ខេត្តកណ្តាល ៖ នៅចំពោះមុខសមត្ថកិច្ច នារីស្រស់ស្អាតឈ្មោះនាង ហង្ស សុខចេង ជាជនសង្ស័យបានឆ្លើយថា នាងមិនដែលស្គាល់ជនសង្ស័យទាំងពីរនាក់នោះទេ គឺស្គាល់តែតាមទូរស័ព្ទនិងធ្លាប់ទៅហូបមីហឹរនៅផ្សារសុវណ្ណាម្តងជាមួយម្ចាស់ម៉ូតូ កាលពីថ្ងៃទី១៧ ខែសីហា វេលាម៉ោង៩យប់ ។ តែយ៉ាងណា ក្មេងស្រីសង្ស័យរូបនេះត្រូវបានបញ្ជូនទៅអធិការដ្ឋាននគរបាលស្រុក ដើម្បីបន្តចាត់ការតាមនីតិវិធី។
សូមបញ្ជាក់ថា ករណីឆបោកម៉ូតូមួយបង្កឲ្យមានការភ្ញាក់ផ្អើលដល់សមត្ថកិច្ចស្រុកកៀនស្វាយ ដោយឃាត់ខ្លួនក្មេងស្រីម្នាក់ជាជនសង្ស័យខាងលើ និងបន្តស្រាវជ្រាវរកមុខជនសង្ស័យ២នាក់ទៀត ដែលកំពុងរត់គេចខ្លួន បន្ទាប់ពីសមគំនិតឆបោកម៉ូតូ។ ហេតុការណ៍នេះ កើតឡើងកាលពីថ្ងៃអាទិត្យទី១៨ ខែសីហាកន្លងទៅ វេលាម៉ោង៥និង៣០នាទីល្ងាច នៅរមណីយដ្ឋានកៀនស្វាយក្រៅ ស្ថិតក្នុងភូមិភូមិធំ ឃុំភូមិធំ ស្រុកកៀនស្វាយ ។
ម្ចាស់ម៉ូតូឈ្មោះ ហាន់ សូត ភេទប្រុស អាយុ១៨ឆ្នាំ មានទីលំនៅក្នុងភូមិអូរអណ្តូង សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ជាជាងផ្សារដែក ។ ចំណែកជនសង្ស័យមាន៣នាក់ ១-ឈ្មោះ ហង្ស សុខចេង ភេទស្រី អាយុ១៦ឆ្នាំ មានទីលំនៅភូមិត្នោតជ្រំ សង្កាត់បឹងទំពុន ខណ្ឌមានជ័យ រាជធានីភ្នំពេញ ជាអ្នករាំអកកាដង់(ឃាត់ខ្លួន) និង២នាក់ទៀតមិនស្គាល់ឈ្មោះដែលម្នាក់ភេទស្រី អាយុប្រហែល៣៦ឆ្នាំ មិនស្គាល់ទីលំនៅ(គេចខ្លួន) និងម្នាក់ទៀតក៏មិនស្គាល់អត្តសញ្ញាណដែរ ភេទប្រុស អាយុប្រហែល៣២ឆ្នាំ(គេចខ្លួន)។
មន្ត្រីនគរបាលស្រុកកៀនស្វាយឲ្យដឹងថា នៅថ្ងៃទី១៨ ខែសីហានោះ វេលាម៉ោង៤រសៀលមានស្ត្រី២នាក់បានបបួលម្ចាស់ម៉ូតូមកលេងវត្តកៀនស្វាយក្រៅ ។ ពេលមកដល់កៀនស្វាយផ្លាហ្សា ក៏នាំគ្នាអង្គុយហូបពោតស្ងោររួចស្ត្រីម្នាក់បានទូរសព្ទ័ហៅជនម្នាក់ទៀតជាមនុស្សប្រុសឲ្យមកលេងដែរ ។ ពេលបុរសនោះមកដល់ ក៏ជិះម៉ូតូគ្នា៤នាក់ ទៅអង្គុយលេងនៅផ្ទះទឹករមណីយដ្ឋានវត្តកៀនស្វាយក្រៅ ហើយពេលទៅដល់ស្ត្រី២នាក់នាំគ្នាទៅទិញម្ហូប ។ ចំណែកម្ចាស់ម៉ូតូនិងបុរសម្នាក់ដែលមកក្រោយគេនោះនៅចាំរោងនិងម៉ូតូ ហើយ
បុរសនោះបានខ្ចីម៉ូតូ ដោយប្រាប់ថាទៅឌុបមេមកលេងដែររួចក៏ទៅបាត់រហូតទៅ ។
ដោយរង់ចាំយូរពេក ម្ចាស់ម៉ូតូនិងស្ត្រីទាំង២នាក់បានទូរសព្ទ័ទៅបុរសនោះហើយត្រូវបានប្រាប់ថា ឲ្យទៅយកម៉ូតូនៅគល់ស្ពានច្បារអំពៅ ប៉ុន្តែពេលទៅដល់ច្បារអំពៅ ប្រាប់ថាឲ្យទៅយកនៅរង្វង់មូលតាខ្មៅ លុះពេលទៅដល់តាខ្មៅប្រាប់ថាឲ្យទៅយកនៅមុខបន្ទាយអង្គរក្ស ។ ពេលទៅដល់មុខបន្ទាយ ស្ត្រីម្នាក់ដែលគេចខ្លួនបាត់នោះបានឲ្យម្ចាស់ម៉ូតូនិងនាង ហង្ស សុខចេង ចុះពីលើម៉ូតូកង់បី ដោយប្រាប់ថាខ្លួនទៅយកម៉ូតូឲ្យ រួចស្ត្រីនោះក៏ទៅបាត់ទៀតទៅ។ ដោយចាំយូរពេកនិងទាក់ទងតាមទូរស័ព្ទលែងបាន ម្ចាស់ម៉ូតូក៏ទូរស័ព្ទហៅបងប្អូនឲ្យមកយកនិងឃាត់ខ្លួននាង ហង្ស សុខចេង នាំមកប៉ុស្តិ៍នគរបាលរដ្ឋបាលភូមិធំ ដើម្បីសួរនាំ ។ (សម្រួលដោយ៖ ស្រីណា)
ចែករំលែកព័តមាននេះ