សហរដ្ឋអាមេរិក-ចិន៖ កាសែតអេស្ប៉ាញABCរាយការណ៍នាពេលថ្មីៗនេះថា តម្លៃមាសបានឡើងដល់២៥% ចាប់តាំងពីខែតុលាឆ្នាំ២០១៨មក ក្រោយភាពតានតឹងកាន់តែខ្លាំងរវាងសហរដ្ឋអាមេរិកនិងចិន។ បែបនេះហើយបានជាបណ្ដាធនាគារកណ្ដាលអឺរ៉ុប ស្វែងរកកាត់បន្ថយការពឹងផ្អែករបស់ពួកគេទៅលើតែរូបិយវត្ថុ។
កាសែតអេស្ប៉ាញនោះបន្តថា ដោយសារភាពតានតឹងខាងពាណិជ្ជកម្មរវាងចិននិងសហរដ្ឋអាមេរិកបន្តកើនឡើង និងអត្រាការប្រាក់អវិជ្ជមាន បង្កើតឡើងដោយប្រទេសអឺរ៉ុបជាច្រើន បានរួមចំណែកធ្វើឲ្យមាសឡើងថ្លៃ២៥%ចាប់តាំងពីខែតុលាឆ្នាំ២០១៨មក។ ម្យ៉ាងវិញទៀតការទិញមាសដោយបណ្ដាធនាគារកណ្ដាលលើពិភពលោក បាននាំឲ្យតម្លៃមាសកាន់តែឡើងថ្លៃ។ ធនាគារកណ្ដាលទាំងនោះបានទិញមាសតម្កល់ទុកដល់ទៅ៣៧៤តោន ក្នុងរយៈពេល៦ខែចាប់ពីដើមឆ្នាំ២០១៩មក ពោលមានការកើនឡើង៥៧%ថែមទៀត បើប្រៀបធៀបទៅនឹងដំណាក់កាលដូចគ្នានោះនៃឆ្នាំ២០១៨។
ចំណែកប្រជាជនរបស់បណ្ដាប្រទេសរីកចម្រើនក៏បានទិញមាសច្រើនដែរ ទោះបីក្រោមរូបភាពជាមាសដុំ មាសសន្លឹកឬជាគ្រឿងអលង្ការក្ដី។ ប្រធានអគ្គនាយកនៃក្រុមហ៊ុនSHARPS PIXLEY ROSS NORMANពន្យល់ថា ដោយដើរតួនាទីសំខាន់មួយជាថ្មី មាសបច្ចុប្បន្នត្រូវប៉ាន់ខ្លាំងណាស់មកពីការកើនឡើងនៃសេចក្ដីត្រូវការ។ លោកលើកជាឧទាហរណ៍ប្រទេសអង់គ្លេស ដែលមាសក្លាយទៅជារូបិយវត្ថុនៃវិបត្តិBREXIT៕ (សម្រួលដោយ៖ ស្រីណា)
ចែករំលែកព័តមាននេះ