ៖ សុឃាក់
ចែករំលែកព័តមាននេះ