ខេត្តកំពង់ឆ្នាំង ៖ ក្រោយពីទទួលបានព័ត៌មានពីប្រជាពលរដ្ឋរាយការណ៍មកថា មានបទល្មើសអូសលៀសដោយម៉ាស៊ីនខុសច្បាប់ នៅតាមដងទន្លេធំ នៅក្នុងភូមិសាស្ត្រស្រុកកំពង់ត្រឡាច នៅព្រឹកថ្ងៃទី២២ ខែសីហានេះ សមត្ថកិច្ចផ្នែករដ្ឋបាលជលផលកំពង់ប្រាសាទបានចុះល្បាតតាមដងទន្លេធំ ដើម្បីឃ្លាំមើល និងបង្ក្រាបបទល្មើសនេសាទតាមសេចក្តីរាយការណ៍របស់ប្រជាពលរដ្ឋ ។
លោក ឃឹម ឡុង នាយផ្នែករដ្ឋបាលជលផលបាននិយាយឲ្យដឹងថា ៖ ក្រោយពីទទួលព័ត៌មាន ថា មានបទល្មើសកាយលៀស ក្នុងដែនភូមិសាស្ត្ររបស់លោក ភ្លាមៗនោះលោកបានដឹកនាំសមត្ថកិច្ចជំនាញបានប្រើប្រាស់កាណូត៣គ្រឿង និងមន្ត្រីជលផល៨នាក់ចុះល្បាតតាមដងទន្លេ ហើយក៏បានប្រទះឃើញកាណូតបាឡាស្មាច់៣គ្រឿងមានគ្នា៦នាក់កំពុងធ្វើសកម្មភាពអូសលៀសដោយម៉ាស៊ីនខុសច្បាប់នៅចំណុចភូមិឱម៉ាល់ ឃុំបាធាយ ស្រុកបាធាយ ខេត្តកំពង់ចាម ជាប់ព្រុំប្រទល់ស្រុកកំពង់ត្រឡាច ខេត្តកំពង់ឆ្នាំង ។
នៅពេលឃើញក្រុមសមត្ថកិច្ច ពួកគេបានទម្លាក់កញ្ច្រែងកាយលៀសចោលក្នុងទឹកក្បែរច្រាំងទន្លេ ។ ដោយឃើញសកម្មភាពបែបនេះ ក្រុមអ្នកកាសែតដែលបានចុះជាមួយសមត្ថកិច្ចក៏បានជួបសម្ភាសន៍សួរនាំពួកគាត់ ដោយពួកគាត់បាននិយាយថា ពួកគាត់មានទីលំនៅក្នុងភូមិកំពង់បាស្រូវ ឃុំព្រៃគ្រី ស្រុកជលគីរី ខេត្តកំពង់ឆ្នាំង ។ ពួកគាត់បានបញ្ជាក់ថា ៖ ការកាយលៀសដោយម៉ាស៊ីនេះ ពិតជាខុសច្បាប់ ប៉ុន្តែដោយសារជីវភាពក្រីក្រទើបបង្ខំអោយពួកគាត់កាវលៀសដោយម៉ាស៊ីនតូចៗបែបនេះ ដូច្នេះសូមសមត្ថកិច្ចយោគយល់អនុគ្រោះផង ។ លៀសដែលពួកគាត់កាយបាននេះគាត់យកទៅលក់ឡើងឡាននៅទឹកដីខេត្តកំពង់ចាម ដោយក្នុង១ការ៉ុងលក់បានថ្លៃ១ម៉ឺន៤ពាន់រៀល ដែលគេដឹកយកទៅលក់បន្តនៅក្នុងក្រុងភ្នំពេញ និងឮថា គេយកទៅផលិតធ្វើជាចំណីត្រី ឬចំណីសត្វ ។
ទាក់ទងនឹងបទល្មើសខាងលើនេះសមត្ថកិច្ចជលផលផ្នែកកំពង់ប្រាសាទបានបញ្ជាក់អោយដឹងថា ៖ កន្លងទៅអ្នកកាយលៀសដោយម៉ាស៊ីនខុសច្បាប់ទាំង៣ទូកនេះ សមត្ថកិច្ចធ្លាប់បានចាប់ផាកពិន័យតាមផ្លូវច្បាប់រួចម្តងមកហើយ ក្នុងពីពេលកន្លងទៅថ្មីៗនេះ ។ តែលើកនេះមកប្រព្រឹត្តបទល្មើសនៅក្នុងដីខេត្តកំពង់ចាម ដូច្នេះសមត្ថកិច្ចជលផលខេត្តកំពង់ឆ្នាំងមិនលូកដៃទេក្នុងដែនសមត្ថកិច្ចរបស់គេឡើយ ហើយគ្រាន់តែសំណូមពរដល់ពួកគាត់ជាអ្នកកាយលៀសគួរតែយល់អំពីច្បាប់ជលផលនឹងត្រូវតែបញ្ឈប់សកម្មភាពជាបន្ទាន់ បើពេលជួបលើកក្រោយទៀតសមត្ថកិច្ចមិនលើកលែងឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ