ខេត្តព្រះសីហនុ ៖ សេចក្តីរាយការណ៍បឋមឱ្យដឹងថា សមត្ថកិច្ចចម្រុះខេត្តព្រះសីហនុ បាននិងកំពុងបន្តបើកការស្រាវជ្រាវរកមុខរកសញ្ញាជនដៃដល់ នៅថ្ងៃទី២១ សីហា នេះ ក្រោយពីមានករណីផ្ទុះអាវុធបាញ់ចូលកាសុីណូយ៉ាងកំរោល បណ្តាលឱ្យបុរសជនជាតិចិនម្នាក់ជាភ្ញៀវរបួសធ្ងន់ធ្ងរ ។
សូមបញ្ជាក់ថា ហេតុការណ៍នេះ កើតឡើងកាលពីអធ្រាត្រថ្ងៃទី១៩ សីហា ស្ថិតនៅចំណុចកាស៊ីណូទ្រព្យសម្បត្តិ ក្នុងសង្កាត់លេខ៤ ក្រុងព្រះសីហនុ ។ បើតាមប្រភពពីសមត្ថកិច្ចបញ្ជាក់ថា ជាមួយការពិនិត្យលើកាមេរ៉ាសុវត្ថិភាពថា ឃើញជនបង្កហេតុដែលផ្ទុះអាវុធជា គឺក្រុមជនជាតិចិនមានចំនួន៤នាក់ ។
ប្រភពបន្តថា ក្រុមជនដៃដល់បម្រុងចូលទៅលេងហ្គេមបាញ់ត្រីក្នុងកាសុីណូនោះ ប៉ុន្តែត្រូវបានរារាំងហាមឃាត់ពីក្រុមសន្តិសុខ មិនឱ្យចូលទៅក្នុងកាសុីណូ ទើបកើតជាជម្លោះ ហើយជនដៃដល់ម្នាក់ក្នុងចំណោមបក្សក៏ដកកាំភ្លើងខ្លីបាញ់៤គ្រាប់ចូលតែម្តង ។ ក្រោយបាញ់រួច នាំគ្នារត់គេចខ្លួន ចំណែកជនរងគ្រោះត្រូវបានគេបញ្ជូនទៅសង្គ្រោះ ។ (សម្រួលដោយ៖ ស្រីណា)
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ