លោក LeBron James មិនត្រឹមតែជាកីឡាករដ៏ឆ្នើមមួយរូបទេ លោកក៏ជាវិនិយោគិនដ៏ជោគជ័យ និងជាសប្បុរសជនដ៏ល្បីមួយរូបដែរ ។ លើសពីនេះទៅទៀតលោកត្រូវបានកោតសរសើរដោយមហាសេដ្ឋី Warren Buffett ។
លោក Buffett បានប្រាប់ដល់សារព័ត៌មាន USA Today ថា «មនុស្សពិតជាមានខួរក្បាលដែលដើរល្អជាងមនុស្សដទៃក្នុងផ្នែកខ្លះពិតមែន ។ ហើយលោក LeBron ក្រៅពីមានទេពកោសល្យជាច្រើនហើយ លោកមានខួរក្បាលដែលអាចគិតពីលុយបានល្អ ។ ហើយលោកយល់ដឹងច្រើន» ។ ខួរក្បាលដែលពិសេសមួយប្រភេទនេះ និងការប្រើប្រាស់ខួរក្បាលបានជួយឲ្យលោកបានក្លាយជាអ្នកដែលជោគជ័យទាំងក្នុងផ្នែកីឡា និងអាជីវកម្ម ។
គួរបញ្ជាក់ផងដែរថា លោក LeBron ធ្លាប់រស់នៅផ្នែកមួយនៃទីក្រុងដែលពោរពេញទៅដោយភាពក្រីក្រ ប៉ុន្តែលោកបានក្លាយជាកីឡាករមួយរូបដែលរកប្រាក់ចំណូលបានដល់ទៅ៨៥.៥ លានដុល្លារឯណោះ ។ លោកមិនដែលមើលទៅការលេងបាល់បោះជាការងារមួយទេ ប៉ុន្តែលោកគិតថា វាជាឱកាសអាជីវកម្មទៅវិញ ។ លោកបានវិនិយោគថវិកាដែលលោករកបានលើអាជីវកម្ម និងការធ្វើអំពើសប្បុរសធម៌ជាច្រើន ។ ក្រៅពីធ្វើជាសហស្ថាបនិករបស់ក្រុមហ៊ុន Uninterrupted ដែលរកថវិកាបាន ១៥.៨ លានដុល្លារកាលពីឆ្នាំ២០១៥ ហើយលោក LeBron ក៏ជាអ្នកគាំទ្រក្រុមហ៊ុន Beat Headphones ផងដែរដែលត្រូវបានលក់ឲ្យទៅ Apple ក្នុងតម្លៃ៣ប៊ីលានដុល្លារធ្វើឲ្យលោករកប្រាក់ចំណូលបាន៣០លានដុល្លារ ។
លោកពិតជាមានការប្រុងប្រយ័ត្នក្នុងការប្រើប្រាស់លុយរបស់លោកណាស់ ហើយសូម្បីតែអតីតសមាជិកក្រុមបាល់បោះរបស់លោកក៏ពឹងផ្អែកលើលោកពេលដែលពួកគេត្រូវការដំបូន្មានពីលុយដែរ ។ លើសពីនេះទៅទៀត លោកជាមនុស្សដែលលម្អិតខ្លាំង ។ អ្នកកាសែតម្នាក់ដែលបានសម្ភាសលោកបាននិយាយថា លោកប្រៀបបានជាប៉ុងចាំស្រូបព័ត៌មានដែលត្រូវបានបោះឲ្យលោក ។ ហើយចំណុចនេះ គឺជាកត្តាចម្បងមួយពេលដែលលោកនិយាយជាមួយនឹងអ្នកណែនាំ ឬអាជីវករធំៗដែលនៅជុំវិញលោកដូចជា លោក Buffett, Bill Gates និង Steve Ballmer ជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ