បេក្ខជនធ្លាក់ស្វ័យប្រវត្តិ2នាក់ និងបញ្ហាសុខភាព152នាក់
- ភ្នំពេញ
រាជធានីភ្នំពេញ ៖ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ថ្លែងថា សិស្សជាបេក្ខជនចំនួន២នាក់បានបំពានលើវិន័យរបស់ក្រសួងអប់រំ…
រាជធានីភ្នំពេញ ៖ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ថ្លែងថា សិស្សជាបេក្ខជនចំនួន២នាក់បានបំពានលើវិន័យរបស់ក្រសួងអប់រំ…
រាជធានីភ្នំពេញ ៖ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ថ្លែងថា សិស្សជាបេក្ខជនចំនួន២នាក់បានបំពានលើវិន័យរបស់ក្រសួងអប់រំ ដោយយកសំណៅឯកសារនិងទូរស័ព្ទដៃចូលក្នុងបន្ទប់ប្រឡង ហើយត្រូវបានក្រសួងសម្រេចឲ្យធ្លាក់ជាស្វ័យប្រវត្តិ គឺម្នាក់នៅមណ្ឌលប្រឡងក្នុងរាជធានីភ្នំពេញ និងម្នាក់ទៀតនៅខេត្តតាកែវ ជាព្រះសង្ឃនិងជាបេក្ខជនបំពេញវិជ្ជា ។ ជាមួយគ្នានេះ ក៏មាន២នាក់ទៀតដែលធ្លាក់ព្រោះទទួលពិន្ទុសូន្យ គឺម្នាក់នៅសៀមរាបមកប្រឡងយឺតម៉ោង និងម្នាក់នៅត្បូង ឃ្មុំមានបញ្ហាសុខភាពនាំទៅកាន់មន្ទីរពេទ្យ មិនអាចមកប្រឡងវិញបាន ។
សរុបអ្នកដែលធ្លាក់មាន៤នាក់ ។ ចំពោះបេក្ខជនដែលមានបញ្ហាសុខភាព១៥២នាក់ ក្នុងសម័យប្រឡង
នេះមានតែ១១ ករណីទេ ដែលមិនវិលមកបន្តការប្រឡងបាន ។ លោក រស់ សុវាចា បន្តថា ក្នុងនោះមានបេក្ខជនអវត្តមានកើនជាងថ្ងៃទី១ ចំនួន១.៨១៨នាក់(ស្រី៦៩៦នាក់) គិតជាភាគរយគឺ១,៥៥% នៅតាមមណ្ឌលប្រឡងទូទាំងប្រទេស ។ ចំណែកលទ្ធផលប្រឡងក្រសួងនឹងប្រកាសនៅថ្ងៃទី១០ខែកញ្ញា សម្រាប់រាជធានីភ្នំពេញនិងខេត្តកណ្តាល ហើយបណ្តាខេត្តនានាប្រកាសនៅថ្ងៃទី១១ ខែកញ្ញា ឆ្នាំ២០១៩ខាងមុខ ។
លោកថ្លែងថា ស្ថានភាពទូទៅតាមមណ្ឌលសំណេរ នារសៀលថ្ងៃចុងក្រោយនៃការប្រឡងសញ្ញាបត្រមធ្យមសិក្សាទុតិយភូមិ បើទោះបីជាមណ្ឌលប្រឡងមួយចំនួនមានភ្លៀងធ្លាក់ក្ដី ក៏សន្តិសុខ សណ្ដាប់ធ្នាប់ របៀបរៀបរយ និងភាពស្ងប់ស្ងាត់ នៅតែរក្សាបានយ៉ាងល្អប្រសើរ ។ វិញ្ញាសាសម្រាប់រសៀលថ្ងៃទី២នៃការប្រឡងនេះ គឺសម្រាប់ថ្នាក់វិទ្យាសាស្ត្រ (គណិតវិទ្យាពីម៉ោង១៤:០០ ដល់១៦:៣០) សម្រាប់ថ្នាក់វិទ្យា
សាស្ត្រសង្គម(អក្សរសាស្ត្រខ្មែរពីម៉ោង១៤:០០ ដល់ម៉ោង១៦និង៣០) ។ នារសៀលថ្ងៃទី២នេះដែរ ស្ថានភាពក្នុងដំណើរការប្រឡង មានភាពស្ងប់ស្ងាត់ និងមានសណ្ដាប់ធ្នាប់របៀបរៀប រយល្អទាំងនៅក្នុង និងក្រៅមណ្ឌលប្រឡង ។
អ្នកនាំពាក្យក្រសួងអប់រំបានបញ្ជាក់ថា ក្នុងដំណើរការសំណេរនាព្រឹកថ្ងៃទី២គឺថ្ងៃទី២០ ខែសីហា ឆ្នាំ២០១៩ មានពីរមុខវិជ្ជា សម្រាប់ថ្នាក់ វិទ្យាសាស្ត្រ(អក្សរសាស្ត្រខ្មែរ និងរូបវិទ្យា) និងសម្រាប់ថ្នាក់វិទ្យាសាស្ត្រសង្គម(គណិតវិទ្យា និង សីលធម៌ ពលរដ្ឋវិជ្ជា) ។ ចំនួនបេក្ខជនអវត្តមាននាពេលព្រឹកចំនួន
១.៨១៨នាក់(ស្រី៦៩៦នាក់) គិតជាភាគរយ១,៥៥% ។ បេក្ខជនមានបញ្ហាសុខភាពចំនួន៦៣ករណី ក្នុងនោះមិនអាចវិលត្រឡប់មកប្រឡងវិញ៣ករណី ។ ចំណែកបេក្ខជនផ្សេង ទៀតបន្តប្រឡងជាបន្តទៀតបាន បន្ទាប់ពីទទួលបានការសង្គ្រោះបឋម ។
សរុបដំណើរការសំណេរនាព្រឹកថ្ងៃទី២នៃការប្រឡងសញ្ញាបត្រមធ្យមសិក្សាទុតិយភូមិប្រព្រឹត្ត ទៅដោយរលូនល្អ មិនមានបាតុភាព កើតភាពមិនប្រក្រតីណាមួយគួរឲ្យកត់សម្គាល់ឡើយ ។ ក្រសួងអប់រំបានអះអាងថា បើទោះបីមាន ភ្លៀងធ្លាក់នៅតាមមណ្ឌលមួយចំនួនក្នុងខេត្ត ព្រះវិហារ ស្ទឹងត្រែង រតនគិរី និងខេត្តកោះកុង ប៉ុន្តែដំណើរការសំណេរនៅតែមានដំណើរការល្អ មានសភាពស្ងប់ស្ងាត់ និងរបៀបរៀបរយល្អ ដោយមានការយកចិត្តទុកដាក់ និងការទទួលខុសត្រូវខ្ពស់ពីគណៈមេប្រយោគទូទាំងប្រទេស គណៈអប្បមាទទូទាំងប្រទេស ជំនួយការអប្បមាទទូទាំងប្រទេស ។
ជារួម បេក្ខជនបានគោរពបទប្បញ្ញត្តិនៃការប្រឡងបានយ៉ាងល្អ និងបានខិតខំប្រឹងប្រែងធ្វើកិច្ចការទៅតាមសមត្ថភាពរបស់ខ្លួនរៀងៗខ្លួន ដោយមិនយកសំណៅឯកសារ ទូរស័ព្ទដៃ ឬឧបករណ៍អេឡិចត្រូនិកចូលក្នុងមណ្ឌលប្រឡងឡើយ ។ នៅថ្ងៃទី១នៃការប្រឡង មានបេក្ខជនតែ១រូបប៉ុណ្ណោះដែលបានយកសំណៅឯកសារចូលបន្ទប់ប្រឡង និងមានបេក្ខជន១រូបទៀត យកទូរសព្ទដៃចូលក្នុងបន្ទប់ប្រឡង ។
លោក រស់ សុវាចា ថ្លែងថា ក្រសួងអប់រំបានអនុវត្តយ៉ាងម៉ឺងម៉ាត់នូវបទប្បញ្ញត្តិ និងកម្រិត វិន័យចំពោះបេក្ខជនទាំងពីររូបនេះ ដោយកំណត់ ឱ្យធ្លាក់ជាស្វ័យប្រវត្តិ ។ នៅថ្ងៃទី១នៃការប្រឡងបេក្ខជនប្រឡងសរុបមានចំនួន១១៧.០៤៣នាក់ (ស្រី៦០៤២៧នាក់) និងបេក្ខជនអវត្តមានសរុបចំនួន១.៧៤៥នាក់(១,៤៩%) ក្នុងនោះស្រី៦៧៨នាក់ ។ បេក្ខជនមានបញ្ហាសុខភាពមានចំនួន៤៣ករណី ប៉ុន្តែអាចដំណើរការប្រឡងបន្តទៀតបាន បន្ទាប់ពីទទួលបានការសង្គ្រោះបឋម។ មានតែបេក្ខជន១រូបប៉ុណ្ណោះដែលមានបញ្ហាសុខភាពធ្ងន់ធ្ងរ មិនអាចបន្តការប្រឡងបាន ។
យោងតាមមន្ត្រីនគរបាលខេត្តកណ្តាលថា គួរឱ្យសោកស្តាយដែលសិស្សស្រីម្នាក់ឈ្មោះ អ៊ុយ លីលី អាយុ១៨ឆ្នាំ មានទីលំនៅភូមិរកាកោង ឃុំរកាកោង១ ស្រុកមុខកំពូល ខេត្តកណ្តាល បានជួបគ្រោះថ្នាក់ចរាចរណ៍រថយន្តបុកស្លាប់ នៅផ្លូវលីយ៉ុងផាត់ ខណៈដែលឪពុកឌុបជូនមកកាន់មណ្ឌលប្រឡង កាលពីថ្ងៃទី១៩ ខែសីហា ។
សូមជម្រាបថា បេក្ខជនប្រឡងឆ្នាំនេះ មានចំនួន១១៧.០៤៣នាក់(ស្រី៦០៤២៧នាក់) មាន២០២មណ្ឌល ចែកជាថ្នាក់វិទ្យាសាស្ត្រមានបេក្ខជន៤៤.៦៩០នាក់ មាន៧៥មណ្ឌល និងថ្នាក់វិទ្យាសាស្ត្រសង្គមមានបេក្ខជនចំនួន៧២.៣៥៣នាក់ មាន១២៧មណ្ឌល ។ បេក្ខជនមួយចំនួនមានបញ្ហាសុខភាពនៅពេលចាប់ផ្តើមប្រឡងនៅថ្ងៃទី២ នាព្រឹកថ្ងៃទី២០ សីហា ឆ្នាំ២០១៩ មានបេក្ខជនមួយចំនួនមានបញ្ហាសុខភាពត្រូវបានក្រុមគ្រូពេទ្យ និងគ្រូអនុរក្សជួយសង្គ្រោះដាក់សឺរ៉ូម និងបន្តប្រឡងទៀត ។
ទោះបីក្រសួងអប់រំ មិនទាន់បូកសរុបថា បេក្ខជនប្រឡងបាក់ឌុប ប៉ុន្មាននាក់ដែលមានបញ្ហាសុខភាព នាព្រឹកថ្ងៃទី២០សីហា តែចំនួនដែលត្រូវបានប្រកាសឱ្យដឹងថាមាន១៥២ករណី ។ ខណៈដែលកាលពីថ្ងៃទី១៩ សីហា ឆ្នាំ២០១៩ ដែលជាថ្ងៃទី១ នៃការប្រឡងបាក់ឌុប មានបេក្ខជនចំនួន៤៣នាក់ មានបញ្ហាសុខភាព ។
ក្រសួងអប់រំបានប្រកាសថា បេក្ខជន ដែលមានបញ្ហាសុខភាពក្នុងពេលប្រឡងនាព្រឹកទី២០ សីហា ដោយមានអាការវិលមុខ ខ្យល់គរ ក្អួត ជាដើម ។ ក្នុងពេលនោះបេក្ខជនខ្លះបានបន្តការប្រឡងឡើងវិញ បន្ទាប់ពីមានអាការធូរស្រាល ដោយការទទួលបានជំនួយសង្គ្រោះបឋមពីក្រុមគ្រូពេទ្យប្រចាំការនៅតាមមណ្ឌលនោះ និងបេក្ខជនម្នាក់ ត្រូវបានបញ្ជូនទៅមន្ទីរពេទ្យ និងបានត្រឡប់មកមណ្ឌលប្រឡងវិញ ដើម្បីបន្តដំណើរសំណេរក្រោយពីបានទទួលការព្យាបាល ។
បេក្ខនារីសាត ស្រីប៉ុច ពិការដៃសងខាងពីកំណើតសង្ឃឹមប្រឡងជាប់ ការប្រឡងសញ្ញាបត្រមធ្យមសិក្សាទុតិយភូមិ បានបញ្ចប់ទៅហើយក្នុងដំណើរការយ៉ាងរលូន ហើយនៅក្នុងនោះដែរ ក្រសួងអប់រំយុវជន និងកីឡា បន្តការយកចិត្តទុកដាក់ការធ្វើកំណែជាបន្តទៀត ហើយលទ្ធផលនៃការប្រឡងនឹងប្រកាសនៅថ្ងៃទី១០ កញ្ញា សម្រាប់រាជធានីភ្នំពេញ និងខេត្តកណ្តាល និងថ្ងៃទី១១ កញ្ញា ប្រកាសផ្សាយតាមខេត្តនានា ។
សម័យប្រឡងឆ្នាំនេះយុវសិស្សពិការ ត្រូវបានកត់សម្គាល់មានប្រមាណ៤នាក់ ក្នុងនោះយុវតីស្រស់ស្អាតម្នាក់ពិការដៃទាំងសងខាង ក៏ជាបេក្ខជនម្នាក់ដែរ សម្រាប់មណ្ឌលប្រឡងវិទ្យាល័យឫស្សីកែវ នាងមានគណនីហ្វេសប៊ុកឈ្មោះ Sath Sreypoch ហើយសព្វថ្ងៃនេះកំពុងនៅសិក្សា និងជាអ្នកលក់ផលិតផលតាមអនឡាញ រកកម្រៃបំពេញការរស់នៅ ហើយសល់ថវិកាពីការចំណេញខ្លះទុកសម្រាប់ការសិក្សា ។ បេក្ខ ជនសាត ស្រីប៉ុច ពិការដៃសងខាងពីកំណើត ត្រូវបានប្រើជើងសម្រាប់ការសរសេរ ។ ការប្រឡងនេះនាងហាក់សង្ឃឹមថានឹងទទួលបានលទ្ធផលល្អ ៕
ចែករំលែកព័តមាននេះ