ខេត្តស្វាយរៀង ៖ ប្រជាពលរដ្ឋភូមិអកនាគសង្កាត់សង្ឃ័រ ក្រុងស្វាយរៀង មានការព្រួយបារម្ភភ័យខ្លាចពីសុវត្ថិភាពគ្រួសារ មូលហេតុមានខ្សែភ្លើងតធ្លាក់រយីងរយោង កន្លែងខ្លះធ្លាក់ដល់ដី ធ្លាក់កាត់ផ្លូវមុខផ្ទះ និងប៉ះលើដំបូលផ្ទះម្យាងខ្សែភ្លើងទាំងនោះចាស់ៗហើយតូចទៀតអាចឆ្លងចរន្តទុស្សេខ្សែភ្លើង បណ្តាលឲ្យឆេះផ្ទះ ឬឆក់កូនចៅរបស់ពួកគាត់ គ្រោះថ្នាក់ដល់អាយុជីវិត ។ ទើបនៅព្រឹកថ្ងៃទី២០ សីហានេះ ប្រជាពលរដ្ឋបានសំណូមពរដល់អាជ្ញាធរខេត្ត ជាពិសេសលោកប្រធានអគ្គិសនីកម្ពុជាខេត្តស្វាយរៀង មេត្តាចុះទៅពិនិត្យ និងដោះស្រាយរៀបចំលើកខ្សែភ្លើងឲ្យបានត្រឹមត្រូវ តាមស្តង់ដាបច្ចេកទេសចៀសវាងទុស្សេគ្រោះថ្នាក់ជាយថាហេតុ ។
បើតាមស្ត្រីម្នាក់ឈ្មោះ សុខ ប៊ុន អាយុ៦៣ឆ្នាំ រស់នៅភូមិអកនាគបានឲ្យដឹងថា ខ្សែភ្លើងដែលធ្លាក់រាយប៉ាយនេះ ជាខ្សែភ្លើងរបស់ប្រជាពលរដ្ឋតចេញពីកាប៊ីនភ្លើងរបស់ក្រុមហ៊ុនម៉ៅការ ទៅតាមផ្ទះ គិតជាច្រើនឆ្នាំមកហើយ ដោយដាក់តាមបង្គោលឈើ ក្រោយមកក៏ដាក់តាមបង្គោលភ្លើងរដ្ឋ ហើយបានធ្លាក់រយីងរយោងរាយប៉ាយដល់ដីកាត់ផ្លូវមុខផ្ទះ និងកន្លែងខ្លះដាក់ផ្ទាល់លើដំបូលផ្ទះរយៈពេលជិត២ឆ្នាំមកហើយ គ្មានស្ថាប័នណាអើពើដោះស្រាយទេ ហើយរដូវវស្សានេះមានភ្លៀងខ្យល់ខ្លាំងខ្លាចតែដាច់ខ្សែភ្លើង ឬឆ្លងចរន្តទុស្សេឆេះផ្ទះ និងឆក់មនុស្សស្លាប់ទេ ។
ទាក់ទិនករណីនេះដែរ លោកកឹង ធួក អនុប្រធានអគ្គិសនីកម្ពុជា ខេត្តស្វាយរៀងបានមានប្រសាសន៍តាមទូរស័ព្ទថា ខ្សែភ្លើងធ្លាក់រយីងរយោងទាំងនោះ គឺជាខ្សែភ្លើងរបស់ប្រជាពលរដ្ឋគាត់តអូសទៅផ្ទះរបស់ពួកគាត់ ដោយពីមុនពួកគាត់ត តាមរយៈជាសហគមន៍ ហើយពួកគាត់គ្រប់គ្រងថែរក្សាខ្លួនឯង ហើយបច្ចុប្បន្ននេះខាងអគ្គិសនីបានដាំបង្គោលថ្ម រួចហើយអូសខ្សែនិងដាក់ត្រង់ហ្វ៉ូរួចហើយដែរ នៅចាំឲ្យប្រជាពលរដ្ឋគាត់ទិញខ្សែថ្មី និងតចេញពីត្រង់ហ្វូ អូសទៅតាមផ្ទះរបស់ពួកគាត់នោះលែងរយីងរយោងទៀតហើយ ក៏ប៉ុន្តែប្រជាពលរដ្ឋមិនទាន់មកទំនាក់ទំនងប្តូរខ្សែថ្មីទើប នៅមានភាពរញេរញ៉ៃបែបនេះ ។
ទោះបីជាយ៉ាងណា ប្រជាពលរដ្ឋបានសំណូមពរទទូចសូមឲ្យមន្ត្រីជំនាញចុះទៅរៀបចំតប្រព័ន្ធខ្សែភ្លើងឲ្យពួកគាត់នៅពេលឆាប់ៗនេះឲ្យបានត្រឹមត្រូវតាមបច្ចេកទេស ៕ កែសម្រួលដោយ ៖ សុឃាក់
ចែករំលែកព័តមាននេះ