លោក ឯក អគ្គរាជទូតជប៉ុនប្រចាំកម្ពុជាបានចាត់ទុកកម្ពុជា គឺជាទឹកដីដ៏អស្ចារ្យមួយបន្ទាប់ពីលោកបានបម្រើការងារការទូតប្រចាំកម្ពុជាអស់រយៈពេលបីឆ្នាំ ។ លោកឯកអគ្គរាជទូត ហ៊ីដេហ៊ីសា ហូរីណូអូជី( Hidehisa Horinouchi)…
លោក ឯក អគ្គរាជទូតជប៉ុនប្រចាំកម្ពុជាបានចាត់ទុកកម្ពុជា គឺជាទឹកដីដ៏អស្ចារ្យមួយបន្ទាប់ពីលោកបានបម្រើការងារការទូតប្រចាំកម្ពុជាអស់រយៈពេលបីឆ្នាំ ។ លោកឯកអគ្គរាជទូត ហ៊ីដេហ៊ីសា ហូរីណូអូជី( Hidehisa Horinouchi) បានធ្វើការអត្ថាធិប្បាយអំពីកម្ពុជាយ៉ាងដូច្នេះ នៅក្នុងសាររបស់លោកផ្ញើជូនប្រជាជនកម្ពុជា ក្នុងពេលលោកបញ្ចប់អាណត្តិការទូតនៅកម្ពុជាហើយគ្រោងនឹងចាកចេញពីកម្ពុជានៅសប្តាហ៍ក្រោយ ។
លោកបាននិយាយថា «ខ្ញុំ និងភរិយានឹងចាកចេញពីទីក្រុងភ្នំពេញសប្តាហ៍ក្រោយនេះ ក៏ប៉ុន្តែសម្រស់នៃប្រទេសកម្ពុជាបានផ្តល់ក្តីស្រមៃដល់យើងខ្ញុំថា នឹងត្រឡប់មកកាន់ទឹកដីដ៏អស្ចារ្យនេះជាថ្មី នាថ្ងៃអនាគត» ។ លោកនិយាយបន្ថែមទៀតថា «រាជធានីភ្នំពេញនឹងប្រែមុខមាត់ថ្មីនៅប៉ុន្មានឆ្នាំខាងមុខជាមួយនឹងព្រលានយន្តហោះថ្មី អគារខ្ពស់ៗជាច្រើន ព្រមទាំងប្រព័ន្ធដឹក ជញ្ជូនសាធារណៈថ្មី ។ ខ្ញុំក៏អាចនឹងមានឱកាសសាជាថ្មី ដើម្បីនិយាយភាសាខ្មែរ» ។
លោកទូតបានធ្វើការកត់សម្គាល់ថា ប្រទេសកម្ពុជារក្សាបាននូវកំណើនសេដ្ឋកិច្ចដ៏រឹងមាំ ៧ភាគរយជារៀងរាល់ឆ្នាំ ហើយទំនាក់ទំនងទ្វេភាគីរវាងជប៉ុន និងកម្ពុជាក៏មានសន្ទុះឈានទៅមុខយ៉ាងខ្លាំងផងដែរ ។ ទាំងពាណិជ្ជកម្មទ្វេភាគី ការវិនិយោគផ្ទាល់ និងការផ្លាស់ប្តូរដំណើរទស្សនកិច្ចនានាក៏មានកំណើនខ្ពស់គួរឲ្យកត់សម្គាល់ផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ