ក្រុមហ៊ុនថ្មីមួយ ដែលមានគោលបំណងផលិតនិងលក់យន្តហោះដំណើរការដោយថាមពលអុីដ្រូសែន បានលេចចេញជារូបរាងកាលពីថ្ងៃពុធ។ ក្រុមហ៊ុន ZeroAvia ដែលមានមូលដ្ឋាននៅទីក្រុង Hollister រដ្ឋកាលីហ្វ័រញ៉ា អះអាងថាយន្តហោះរបស់ខ្លួននឹងមានតម្លៃថោកជាង ក្នុងការផលិតនិងហោះហើរ ជាងយានយន្តដើរដោយថាមពលប្រេងឥន្ធនៈ ហើយក៏មិនបញ្ចេញឧស្ម័នកាបូនិចដូចយន្តហោះដទៃដែរ។
ក្រុមហ៊ុន ZeroAvia គ្រោងនឹងផលិតយន្តហោះខ្នាតតូចកៅអី ១០ ទៅ ២០ ដែលប្រើសម្រាប់ការហោះហើរជិតៗក្នុងរយៈចម្ងាយ៥០០ម៉ាយ ក្នុងតំបន់។ ក្រុមហ៊ុនបានធ្វើការសាកល្បងការហោះហើរប្រកបដោយជោគជ័យជាច្រើន ដោយប្រើគំរូយន្តហោះគ្រោងប្រភេទ Piper M-Class។ យោងតាមក្រុមហ៊ុនបានឱ្យដឹងថា ជាមួយនឹងទម្ងន់២តោន និង កៅអី៦ គម្រូយន្តហោះនេះគឺជាយន្តហោះគ្មានផ្សែងបំពុលធំជាងគេ ដែលហោះដោយគ្មានពឹងផ្អែកលើប្រេងឥន្ធនៈបន្តិចណាទាល់តែសោះ។
រដ្ឋបាលអាកាសចរណ៍សហព័ន្ធ បានអនុញ្ញាតិអោយ ZeroAvia ដំណើរការគម្រូរបស់ខ្លួនសម្រាប់ការហោះហើរសាកល្បងនៅដើមឆ្នាំនេះ។ ចាប់តាំងពីពេលនោះមក យន្តហោះបានបញ្ចប់ការហោះហើរសាកល្បងជាច្រើនប្រភេទ ដោយជោគជ័យ។ គំនិតនៃការហោះហើរដើរដោយថាមពលអគ្គីសនី បានកើតឡើងអស់ជាច្រើនទសវត្សមកហើយ ប៉ុន្តែទើបតែថ្មីៗនេះវាបានចាប់ផ្តើមដំណើរការ។
ក្រៅពីការប្រើប្រាស់ថាមពលអុីដ្រូសែនជាប្រភពថាមពល មានក្រុមហ៊ុនខ្លះក៏ធ្លាប់គិតចង់ផលិតយន្តហោះដែលអាចហោះដោយប្រើអគ្គិសនីផងដែរ។ ពោលគឺគេចង់ធ្វើវាឱ្យដូចទៅនឹងអ្វីដែលរថយន្តអគ្គិសនីបច្ចុប្បន្នកំពុងធ្វើ។ តែអ្វីដែលយើងគួរដឹងគឺថា អុីដ្រូសែនសំបូរច្រើននៅលើផែនដី ហើយវាមិនបញ្ចេញអ្វីអាក្រក់ទេ ក្រៅពីចំហាយទឹក ៕
ប្រភព ៖ theverge , កែសម្រួលដោយ ៖ សំណាង
ចែករំលែកព័តមាននេះ