ប្រទេសឥណ្ឌូណេស៊ី ៖ ខេត្តប៉ាពូអាស៊ីខាងលិចរបស់ឥណ្ឌូណេស៊ី កាលពីថ្ងៃទី២១ សីហា ជួបប្រទះថ្ងៃទី៣ នៃបាតុកម្មហិង្សាដោយនៅតាមកន្លែងខ្លះប្រែក្លាយទៅជាការប៉ះទង្គិចគ្នា ដែលជម្រុញឲ្យក្រុងហ្សាការតាបញ្ជូនកងទាហាន និងប៉ូលិសបន្ថែមចំនួនប្រមាណជា១២០០នាក់ថែមទៀត ។
រដ្ឋាភិបាលបានអំពាវនាវឲ្យមានការវិលត្រឡប់នៃភាពស្ងប់ស្ងាត់ ក្នុងតំបន់ក្រីក្រនោះ នាចុងខាងកើតឥណ្ឌូណេស៊ី ។ ការបះបោរចាប់ផ្ដើមពីថ្ងៃទី១៩ សីហា មកក្រោយការចាប់ខ្លួនលើកោះជ្វា និស្សិតប៉ាពូ៤៣នាក់ហើយពួកគេរងការប្រមាថបែបប្រកាន់ពូជសាសន៍មក ។
មនុស្សប្រមាណជា៥០០០នាក់ បានលើកគ្នាធ្វើបាតុកម្មនាថ្ងៃទី២១ សីហា ក្នុងទីក្រុងទីមីកា ដែលនៅទីនោះគេឃើញពួកអ្នកតវ៉ាគប់ដុំថ្មបំបែកកញ្ចក់សភាមូលដ្ឋាន ហើយប៉ុនប៉ងកម្ទេចរបាំងរាំងផ្លូវចូលទៅកាន់ទីនោះ ។ ពួកបាតុករទាំងនោះត្រូវបានបំបែកក្នុងទីក្រុងនេះ រហូតដល់ក្រោយការបាញ់ព្រមានរបស់ប៉ូលិស ។
បណ្ដាសារព័ត៌មានឥណ្ឌូណេស៊ីរៀបរាប់ពីការចាប់ខ្លួនមនុស្ស៤៥នាក់ ក្នុងនោះមានបណ្ដាជនដែលទទួលការចោទប្រកាន់ថា អុជអាលឲ្យមានបាតុកម្ម និងបង្កការខូតខាតក្នុងអគាររដ្ឋនានា។ បាតុករច្រើនរយនាក់ក៏លើកគ្នាដើរហែក្បួនតាមវិថីនានា នៃទីក្រុង SORONG និង FAKFAK ជាទីក្រុង២ទៀតនៃខេត្តនោះ ។ ប៉ូលិសបានបាញ់គ្រាប់បែកបង្ហូរទឹកភ្នែកនៅក្រុង FAKFAK ដើម្បីបំបែកពួកបាតុករដែលនាំគ្នាដើរដុតក្នុងផ្សារមួយ ហើយបំផ្លាញបណ្ដាទូដកប្រាក់ស្វ័យប្រវត្តិ ។
រដ្ឋមន្ត្រីមហាផៃ្ទឥណ្ឌូណេស៊ីលោក វីរ៉ានតូ នាយប់ថ្ងៃទី២១ សីហា បានទៅកាន់ប៉ាពូអាស៊ីដែលប្រធានាធិបតីលោក JOKO WIDODO ក៏ទៅកាន់ទីនោះដែរ ។ ទីក្រុងមួយចំនួននៃតំបន់សម្បូរដោយវត្ថុធាតុដើមនេះក្នុងនោះរួមទាំងក្រុង MANOKWARI ទីប្រជុំជនខេត្តផង ត្រូវស្ទះគាំងកាលពីថ្ងៃទី២១ សីហា ។
នៅទីក្រុង MANOKWARI កាលពីថ្ងៃទី១៩ សីហា ពួកបាតុករបានដុតហាងទំនិញនានាព្រមទាំងសភាមូលដ្ឋាន ។ ប៉ូលិសជាច្រើននាក់រងរបួស ហើយមានព័ត៌មាននានាអះអាងពីបាតុករច្រើននាក់រងរបួសដែរ ។ ប៉ូលិសកំពុងតែតាមប្រមាញ់អ្នកទោសជាង២៥០នាក់ ដែលរត់ចេញពីពន្ធគារមួយនៃទីក្រុង SORONG ក្រោយរងការដុតបំផ្លាញពីសំណាក់ពួកបះបោរ ។ អាជ្ញាធរថ្លែងកាលពីថ្ងៃទី២១ សីហា ថាប៉ូលិសប្រមាណជា៩០០នាក់និងទាហាន៣០០នាក់ ត្រូវបានដាក់ពង្រាយនៅទីក្រុង MANOKWARI និង SORONG ៕
ប្រភព ៖ yahoo , កែសម្រួលដោយ ៖ សំណាង
ចែករំលែកព័តមាននេះ