រាជធានីភ្នំពេញ ៖ គិតត្រឹមឆមាសទី១ ឆ្នាំ២០១៩ ទំហំនៃការវិនិយោគ និងពាណិជ្ជកម្មជប៉ុនមកកម្ពុជាមានទឹកប្រាក់កើនឡើងប្រមាណជិត៥០០លានដុល្លារ ខណៈការនាំចេញទៅ ប្រទេសជប៉ុនមានទំហំទឹកប្រាក់ប្រមាណជាង១៧០០លានដុល្លារ ។ នេះបើតាមលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានលើកឡើងក្នុងជំនួបជាមួយលោក Hidehisa HORINOUCHI ឯកអគ្គរដ្ឋទូតវិសាមញ្ញ និងពេញសមត្ថភាព ជប៉ុនប្រចាំកម្ពុជា ក្នុងឱកាសជួបសម្តែងការគួរសម និងជម្រាបលា កាលពីថ្ងៃទី១៩ សីហានេះ នៅទីស្តីការក្រសួង ។
លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋាភិបាលជប៉ុនដែលតែងតែរក្សា និងបានផ្តល់នូវកិច្ចសហប្រតិបត្តិការល្អប្រសើរសម្រាប់កម្ពុជា ។ លោកក៏បានឲ្យដឹងថា សម្រាប់ឆ្នាំ២០១៨ ទំហំនៃការវិនិយោគឯកជនពីប្រទេសជប៉ុនមានទឹកប្រាក់ប្រមាណ៤៤០លានដុល្លារអាមេរិក ។
រីឯការនាំចេញទៅប្រទេសជប៉ុនមានទំហំទឹកប្រាក់ប្រមាណ១៦០០លានដុល្លារអាមេរិក ។ ហើយគិតត្រឹមឆមាសទី១ ឆ្នាំ២០១៩ ទំហំនៃការវិនិយោគ និងពាណិជ្ជកម្មជប៉ុ មានទឹកប្រាក់កើនឡើងប្រមាណជិត៥០០លានដុល្លារអាមេរិក រីឯការនាំចេញទៅប្រទេសជប៉ុនមានទំហំទឹកប្រាក់ប្រមាណជាង ១៧០០លានដុល្លារអាមេរិក ។ ក្នុងជំនួបនោះដែរ លោកឯកអគ្គរដ្ឋទូត Hidehisa HORINOUCHI បានសម្តែងនូវសេចក្តីសោមនស្សរីករាយដែលបានមកបំពេញបេស កកម្មការទូតនៅកម្ពុជា និងកោតសរសើរដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលសម្រេចបាននូវកំណើនសេដ្ឋកិច្ចខ្ពស់ និងរីកចម្រើនស្ទើរគ្រប់វិស័យ ។
លោកទូចចប់អាណត្តិក៏បានអះអាងថា រដ្ឋាភិបាលជប៉ុននឹងបន្តពង្រឹងនិងពង្រីកទំនាក់ ទំនងការទូត និងកិច្ចសហប្រតិបត្តិការនានាលើគ្រប់វិស័យអាទិភាពជាមួយកម្ពុជា រួមទាំងបន្តគាំទ្រផ្នែកហិរញ្ញវត្ថុ និងផ្នែកបច្ចេកទេសដើម្បីចូលរួមចំណែកដល់ការអភិវឌ្ឍការវិនិយោគសាធារណៈ និងឯកជននានានៅកម្ពុជា ។
សូមជម្រាបជូនថា ក្នុងអាណត្តិបីឆ្នាំនៃការបំពេញបេសកកម្មការទូតនៅកម្ពុជានេះ កម្ពុជា-ជប៉ុន បានចុះហត្ថលេខាលើកិច្ចព្រមព្រៀងហិរញ្ញប្បទានសហប្រតិបត្តិការ (Japan ODA)មានទឹកប្រាក់សរុបប្រមាណជាង៥៥០លានដុល្លារ ក្នុងនោះហិរញ្ញប្បទានឥតសំណងមានទឹកប្រាក់ប្រមាណជិត១៥០លានដុល្លារអាមេរិក សម្រាប់គាំទ្រលើវិស័យជាច្រើនរួមមាន ៖ ផ្លូវ, ស្ថាន, ការផ្គត់ផ្គង់ទឹកស្អាត, ថាមពលអគ្គិសនី, អប់រំ,សុខាភិបាល និងការកសាងហេដ្ឋារចនាសម្ព័ន្ធរូបវ័ន្តនានា និងទឹកប្រាក់ប្រមាណជាង៤០០លានដុល្លារ ជាឥណទាន សម្បទានសម្រាប់ហិរញ្ញប្បទានបន្ថែម ដល់គម្រោងធ្វើឲ្យប្រសើរឡើងនូវកំណាត់ផ្លូវជាតិលេខ៥ (ស្ពានព្រែកក្តាម-ក្រុងប៉ោយប៉ែត) គម្រោងអភិវឌ្ឍន៍ ចំណតកុងតឺន័រ កំពង់ផែស្វយ័ត ក្រុងព្រះសីហនុ, តងស្តាឡើងវិញនូវប្រព័ន្ធធារាសាស្ត្រ និងគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនី ។
វិភាគទានរបស់ប្រជាជនជប៉ុន សុទ្ធសឹងតែគាំទ្រដល់យុទ្ធសាស្ត្រនៃការអភិវឌ្ឍជាតិរបស់ប្រទេសកម្ពុជាដែលកំពុងដឹកនាំដោយសម្តេចតេជោ ហ៊ុន សែន នាយករដ្ឋមន្ត្រី ៕ កែសម្រួលដោយ ៖ សុឃាក់
ចែករំលែកព័តមាននេះ