តារាសម្តែងសម្បុរខ្មៅស្រអែមនាង ចាន់ ស្រីរ័ត្ន បានបង្ហាញពីតម្រុយជិតចូលរោងការជាមួយតារាចម្រៀងវ័យក្មេងលោក អាន់ ដា នៅក្នុងពេលឆាប់ខាងមុខនេះ ។ ដំណឹងនេះបានលេចឡើងបន្ទាប់ពីនៅលើបណ្តាញសង្គមហ្វេសប៊ុករបស់នាង ត្រូវបានគេឃើញមានរូបភាពជាច្រើនសន្លឹក ដែលបង្ហាញពីការថតត្រៀមពិធីមង្គលការបង្ហោះជាបន្តបន្ទាប់ ។
បន្ថែមពីការបញ្ចេញរូបភាពទាំងអស់នោះ តារាសម្តែងនៅក្នុងរឿង «ឡូយ៩» ក៏បានបង្ហោះរូបភាពផ្អែមល្ហែមពេលចេញទៅណាមកណាជាមួយលោក អាន់ដា រួមនឹងសារដ៏ផ្អែមល្ហែមផងដែរ ។ ទោះជាយ៉ាងណានៅពេលជជីកសួរអំពីរឿងនេះកញ្ញា ចាន់ ស្រីរ័ត្ន បានទទួលស្គាល់ពីទំនាក់ទំនងស៊ីជម្រៅជាមួយតារាចម្រៀងលោក អាន់ ដា លើសពីមិត្តភក្តិធម្មតាជាមួយនឹងការបង្ហើបឱ្យដឹងថា ជិតចូលរោងការនាពេលខាងមុខផងដែរ ។
ប្រាប់កោះសន្តិភាពតាមសារអេឡិចត្រូនិច ចាន់ ស្រីរ័ត្ន បានអះអាងថា នាង និងលោក អាន់ ដា បានចាប់ផ្តើមទំនាក់ទំនងគ្នាជាយូរមកហើយ ហើយអ្នកទាំងពីរក៏បានស្វែងយល់ចិត្តគ្នាបានយ៉ាងល្អផងដែរ ។ នាងបញ្ជាក់ថា ការដែលនាងជ្រើសរើស អាន់ ដា នាពេលនេះ ដោយសារតែគាត់ជាមនុស្សល្អ និងជាទីប្រឹក្សាល្អពេលនាងជួបទុក្ខលំបាក ។
បើទោះបីជាបានស្វែងយល់គ្នាទៅវិញទៅមកបានល្អក៏ដោយ ប៉ុន្តែចាន់ ស្រីរ័ត្ន នៅតែអះអាងថា គម្រោងចូលរោងការពិតប្រាកដនោះ មិនទាន់ត្រូវបានកំណត់ឲ្យបានច្បាស់ លាស់នៅឡើយទេ ។ នាងបញ្ជាក់ថា ចំពោះពិធីមង្គលការនោះយើងមិនទាន់បានកំណត់នៅឡើយទេ ដោយសារតែយើងមិនទាន់រកវេលាសមគួរណាមួយ តែគ្រាន់តែថា យើងបានត្រៀមក្នុងពេលឆាប់ៗខាងមុខនេះ ។
បើតាម ចាន់ ស្រីរ័ត្ន ប្រសិនបើពិធីមង្គលការរបស់នាងបានកើតឡើងនៅក្នុងពេលណាមួយនោះនាងនឹងអញ្ជើញមិត្តភក្តិសិល្បៈដែលស្គាល់ទាំងអស់ ហើយបើទោះបីជារៀបការសាងសុភមង្គលគ្រួសារក៏ដោយ ប៉ុន្តែសម្រាប់នាង គឺមិនមានបំណងបោះបង់ចោលសិល្បៈឡើយ ខណៈពេលដែលបច្ចុប្បន្ននាងក៏មានការមមាញឹកនៅលើអាជីពមួយនេះផងដែរ ។
តារាសម្តែងនាង ចាន់ ស្រីរ័ត្ន បានកសាងភាពល្បីល្បាញរបស់ខ្លួន តាមរយៈការសម្តែងនៅក្នុងរឿង «ឡូយ ៩» និងរឿង «វិបល្លាស» នៅតាមស្ថានីយទូរទស្សន៍ កាលពីពេលកន្លងទៅ ។ ក្រៅពីអាជីពសិល្បៈនាងក៏ជាមន្ត្រីរាជការមួយរូបនៅក្នុងវិទ្យុជាតិនៃក្រសួងព័ត៌មានផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ